Read Nyishi JOSUA 3 Bible Online

JOSUA 3 - Nyishi bible

JOSUA 3

¹Ho ar komc gorab layil Sittim hoqgv wrab nyanum. Hoo mwv la Israelwg nyiilu mwlwngv, bulv Jordon ho wc kunum, hoo bulv pobungam rabdv maadab hoqho svmcw mvtwl dooiyanum.

²‍Aal loumv wnya yukho saab tulungv svmcwb wpeq banv

³‍hoo nyiilungam gaml jinum, “Nulug Pwnbo At Sw pvvb uddum mam Lebi nyub tulungv jool wgnam mam kaapa twqda kalam, ho nulug dook nyook hoqgv nulv lengtayin hoo ham wmin gvtayin.

⁴‍Hvbsujaqkam nul gvla hoq pengko daayaram 2,000 kiubit gob aado mvto. Hoq ogumb hvvnwq maabv, nulv hogloq lamtab wta dvn ham nulv cengdwb, hoggab otuqho nulv soq lamtab wka maanum.”

⁵‍Ho Josua nyiilungam benum, “Nulv atv atam garxaqto, hoggab aaram mam At Sw nulug pengko ho swrdorxeq bonam nyitayin.”

⁶‍Hoo Josua nyub tulungam benum, “Pvvb uddum mam joorab layil nyiilug otuqb wgto.” Ho bulv pvvb uddum mam joorab layil hoo nyiilug otuqb wgnum.

⁷‍At Sw Josuanvn benum, “Soolo ngo nam Israel nyi tulug kaagaho xinam gob mvtayin, ho ngo hoggub Mojes lvgab doobanam hvb, ngo noqg lvgab doobanam mam, bulam cengm tayin.

⁸‍Hoo no nyub tulungam pvvb uddum mam jool wg mvdwb gaml jito, ‘Hwdlo nulv Jordon pobu iss sugurho haaikam, nulv hoqho biimab daqya tayin.’”

⁹‍Hoo Josua Israelwg nyiilungam benum, “Soqb haato hoo nulug Pwnbo At Swg gomcwr tulu sam tato.”

¹⁰‍Hoo Josua benum, “Swwl doonbo Pwnbov nulug pengko ho doodwn hvl nulv soq tulu sam cengtayin, hoo mwv nulug aga hoqgv Kanaan nyi tulungam, Hittait nyi tulungam, Hibitait nyi tulungam, Perijj nyi tulungam, Girgas nyi tulungam, Amor nyi tulungam, hoo Jebus nyi tulungam ruqpaq maab nyiram.

¹¹‍Kaato, swcwngam pwnbo At Swg pvvb uddum mam nulug otuqb Jordonb rapeq gvtayin.

¹²‍Hoqgab sija nyob camleq vnyi hoqgv nyega loq ak-akwb nyob vxy hoqgv naato.

¹³‍Hoo hwdlo swcw nvg atwg, At Swg pvvb uddum mam joon bo nyub tulug lvpiangv Jordon pobu ho dvlwq kalam, Jordonwg pobu iss tol doon boam tongngin mvtayin, hoo odum hoqgv iss tol bov olum daqtayin.”

¹⁴‍Hoqgab hwdlo nyiilungv bulug tombu hoqgv lvvgwb lengla yukul nyiilug otuqb pvvb uddum mam nyub tulungam jool wg mvtwl Jordonam rabdwb nyiknum,

¹⁵‍hoo xumk pirram Jordon ogumho jooc twqda kalam, hoo xumk pirram joon bo nyub tulug lvpiangv iss ho svmlwq kalam twqda (vly nvvd mood mwlwho Jordon pobungv bumda twqtwl doonum),

¹⁶‍odum hoqgv tolwl doonbo issiv tongngo tvl doonum hoo issiv olum daqrabnv aado kiyo Jaretan bviywrho doonbo Adam bopam namgub daqcanum, hoo Araba la Al Sa-svlob tolbo iss cigkam tol kumanum. Hoo nyiilungv Jeriko kvdaqb rabknum.

¹⁷‍Ho Israel nyi mwlwngv pwtw rwbw ko deelab nyob mwlwngv Jordonam robyum maady deedib, At Swg pvvb uddum mam joon bo nyub tulungv Jordon pobug pwtw ko deela ra lvpaho hwngkw jaqb daqya jinum.