Read Nyishi JOSUA 24 Bible Online

JOSUA 24 - Nyishi bible

JOSUA 24

¹Josua Israel nyob mwlwngam Sekem ho hookum mvnum hoo nyi axa tulungam, peelo bo tulungam, nyegam tulungam, hoo Israelwg saab tulungam goqkumnum. Hoo Pwnbog agaho bulv atv nyiip apongv haanum.

²‍Hoo Josua nyiilu mwlwngam benum, “Soq sib Israelwg Pwnbo, At Sw bedo, ‘Kol otuqho nulug ab tulungv Iupratas kvtin gonho doonum, Abraham gv gvla Nahorg ab Tera; hoo bulv asaq pwnbo tulungam xumnum.

³‍Ho ngo nulug ab Abrahamnvn pobu kvtin gon hoqgv naanum hoo mwam Kanaan gvdab wgnum, hoo mwwg hosiqkam dumtwq-miilyw dvb mvnum. Ngo Aisaknvn mwam jinum.

⁴‍Hoo Aisaknvn ngo Jakubnvn la Isunvn jinum. Hoo ngo Isunvn Seirwg diisw gvdangam otu naamnum, hvbmabde Jakubg ko hosiqkv Ijipt gvdab innum.

⁵‍Hoo ngo Mojesnvn la Aaronnvn kanamnum, hoo ngo Ijipt ho swlin-mominam mam ngo bulug pengko ho nyimnum, hoo ngo nulam kokw so boolinum.

⁶“Ho ngo nulug ab tulungam Ijipt hoqgv boolinum, hoo nulv sa-svlo ho haaknum. Hoo Ijipt nyi tulungv nulug ab tulungam ceriot tulu lvgab la svpur xarnbo nyi tulu lvgab Swlw Sa-svlo ho ruqmin gvnum.

⁷‍Hoo hwdlo bulv At Swn svka gab sogoql xabyikam, mwv nul gvla Ijipt nyi tulug pengko ho kan putum dvb mvnum hoo sa-svlongv bulug aoho hwrlupnum; hoo ngo Ijipt nyi tulungam hoggv nyiknam ham nulug vnyiqkv kaanum. Hoo nulv deexa-raraho oyu mood go doonum.

⁸‍Ho ngo nulam Amor nyi tulug gvda so boolwqnum, hiyv Jordon kvtin gonho doonum. Bulv nulam nyob panum, hoo ngo bulam nulug alaqho jilwqnum, hoo nulv bulug gvdangam otu naanum, hoo bulam ngo nulug agaho twryumnum.

⁹‍Ho Moab lvpw at, Jippor gv ko tuup Balak, Israelam ceekol nyob panum. Hoo mwv nyi kanaml Beyor gv ko tuup Balaamnvn nulam beem dvb goqanum,

¹⁰‍hvbmabde ngo Balaam benam mam tamanum. Jvqtwngam bebnyiloqkam mwv nulam lvqcnum. Ho mwwg alaq hoqgv ngo nulam naalinum.

¹¹‍Hoo nulv Jordon kvtinb wknum hoo Jeriko ho haanum, hoo Jerikog nyigbo tulungv nulam ceekol nyob panum, hoo hoq lvgab Amor nyi tulungv, Perijj nyi tulungv, Kanaan nyi tulungv, Hittait nyi tulungv, Girgas nyi tulungv, Hibitait nyi tulungv, hoo Jebus nyi tulungv nyob panum. Hoo bulam ngo nulug alaqho jilwqnum.

¹²‍Hoo nulug otuqb ngo vs-axaqkam bulug pengko ho kanamnum, ho Amor nyi tulug lvpw at vnyiam, nulug aga hoqgv bulam ruqlinl ruqpaqnum, hoqhv nulug lyoqr orioq ho nulug illy-uppuq hoqgv ma.

¹³‍Nulam hentwr-kaas dvb bon nyimab ngo nulam gvdangam jiknum hoo nulv bopam tulungam pwma sunum, hvbmabde nulv hoq tuluho doogw dukun. Nulv roo aaxiam la olib aaxiam dudu gvdwn ham nulv liimanum.’

¹⁴“Hoqgab sija At Swn bosto hoo mwam hvvcwr baqg dvl hoo mwwjwl xumto. Nulug ab tulungv Pobu kvtin hoola Ijipt ho asaq pwnbo tulungam xumnam tulu ham apaq tuku, hoo At Swn xumto.

¹⁵‍Hoo At Swn xumdwn nulug vnyiq kaagaho almad nyiloqkam, hiyam xumtayin nulv soolo aal so xuqbwqto, nulug ab tulungv pobu kvtin alo xumnam asaq pwnbo tulu ham yv, ma nulug doogw ko gvdag Amor nyi tulug pwnbo tulu ham ya xumb yv. Hvbmabde ngo la ngoqg imiq dvparv, ngulv At Swn xuml dootayin.”

¹⁶‍Ho nyiilungv birwqnum, “Ngulv vcwr gokam At Swn xumab apaqram hoo asaq pwnbo tulungam xumram,

¹⁷‍hoggab ngulug Pwnbo At Sw ngulam boolinum hoo ngulug ab tulungv nyera-paqn swwl dook Ijipt gvda hoqgv lengknum, hoo soq koibo swrdorxeq sam ngulug kaagaho hiyv nyinum hoo ngulug lamta wk mwlwho ngulam hoocuml kaal wgnum, hoo asaq nyob nyiilu mwlwg pengkob ngulam boopeql wgnum.

¹⁸‍Hoo gvdaho doonbo Amor nyi tulug, nyiilungam At Sw ngulug otuqb ruqlinl ruqpaqnum. Hoqgab ngulv kam At Swn xumtayin, hoggab mwv ngulug Pwnbov.”

¹⁹‍Hvbmabde Josua nyiilungam benum, “Nulv At Swn xumny ram, hoggab mwv dvrwqbo Pwnbov. Mwv kaaneqbo Pwnbov; mwv nulug nyimurnam mam la nulug nyicam apaq nyoram.

²⁰‍Nulv At Swn apaq pel hoo nyoodo pwnbo tulungam xumb nyiloqkam, nulam alboam nyij kunam hoqgv mwv wkur taikun hoo nulam hentwr hemwl hoo nulam dvmeq tayin.”

²¹‍Hoo nyiilungv Josuanvn benum, “Ma, ngulv At Swn xumtayin.”

²²‍Ho Josua nyiilungam benum, “Nulv At Swn xumdwb xuqbwq panwq hvnam hv, nulam atam ceeko dvb hvvky baqs dvlak.” Hoo bulv benum, “Ngulv hvvky baqs dvn.”

²³‍Mwv benum, “Hvnyiloqkam nyoodo pwnbo tulungam nulug pengko hoqgv hurpaqto, hoo Israelwg Pwnbo, At Swn nulug hangv bugil swwto.”

²⁴‍Hoo nyiilungv Josuanvn benum, “Ngulug Pwnbo At Swn ngulv xumtayin, hoo mwwg yalam ngulv tvjw tayin.”

²⁵‍Ho Josua hoq aalho nyiilug lvgab birnam pvvbam mvnum, hoo Sekem ho gamlam la pvvb tulungam nyil swwm dvb bul gab jiknum.

²⁶‍Hoo Josua soq gomcwr tulu sam Pwnbog Pvvb Kitap ho xeqpnum. Hoo mwv wlw pwtbo pwg naalayil hoo ham At Swg dvrwq namlo gob terebin niikum ho diidaql apnum.

²⁷‍Hoo Josua nyiilungam benum, “Kaato, soq wlw si ngulam hvvky swwtayin, hoggab soq wlw si At Sw mwv ngulam agam gooknum gomcwr mwlwngam tapa kun. Hoqgab nulug Pwnboam nulv xaalyo lyopaq baloqkam, soq wlw si nulam hvvky kaatayin.”

²⁸‍Hoqgab Josua nyiicwr-cwrxiam mwwg otu naak gvdab, nyiilungam kanam kunum.

²⁹‍Soq tulu si nyixo kokw so, Nunwg ko tuup Josua, At Swg nyerangv siknum, mwv vnyw 110 gob nyekam kunum.

³⁰‍Hoo bulv mwam mwwg otu naanam Timnat-sera, Iprayim diisw gvdag Gaas puutug nyoodum daiyaho svma liiknum.

³¹Israel nyiilungv Josuag swwl dood aal hoola nyi axa tulungv hiyv Josuag sixo kokw so swwl dood aalho, hoo Israel gab At Swg hog mwlwg bonam nyinam mam cengn bov At Swn xumnum.

³²‍Josapg alongam Israel nyiilungv Ijipt hoqgv baqlin kunam mam bulv ham Sekem ho liiknum, hogloq gvda vcwr ham Jakub Hamorwg ko tuup tulu Sekem ab hoqgv twngk vjwr lwwgwb rvknam ham. Hoqham Josapg hotamv otu nvvsiq kunum.

³³‍Hoo Aaron gv ko tuup Eleajar siknum, hoo hogloq ham mwam Iprayim diisw gvdangam jiknam ho bulv mwam Gibea gvdag, mwwg ko tuup Pinehaswg pamda ho liiknum.