Read Nyishi JOSUA 23 Bible Online

JOSUA 23 - Nyishi bible

JOSUA 23

¹Oyu kokw so, At Sw Israel nyiilungam bulam hwwiyiql doonbo ceebio tulu hoqgv swrsob doob dvb jiknum, hoo Josua nyekam kunv vnywngv vigo wknum,

²‍Josua Israel nyi mwlwngam, hoqg nyi axa tulungam hoo peelo bo tulungam, hoqg nyegam tulungam hoo saab tulungam goqkum banv bulam benum, “Ngo sija nyekam duku hoo vnywngv vigo wpa ku.

³‍Hoo nulug pagoq gab nulug Pwnbo At Sw soq nyob asaq nyi tulungam nyinam mam nulv atv kaapa ku, hoggab soq sam nulug Pwnbo At Sw nulgab nyobam pvj pakun.

⁴‍Kaato, Jordon hoqgv dou-haagag Koibo Sa-svlo namgub asaq nyob tulu galoqkv gvda naaknam mam ngo nulam otu jipa kun, hoo soq asaq nyob tulug gvda sam nulam hvraqb jitayin.

⁵‍Nulug Pwnbo At Sw bulam nulug otuq hoqgv mvpaq tayin hoo nulug vnyiq kaaga hoqgv bulam ruqpaq tayin. Hoo nulug Pwnbo At Sw nulam dingrnam hvb nulv bulug gvdangam otu naatayin.

⁶‍Hoqgab, Mojesg Pvvb Kitapam pvvd bvla hoqg xeqpnam mam nyidwb hwngkwb atorto, ho lvqbwq bvkam ho laqc bvkam wkar-war maabv,

⁷‍ho nulug pengko ho doonbo soq asaq nyob tulug lvgab nulv nyiyo-nyico maabv ho bulug pwnbo emin tulungam goomabv, ho bulug agaho dingmabv, bul gab bon nyimabv ho bulam pvxwl xumabv,

⁸‍hvbmabde soolo nulv hoggub nulug Pwnbo At Swn bugil doonam hvb dootayin.

⁹‍Hoggab koi bvla atorbo asaq nyob tulungam nulug otuq hoqgv At Sw ruqlinl ruqpaq pakun. Hoo soolo godab nyi akkam nulug agaho dvqrwq nyoma dvn.

¹⁰‍Nulug nyi akinv lwwyw nyiingam nyob padwn, hoggab mwv nulam dingr kunam hvb, nulug Pwnbo At Sw nulgab nyob padwn.

¹¹‍Hoqgab, nulug Pwnbo At Swn aby dvb, hengab to.

¹²‍Hoggab nulug pengko ho boumnam nyob asaq lvgab nulv nyimin gvl swwb nyiloqkam hoo bulug lvgab nyem naako-naapeq baloqkam, nulv bulug lvgab yvmin gvtayin hoo bulv nulug lvgab yvmin gvtayin,

¹³‍ho nulv pwbwb cengtayin nulug Pwnbo At Sw soq nyob asaq nyi sam nulug pengko hoqgv ruqlinl ruqpaq kuram, hvbmabde bulv nulgab pwd-poto toggoq gob nyitayin, nulug Pwnbo At Sw nulam albo jinam gvda hoqgv hwdlo nulv twryum maady deedib, nulug langkam jwwtayin hoo nulug vnyiq taa gob nyitayin.

¹⁴“Hoo sija ngo swcw soqgv wta dukun, hoo nul mwlwngv, nulug hang hoqgv hoo yvjv hoqgv nulv cengdo, nulug Pwnbo At Sw albo pagoqkam nulam dingrnam agam gamg kam kvxaqmab niqtuq lengm paku. Mwlwngam nulgab nyiyum jipa kun; agam gamg kam kvxaqmab niqtuq lengm pakun.

¹⁵‍Hvbmabde nulug Pwnbo At Sw albo pagoqkam nulgab dingr kunam mwlwngam nulgab niqtuq lengm pakun, hoqhvb kalam At Sw nulug aoho almanbo pagoqkam haam tayin, ho nulug Pwnbo At Sw nulam albo gvdangam jinam hoqgv nulam twryum maady deedib twrpaq tayin,

¹⁶‍hogloq ham mwv nulam gaml jiknum, ho nulug Pwnbo At Swg birnam pvvbam nulv pvvb juqbo baloqkam, hoo asaq pwnbo tulug dookub wl hoo bon nyijil hoo bulam xumb nyiloqkam. Ho At Swg haaxaqnamv nulug aoho wmmwb bioqlwq tayin, hoo mwv nulam albo gvda jiknam hoqgv nulv nyebia jaqb niipaq taikun.”