Read Nyishi JOSUA 6 Bible Online

JOSUA 6 - Nyishi bible

JOSUA 6

¹Sija Israel nyiilungam haam mvma dvb Jeriko haaga toggoqkam ura bvla lvvgam mutuml apnum. Nyi akjijaqkam lvvgwb lengmanum, hoo akjijaqkam urab haamanum.

²‍Hoo At Sw Josuanvn benum, “Kaato, ngo Jerikongam la hoqg lvpw atam hoo nyob pvxbo nyi tulungam noqg alaqho jipa kun.

³‍Nulv bopam mam daayob sooiyeq tayin, nyob panbo nyi mwlwngv bopam mam aal lok sooiyeq tayin. Hoq hvb nyil no aal loox go nyitayin.

⁴‍Xumk pirr otuqb nyub kvn go yaap tvmwr vrrw hoqg mvnam tuuly kvn go jool wg mvto. Aalam kvn go, no bopam mam kvn kalam go daayob sooiyeq to, hoo nyub tulungam tuuliam miqm to.

⁵‍Hoo hwdlo bulv tuuliam oyu go miqyikam, nulv tuuly miqnam mam tapa tayin, ho nyiilu mwlwngv vcjaqb sogoq tayin, hoo bopamg bvliv tabto yaqp tayin, hoo nyiilungv caatayin, ho nyiicwr-cwrxiv mwwg haabo poqtaqb bopam urab haanam haatayin.”

⁶‍Hoqgab Nunwg ko tuup Josua nyub tulungam goqa nv hoo bulam benum, “Pvvb uddum mam joorabto hoo At Swg pvvb uddum otuqb nyub kvn go yaap tvmwr vrrw hoqg mvnam tuuly kvn kalam go jool wg mvto.”

⁷‍Hoo mwv nyiilungam benum, “Otuqb wto. Bopam mam daayob sooiyeq to hoo sipai tulungam At Swg pvvb uddum otuqb wco mvto.”

⁸‍hoo Josua nyiilungam gaml jinam jikjaqb, nyub kvn go yaap tvmwr vrrw hoqg mvnam tuuliam otuqb At Swg agaho miql wconum, hoq lvgab At Swg pvvb uddum mam jool wmin gvnum.

⁹‍Sipai tulungv tuuly miqn bo otuqb wconum, hoo nyub tulungv tuuliam miqngin maab miqdu dvkho xumk pirram jool wgnum, hoq kokwb rvky bo tulungv rvkil wnum.

¹⁰‍Hvbmabde Josua nyiilungam gaml jinum, “Hwdlo aalam ngo nulam sogoq goqto hvma deedib, nulv sogoq maabv, ho nulug yalam tapa mvmabv, ho nulug agam hoqgv kam gomcwr lengm mvmabv, hwdlo aalam ngo nulam sogoq tvk hvl betayin, ho nulv sogoq tayin.”

¹¹‍Hoqgab mwv At Swg pvvb uddum mam bopam ho aalam lok sooiyeq gvnum. Hoo bulv svmcwb wkurl ho aiyam svmcw ho doonum.

¹²‍Ho Josua ar komc ho gorabnum, hoo nyub tulungv At Swg pvvb uddum mam joorabnum.

¹³‍Hoo nyub kvn nv kvn go yaap tvmwr vrrw hoqg mvnam tuuliam jootwl At Swg pvvb uddum otuqb wconum, hoo tuuliam miqngin maab miqnum. Hoo sipai tulungv tuuly miqn bo otuqb wconum, hoo tuuliam miqngin maab miqdu dvkho At Swg xumk pirram jool wgnum, hoq kokwb rvky bo tulungv rvkil wnum.

¹⁴‍Hoo aal loonyi dvb bulv bopam mam lok daayob sooiyeqnum, hoo bulv svmcwb wkur kunum. Hoq hvb bulv aal loox go nyinum.

¹⁵‍Kvn aalho ar dooko koar-komar kalam bulv komc jaqb gorabnum, hoo aal loox hoq nyicwngam bopam mam kvn aalho lw-kvn go daayob sooiyeqnum. Hoq aal aro ho bulv bopam mam lw-kvn go daayob sooiyeqnum.

¹⁶‍Hoo lw-kvn deen ho, hwdlo nyub tulungv tuuliam miqyikun, ho Josua nyiilungam benum, “Sogoq to, hoggab At Sw bopam mam nulam jipa ku.

¹⁷‍Hoo bopam mam la hoqho doonbo mwlwngam At Sw twrkiq-twrmal twryum tayin. Meqjo bo Rahab la mwnwg namho mwnwg lvgab doonbo tulungv arongv swwl dootayin, hoggab ngulug mvqky-maqlam kanam kunam nyiilungam mwn kvsil ap jinum.

¹⁸‍Hvbmabde nulv, atv atam mucu-mviyanam dupum-dvrab hoqgv aado to, ho nulv hoq mucu-mviyanam dupum-dvrab pam naab nyiloqkam, nulv Israelwg svmcwngam twrkiq-twrmal twrm dvb la hoq aoho vs-axaq kam haam dvb baqa tayin.

¹⁹‍Hvbmabde rupam la hunam, hoo tamangam la yoqdwr hoqgv mvnam dupum-dvrab pv At Sw gab dvrwqdvn; hoq tulu ham At Swg gumn uddumb haam tayin.”

²⁰‍Ho nyiilungv sogoqnum, hoo tuuliam miqnum. Nyiilungv tuuly miqnam mam tapa kalam twqda, nyiilungv vc loodab sogoqnum, hoo bvliv tabtol yaqp kunum, ho nyiicwr-cwrxiv mwwg haabo poqtaqb wnum, hoo nyiilungv bopam urab haanv, hoo bopam mam naareq kunum.

²¹‍Ho lyoqr orioq lvgab bulv bopam hoqg doonbo nyega ge hoo nyem ge, anyo ge hoo akam ge, hvvb ge, sviya ge, hoo svdam ge mwlwngam twryumnum.

²²‍Hvbmabde gvdangam mvqky-maqlam mvnbo nyi vnyiam Josuanvn benum, “Meqjo bo nammwb wgdvl nulv hoggub mwnwn dingr kunam hvb, mwn nvla mwnwg namho doonbo dvparam boolin ta.”

²³‍Ho gvdangam mvqky-maqlam mvnbo yaapa vnyiv wknv Rahab nvla mwnwg abam la annam hoo vbw-boram la mwnwg dvparam boolin kunum. Hoo bulv mwnwg imiq nyi tulungam boolinum hoo bulam Israelwg svmcw lvvgho apnum.

²⁴‍Hoo bulv bopam mam la hoqho hog mwlw doon boam wm lvgab rampaq kunum. Hvbmabde rupam la hunam, hoo tamangam la yoqdwr mvnam dupum-dvrab pam At Sw namlog gumn gob pvvknum.

²⁵‍Hvbmabde meqjo bo Rahab la mwnwg ab hoqg imiq dvparam hoo mwnwg gumn-ranam Josua ywwlin jinum. Hoo soolo namgub mwn Israel ura lo swwl doodwn, hoggab hiyam Josua Jeriko gvdangam mvqky-maqlam mvm dvb kanam kunam mam mwn bulam svkal kvsil ap jinum.

²⁶‍Josua hoq moodho dingbnv begamv, “Jeriko bopam sam mvdar bo nyi akam At Swg agaho beeg yin. “Soqg gwwl sam lokta mvrabo nyi akwg otuqcob ko tuup bwwnamv sitayin, hoo soqg toggoq tulungam mvnbog mwwg ko tuup honyangv sitayin.”

²⁷‍Ho At Sw Josua lvgab doobanum, hoo gvda mwlwho mwwg eminv yuupy kunum.