Read Nyishi JOSUA 4 Bible Online

JOSUA 4 - Nyishi bible

JOSUA 4

¹Hwdlo nyob tulungv Jordonam robyum yukho, At Sw Josuanvn benum,

²“Nyob nyiilug vxy hoqgv nyega loq ak-akwb naag dvl camleq vnyi go naato,

³‍hoo bulam gaml jijo ywl begamv, ‘Nyub tulungv biimab lvpia doqdu ko Jordon pobu ura hoqgv wlw loq camleq pwnyi go naato, hoo hoq tulu ham nulug lvgab joolin lengto hoo nulv soi hogloq ho doonu tayin hoqho wlw tulu ham joopto.’”

⁴‍Ho Josua Israelwg nyiilug pengko hoqgv camleq vnyi go nyiingam goqnum, ho mwv nyob vxy hoqgv nyega ak-akwb xuqbwql xuqlinum.

⁵‍Hoo Josua bulam benum, “Nulug Pwnbo At Swg pvvb uddum otuqb Jordon pobu pengkob wco to, hoo Israelwg nyiilug hoqgv ak-akwb nulv nyiicwr-cwrxiv gorbw ho wlw loq pwg-pwgab joom to,

⁶‍ho hoqhv nulug pengko ho muxnam gob nyitayin. Hwdlo kokw moodam nulug ko tulungv tox tayin, ‘Hoggv yu soq wlw tulu soqg gon niqtuqkv?’

⁷‍ho nulv bulam betayin hwdlo At Swg pvvb uddum mam Jordon pobub joopeq yukho, issiv mwrpin sunum, ho Jordon pobu issiv tongngo tvl tomab doonum. Ho soq wlw tulu si Israelwg nyiilungam hoqg nyinam mam nwrba xaqb mwwpa mvtayin.”

⁸‍Hoo Israelwg nyiilungv Josua hoggub gaml jinam hvb bulv nyiknum hoo At Sw Josuanvn benam hvbjaq, Israelwg nyiilug nyob hoolu hwd kalam go Jordon ura hoqgv wlw camleq pwnyi naalayil jool wgnum. Hoo bulv ham joolayil bulv hogloq ho doonu kunum hoqho joop kunum.

⁹‍Hoo nyub tulug pvvb uddum mam jootwl daqk hoqgv Jordon ura hoqgv wlw camleq pwnyi go joolayil Josuag diidaqnamv soolo godab hoq tuluhv doodwn.

¹⁰‍Hoggab Mojes Josuanvn gaml jiknam hoqhvb ho At Sw Josuanvn nyiilungam gamlam betam mvdwb jinam hvb, xumk pirram joon bo nyub tulungv hog mwlwngv nyiyum maady deedib Jordon ra lvpa daqyanum. Nyiilungv nyebia jaqb pobungam rabnum

¹¹‍hoo hwdlo nyiilungv robyum yukam, At Swg pvvb uddum mam joon bo nyub tulungv nyiilug otuqb wconum.

¹²‍Reubenwg ko tuup tulungv hoo Gadwg ko tuup tulungv la Manasseg nyob papo gon bulam Mojesg betamnam hvb, nyob pan nanam mwx-mvaq tvl Israelwg nyiilug otuqb wco kunum.

¹³‍Jeriko lywpa ho nyob padwb mwx-mvaq bov, At Sw agaho 40,000 go daqlinum.

¹⁴‍Hoq aalho At Sw Josuanvn Israel nyi tulug kaagaho koijaqb xinam nyi gob mvnum, hoo bulv Mojesnvn hoggub modul swwnum hvbkalam nyiilungv Josuag swwnam bumpw ho bulv mwam modul swwnum.

¹⁵‍Hoo At Sw Josuanvn benum,

¹⁶“Xumk pirram joon bo nyub tulungam Jordon pobu ura hoqgv lvvgwb lengm dukun gaml jito.”

¹⁷‍Ho Josua nyub tulungam, “Jordon hoqgv lvvgwb lengt ku hvl gaml jinum.”

¹⁸‍Hoo At Swg pvvb uddum mam joon bo nyub tuluhv Jordon ura hoqgv lvvgwb lengknum, hoo nyub tulug lvpiangv ked pwtwho korlin kalam, Jordon pobu issiv lokta otuqho tocw hvb pobu sviyam ho issiv bwwr tvl tol wknum.

¹⁹‍Otuq poolwg looyw aalho nyiilungv Jordon hoqgv lengknum, hoo bulv Jeriko dou-cagag Gilgal ho svmcw mvl doonum.

²⁰‍Hoo bulug Jordon hoqgv wlw pwyw leq pwnyig joonam mam Josua Gilgal ho diidaql ap kunum.

²¹‍Hoo mwv Israel nyiilungam benum, “Hwdlo nulug ko tulungv bulug ab tulungam kokwngam tox baloqkam, ‘Hoggv yu soq wlw tulug niqtuqkv?’

²²‍ho nulug ko tulungam nulv cengm tayin, ‘Israel nyiilungv soq Jordon pobub ked pwtw ho wnam hvb pobungam rabknum hvl betam tayin.’

²³‍Hoggab nulug Pwnbo At Sw mwv Swlw Sa-svlongam pwtw dvb mvtwl ngul mwlwngam robyum mvnam hvb nulug Pwnbo At Sw Jordon pobungam pwtw dvb mvtwl nulam robyum mvnum,

²⁴‍ho At Swg alaq atornam mam swcw nvg nyiilu mwlwngam cengm dvb, ho nulug Pwnbo At Swn nulv nwrba gob bos tayin.”