Read Nyishi JOSUA 22 Bible Online

JOSUA 22 - Nyishi bible

JOSUA 22

¹Hoq moodho Josua Reuben nyi tulungam la Gad nyi tulungam hoo Manasse nyob papo gon goqkumnum,

²‍hoo bulam benum, “At Swg nyera Mojes nulam gaml jiknam mam nulv hingky jaqb nyipa ku hoo nulam ngoqg gaml jiknam mam nulv tvjwnum.

³‍Soolo aal namgub nulug vbw-bor tulungam nulv haqpaqmab mood oyu gob nyipa ku, hvbmabde nulug Pwnbo At Swg nulam gaml jinam mam nulv hingky jaqb nyipa ku.

⁴‍Hoo sija nulug Pwnbo At Sw nulug vbw-bor tulungam mwwg dingr koob bulam doonu dvb jipa ku. Hoqgab nulug tombu dook gvdab wkur gvdkul nulug otungam naata ku, hogloq ham At Swg nyera Mojes nulam Jordon kvtin gon ho jiknum.

⁵‍At Swg nyera Mojes nulam gaml jinam gaml tulu pvvbam hengab jaqb tvjwl swwtwqto, ho nulug Pwnbo At Swn abyto, hoo hog mwlw nyik-wk ho mwwg lamtab wto hoo mwwg gaml tulungam pvvg dvl hoo mwam bugil swwl hoo nulug hvvjw lvgab hoo nulug yvj lvgab mwam bon nyijto.”

⁶‍Hoqgab Josua bulam lvqc cinum hoo bulam kanam kunum, hoo bulug tombu dook gvdab bulv wknum.

⁷‍Mojes Manasseg nyob papo gon Basan gvdaho otungam jinum, hvbmabde nyob papo gon bulug vbw-bor dook bviywr dou-haaga taqcig Jordon ho Josua bulam otu jinum. Hoo Josua bulam lvqc citkul hoo bulug dook nammwb bulam kanam kunum,

⁸‍mwv bulam benum, “Tuun-mee lvgab, rup, hun, tama, hoo yoqdwr, hoo naleq go vj lvgab gumnam vigo baqlayil nulug tombu dook gvdab wkur nuku. Nulug ceebio tulu hoqgv nyob pal naareqnam mam nulug vbw-bor tulungam horpin-hora ta.”

⁹‍Hoqgab Reubenwg nyiilu ngvla Gadwg nyiilungv hoo Manasseg nyob papo gon nammwb wkur kunum, Kanaan gvdag Silo hoqgv bulv Israelwg nyiilu hoqgv wpin-wra kunv bulug at gvda Gilead ho wknum, ho At Swg nyera Mojes bulam otu gob naam dvb gaml jiknam hoq gvdab wknum.

¹⁰‍Hoo hwdlo bulv Kanaan gvda Jordonwg swsw-saaho haaikun, Reubenwg nyiilu ngvla Gadwg nyiilungv hoo Manasseg nyob papo gon Jordon bviywrho yugw ak mvnum, hoqg yugw ham kangam looda dvb mvnum.

¹¹‍Hoo Israel nyiilungv ham tapa tvl benum, “Kaato, Reubenwg nyiilu ngvla Gadwg nyiilungv hoo Manasseg nyob papo gon Israel nyiilug gvda Jordon daiyag, Kanaan gvda agaho yugw ak mvp paku.”

¹²‍Hoo hwdlo Israel nyiilungv ham tapa tvl, Israel nyiilungv lvkin gob Silo ho hookumnv hoo bulam ceekol nyob padwb benum.

¹³‍Ho Israel nyiilungv nyub Eleajar ko tuup Pinehasnvn Reubenwg nyiilug dookub la Gadwg nyiilug dookub hoo Manasseg nyob papo gon dookub Gilead gvdaho kanamnum,

¹⁴‍hoo mwwg lvgab peelo bo nyi wyw go, nyob vxy hoqgv ak-akwb xuqlin banv kanamnum, hoq wnbo nyi vx-cwrhv imiq pengko hoqg Israel nyob tulug peelo boam nyinum.

¹⁵‍Hoo bulv Reubenwg nyiilu dook bvla Gadwg nyiilu dookub hoo Manasseg nyob papo gon dookub Gilead gvdaho haanum, hoo bulv bulam benum,

¹⁶“Soq sib At Swg nyi dvpar mwlwngv bedo, ‘Israelwg Pwnboam nulv hoggub ceekol soq sib nyic nyiknv, soq aal so At Swn wmin gvkmab nulv atv atgab soq yugw sam mvl At Swn ceekol bidu-bel takmab nyipa kun?

¹⁷‍Peor alo ngulv xumt dvb nyic nyik maan mviyv, ngulv hoq nyicam atv sija godab darxaq kama ta, hoo hoggab At Swg nyi dvpar aoho swlin-momin ak haanum,

¹⁸‍ho nulv kam soolo aal soqgv At Swn wmin gvma dvb haqpaq dvn yv? Hoo nulv soolo At Swn taleql ceeko baloqkam aaram mam mwv Israel nyi dvpar aoho hang lengl haaxaq tayin.

¹⁹‍Hvbmabde sija, nulug otu naanum gvdangv dvrwq maloqkam, hogloq ho At Swg xumk pirrv daqdwn hoqg At Swg gvda urab rabto, hoo nulug atv atgab ngulug pengko lo otu naato. Hvbmabde At Swn ceekol taleqmabv ho maalo nulug Pwnbo At Swg yugw lvvg alo, nulv atv atgab yugw mvl ngulam kam taleq bob xitaq mvmabv.

²⁰‍Nyob pal naareqnam dupum-dvrab pam naagam gab Jerag ko tuup Akan mwwjwngam mvpia maan mviyv, hoo hang lingtwrnamv Israel nyi dvparho haama nvm yv? Hoo mwwg nyimur gab mwv arro sitwq maanum.’”

²¹‍Ho Reubenwg nyiilungv, Gadwg nyiilungv, hoo Manasseg nyob papo gon Israelwg nyob dvpar hoqg peelo bo tulungam agam goonv birwqnum,

²²“Mwlwngam Koi yaanbo Akv, Pwnbo, At Sw! Mwlwngam Koi yaanbo Akv, Pwnbo, At Sw! Mwv cengdo; hoo Israelv nulv kam atv cengdo! Taleql ho mwwjwngam mvpial At Swn ceeko paloqkam, soolo ngulam vcwr gokam apaq maabv

²³‍hoggab yugw mvl At Sw galoqkv aado paloqkam. Ho maalo ngulv hoqho boyuqnam aky tulungam ho maalo dvs aky tulungam ho maalo swrso aky tulungam jipa loqkam, At Swn mwam atam kwly naamto.

²⁴‍Ma, hvbmabde ngulv yugw ak mvnam hv hvbaloqkam ngulv bosdo, kokw moodam nulug ko tulungv ngulug ko tulungam betayi, ‘Israelwg Pwnbo At Swg lvgab nulv hoggv nyita dvn?

²⁵‍Hoggab At Sw Jordon pobungam ngul gvla nulug pengko so vrr pakun, Reubenwg nyiilu nulv hoo Gadwg nyiilu nulv. Nulv At Sw lvgab hog nyis dooma dvn.’ Hoqgab nulug ko tulungv lokam ngulug ko tulungam At Swn xum mvma dvb mvtur tayi.

²⁶‍Hoqgab ngulv benum, ‘Kuj ngulv yugw loq ak mvtuj, boyuqnam aky jid bvma, ho hoqho pwr jid bvma,

²⁷‍hvbmabde ngul gvla nulug pengko ho hvvky gob doom dvb, hoo ngulug kokwb nyi dvpar gab mvnum, ho ngulv At Swg agaho boyuqnam aky tulungam hoo pwr jinam tulungam hoo swrso aky tulungam bon nyidwb nyidwn hvl hvvky gob, ho nulug ko tulungv ngulug ko tulungam kokw moodam hvl beram, “Nulv At Swg lvgab hog nyis dooma dvn.” ’

²⁸‍Hoo ngulv mwwnum, hoq hvb ngulam maalo ngulug hosiqkam kokw moodam ngulam beba loqkam, ‘Ngulv betayin, kaato, At Swg yugwngam ngulug ab tulungv mvp kunum, hoqho boyuqnam aky tulungam, ho pwr jinam mam jid bvma, hvbmabde ngul gvla nulug pengko ho hvvky doom dvb mvnum.’

²⁹‍Ngulv hoggub nyijaqkam At Swn ceekol taleqram hoo soolo aal soqgv yugw ak mvl boyuqnam akiam, dvs akiam, ho maalo pwr jidwb At Swn wmin gvmab nyiram, mwwg xuml pirr agaho daqnbo ngulug Pwnbo At Swg yugw lvvgho asaq yugw mvram!”

³⁰‍Hwdlo nyub Pinehas la mwwg lvgab wmin gvnbo Israelwg nyi tulug nyob dvpar hoqg peelo bo tulungv, Reubenwg nyiilu ngvla Gadwg nyiilungv hoo Manasseg nyiilungv agam goonam mam bulv taknum, hoq agam goonam tulungam bulv tvlwqnum.

³¹‍Hoo Eleajarwg ko tuup nyub Pinehas Reubenwg nyiilu ngamla Gadwg nyiilungam hoo Manasseg nyiilungam benum, “Soolo ngulug pengko so At Swg doonam mam ngulv cengpa ku, hoggab nulv At Swn ceekol soq mwwjwnam mam mvpia jima. Sija nulv Israel nyiilungam At Swg alaq hoqgv ywwlin jipa ku.”

³²‍Ho nyub Eleajar ko tuup Pinehas, la peelo bo tulungv Reubenwg nyiilu hoqgv hoo Gadwg nyiilu hoqgv Kanaan gvdag Gilead hoqgv Israel nyiilug dookub wkur kunum, hoo puiyam bulam baqa jiknum.

³³‍Hoo Israel nyiilungv pui baqanam mam tatwl tvlwqnum. Hoo Israel nyiilungv Pwnbon paqnum hoo Reubenwg nyiilu ngvla Gadwg nyiilug gvda dookam nyob pal twrdwb hvnam agam mam gook maanum.

³⁴‍Reubenwg nyiilu ngvla Gadwg nyiilungv yugw ham “Hvvky Gab” hvl emin goql bulv benum, “Hoggab,” bulv benum, “soq si ngulug pengko lo hvvky gob dootayin, At Sw ngulug Pwnbov.”