Read Nyishi JOSUA 7 Bible Online

JOSUA 7 - Nyishi bible

JOSUA 7

¹Hvbmabde Israel nyiilungv mucu-mviyanam dupum-dvrab pam naama bvk hvl gaml jinam mam mvpianum, hoggab Judag nyob hoqgv Jera, Jerag hoqgv Jabdi, hoo Jabdig hoqgv Karmi, hoo Karmig ko tuup Akan, mucu-mviyanam dupum-dvrab meeg naal wgnum. Hoo At Sw vc loodab Israelwg nyiilug aoho hang lengl ceekonum.

²‍Dou-caga Betelwg, Bet-aben ogumho doonbo Ai gvdab, Josua Jeriko hoqgv nyi kanaml, hoo bulam benum, “Gvdangam wgdvl mvqky-maqlam mvta.” Hoo nyi tulungv wnv Aiyam mvqky-maqlam mvnum.

³‍Hoo bulv Josua dookub wkur kunv hoo bulv mwam benum, “Nyiilu mwlwngv wma jaqkam alv, hvbmabde lwwyw vnyi maalo oum gob nyi loq wgdvl Aiyam nyob pajaqkam alv. Nyiilu mwlwngam tolo hentwr dvb caama kam, hoggab bulv anyo deen.”

⁴‍Hoqgab 3,000 gob nyiilu hoqgv nyegangv wnum. Hvbmabde bulv Ai nyi tulug aga hoqgv xaal kenum,

⁵‍hoo Aiywg nyi tulungv bulug nyi tulungam cammum leq ax gob mengnum hoo bulam Sebarim toggoq namgub ruqmin gvl hoo bulam yorn i-ha ko ho mengnum. Nyiilug hangv hoxa kunum hoo iss hvb nyiknum.

⁶‍Ho Josua mwwg vjam puc tvl hoo mwv la Israelwg nyigbo tulungv ked namgub mwwg nyuqm mam, At Sw pvvb uddum agaho pvxw tvl ariyum namgub xuml doonum. Hoo bulug dumpo ho bulv diimwram toopup sunum.

⁷‍Hoo Josua benum, “Oa, Pwnbo At Swa, Amor nyi tulug alaqho jilwq tvl ngulam twryum mvdwb, hoggub no soq nyiilu sam Jordon kvtin so boorab pakun? Ngulv Jordon kvtin gonho doodwb xumt maan mviyv!

⁸‍At Swa, hoggv ngo beta yukun, hwdlo Israelv bulug ceebio tulug aga hoqgv bulv langkwb kikur yukun!

⁹‍Hoggab Kanaan nyi tulu ngvla gvda so doonbo mwlwngv ham tapa tayin hoo ngulam gooyum tai hoo ngulug eminam swcw soqgv nyiim taiku. Hoo noqg koibo emin gab no hoggv nyitayukun?”

¹⁰‍At Sw Josuanvn benum, “Gorab to! Hoggab noqg nyuqm mam no ked ho pvxw dvn?

¹¹‍Israelv nyic nyipa ku; ngo bulam gaml jinam mam bulv daapo lwqpa ku; mucu-mviyanam dupum-dvrab pam bulv naapa ku; bulv dvco paku hoo vmv paku hoo hoq tulu ham bulug atwg dupum-dvrab pengko ho ap paku.

¹²‍Hoqgab Israel nyiilungv bulug ceebio tulug agaho daqnyi kumanum. Bulug ceebio tulug aga hoqgv bulv langkwb kikur duku, hoggab bulv twrdy ko pagoq ho haagab jaqb nyipa ku. Nulv mucu-mviyanam dupum-dvrab pam nulug pengko hoqgv twryum maady deedib, ngo nulug lvgab doonyiram.

¹³‍Gorab to! Nyiilungam garxaq gvdwl hoo beto, ‘Aaram mam nulv atv atam garxaq suto; hoggab soq sib Israelwg Pwnbo At Sw bedo, “Israela nulug pengko hv mucu-mviyanam dupum-dvrab pv doodo. Nulug pengko hoqgv mucu-mviyanam dupum-dvrab pam naapaq maady deedib nulug ceebio agaho nulv daqnyi ram.”

¹⁴‍Hoqgab aaram mam nulam nyob hoolu hoolungam ogumb boonwq tayin. Hoo hiyvg hoolungam At Sw tak cinglin tayin hv ogumb hvvnwq tayin. Hoo hiyvg nyobam At Sw tak cinglin tayin hoqg imiq dvparv ogumb hvvnwq tayin. Hoo hiyvg imiq dvparam At Sw tak cinglin tayin hoqg nyiip-nyiipv ogumb hvvnwq tayin.

¹⁵‍Hoo hiyv mucu-mviyanam dupum-dvrab pam naan boam mwam la mwwg doognam hog mwlwngam wm hoqgv partayin, hoggab mwv At Swg birnam pvvbam pvvb juqbo paku, hoo mwv Israel nyiilu gab al looda maanam nyipa kun.’”

¹⁶‍Hoqgab Josua ar komc gorab laikul hoo Israel nyob hoolu-hoolungam ogumb hvvnwq mvnum, hoo Juda nyob hoolungam goqa col haamnum.

¹⁷‍Hoo mwv Juda nyob hoolungam ogumb boanum, hoo Jerahait nyi tulungam goqanum. Hoo mwv Jerahait nyobam ogumb hvvnwq mvtwl nyiip-nyiipam goqnum, hoo Jabdinvn goqknum.

¹⁸‍Hoo mwwg imiq dvparam nyiip-nyiipam ogumb hvvnwq mvnum, hoo Judag nyob hoolu hoqgv Jera, Jerag kov Jabdi, Jabdig kov Karmi, hoo Karmi ko tuup Akannvn naaknum.

¹⁹‍Hoo Josua Akannvn benum, “Ngoqg ko, Israelwg Pwnbo At Swn yuunam mam jito hoo mwam paqnam mam jito. Hoo ngam sija betam to hoggv no nyipa kun; ngam vcwr gokam kvs maabv.”

²⁰‍Hoo Akan Josuanvn birwqnum, “Jvqtw jaqb Israelwg Pwnbo At Swn ngo ceekol nyic nyipa ku, soq sib ngo nyinum:

²¹‍hwdlo ngo nyob pal naareqnam pengko hoqgv kangam albo Sinar hoqg kamt rumg, hoo rup lwwnyi sikil go, hoo hun beqnyia 50 sikil vgw gob kaapa yin, ho ngo hoq tulu ham kaabynv hoo naanum. Hoo kaato, hoq tulu ham ngoqg tombu urag kedho rup lvgab liitaql ap pan.”

²²‍Hoqgab Josua nyi pui baqnbo tulungam kanamnum, hoo bulv tombub xarnum; hoo kaato, hoqhv mwwg tombu uraho rup lvgab liitaq tvl doonum.

²³‍Hoo bulv hoq tulu ham tombu hoqgv naalin layil hoo bulv ham Josua gvla Israel nyiilug dookub baqanum. Hoo bulv ham At Swg agaho joopwl apnum.

²⁴‍Hoo Josua la Israel nyiilungv mwwg lvgab Jerag ko tuup Akannvn la rupam hoo kamtam hoo hun beqnyiangam, hoo mwwg ko tuup tulungam hoo nyem ko tulungam hoo mwwg hvvbam hoo svdam tulungam hoo sviyangam hoo mwwg tombu ho hog mwlw doognam mam naalinum. Hoo bulam bulv Akor Lywpa namgub boa kunum.

²⁵‍Hoo Josua benum, “Hoggab no ngulam vs-axaqkam baqanum? Soolo At Sw noqg aoho vs-axaqkam haam pakun.” Hoo Israel nyi mwlwngv wlw hoqgv mwam hurx kunum. Bulam bulv wm lvgab rampaq kunum hoo bulam wlw hoqgv hurx kunum.

²⁶‍Hoo soolo gob dooda daqdwb mwam hurn kunam wlwngv koijaq olum paaca tvl doodwn. Ho At Sw mwwg hang lengnam hoqgv lengngin kunum. Hoqgab soolo godab hoq nyook ham Akor Lywpangv hvl emin goqdwn.