Read Nyishi JOSUA 8 Bible Online

JOSUA 8 - Nyishi bible

JOSUA 8

¹Hoo At Sw Josuanvn benum, “Bos maabv hoo hang homabv. Gorab to, nyob palaqbo nyi tulungam boolayil, Aiyib wto. Kaato, Aiyig lvpw atam, hoo mwwg nyiilungam, mwwg bopam, hoo mwwg gvdangam, noqg alaqho jipa kun.

²‍Hoo no Aiyam la hoqg lvpw atam Jerikongam la hoqg lvpw atam mvnam hvb mvtayin. Soq mood so nulv nyob pal naareqnam gumnam la hoqg tuun-meengam nulv atv nulgab naareq tayin. Langk daiya ho bopam mam ceeko dvb tooiyal dooto.”

³‍Hoqgab Josua la nyob palaqbo nyi tulungv Aiyib wrabnum. Hoo Josua 30,000 go nyob pvxwl paky bo tulungam xuqlinv aiho bulam kanam conum.

⁴‍Hoo mwv bulam gaml jinum, “Kaato, bopam langk ho nulv ceeko dvb tooiya tayin. Bopam hoqgv aado jaqb wggin maabv, hvbmabde nul mwlwngv mwx-mvaq tvl dooiya ta.

⁵‍Hoo ngo la ngoqg lvgab dooba bo nyiilungv bopamb hvvnwq tayin. Hoo ngulv bulug aga hoqgv kikur tayin, hwdlo bulv otuqg nyinam hvb ngulam ruqmin gvtayin.

⁶‍Hoo bulv ngulug kokwb ruqmin gvl bopam hoqgv vigo aado namgub ruqtayin. Hoggab bulv betayin, ‘Bulv otuqg kenam hvb ngul hoqgv ken kuba.’ Ho ngulv bulug agaho ketayin.

⁷‍Ho nulv tooiyal doop peel hoo bopam mam naareq tayin, hoggab nulug Pwnbo At Sw bopam mam nulug alaqho jilwq tayin.

⁸‍Hoo bopam mam nulv naareq kalam twqda, nulv bopam mam wm rwlwq tayin. Nulv At Swg gomcwr benam hvb nyitayin. Kaato, ngo nulam gaml jipa kun.”

⁹‍Ho Josua bulam kanam namlinum. Hoo bulv tooiya ko nyook Aiyig dou-haaga daiya Betel gvla Ai pengko ho wknum, hvbmabde Josua hoq aiho nyiilug pengko ho doonum.

¹⁰‍Josua ar komc gorab layil hoo mwv la Israelwg nyixa tulungv, hoo nyiilungam goqkum layil, Ai nyiilug agab wrabnum.

¹¹‍Hoo mwwg lvgab nyob palaqbo nyi tulungv bopam ogumb hvvnwq mingnum hoo Aiyig nyoodum daiya ho svmcw mvl doonum, ho bul gvla Ai pengko ho bwdw dwqa haqg doopeqnum.

¹²‍Mwv 5,000 gob nyiam xuqlinum hoo bulam Betel gvla Ai pengkog dou-haaga daiyag bopam ho tooiya mvdwb apnum.

¹³‍Hoqgab sipai tulungam bookuml apnum, bulug svmcw koi boam bopamg nyoodum daiya ho doomnum hoo rvky bo tulungam dou-haaga daiya ho doomnum. Hvbmabde Josua hoq aiho lywpa ho doonum.

¹⁴‍Hoo Aiyig lvpw atv bulam kaapa kalam twqda, mwv la mwwg nyiilu mwlwngv, ho bopamg nyega tulungv nyebia jaqb nyob pak nyookam Araba daiya ho xuqlinl Israel nyiilungam nyob patab wnum. Hvbmabde mwam ceeko dvb bopamg langk daiya ho sipai tooiyal doonam mam mwv cengmanum.

¹⁵‍Hoo Josua la Israel nyiilungv bulug agaho bulam bulv mviya pakbo mwwm dvb nyik-nyimaqnv hoo bulv deexa-rara gvda daiyab kenum.

¹⁶‍Hoqgab bopam ho doonbo nyiilu mwlwngam lvkin gob goqkum layil, hoo bulv Josuanvn ruqmin gvnv bulv bopam hoqgv aadob wknum.

¹⁷‍Ho Ai hoola Betel ho nyega akkam Israelam ruqmin gvtab wma bo doomanum. Bulv bopam mam ciqko peel Israelam ruqmin gvnum.

¹⁸‍Ho At Sw Josuanvn benum, “Noqg alaqho nwwxongam Ai daiyab tuugab to, hoggab ngo Aiyam noqg alaqho jitayin.” Hoo Josua mwwg alaqho nwwxongam bopam daiyab tuugabnum.

¹⁹‍Hoo Josuag alaqkv irabl bopamb tuugab kalam twqda, tooiyal doonbo nyiilungv bulug dook hoqgv nyebia jaqb xarnv bulv bopam urab haanv hoo ham naareq kunum. Hoo bulv nyebia jaqb bopam mam wm tolwqnum.

²⁰‍Hoqgab hwdlo Ai nyi tulungv langkwb kookur yin, kaato, bopam hoqgv wm mwkv doa aoho juuc kunum, hoo bulv taqg-loosaqb kedwb huqlw dook maanum, hoggab deexa-rarab kenbo nyiilungv bulam ruqmin gvnbo tulungam tobkur nyob pvrwq kunum.

²¹‍Hoo hwdlo Josua la Israel mwlwngv kaaknamv tooiya bo nyiilungv bopam mam naareql hoo wm pvrlwq tvl wm mwkv doa aoho juucanam mam kaapa yikho, ho bulv tobkur kunv Ai nyi tulungam mengnum.

²²‍Hoo bopam taqc ho yvnbo tulu hvvkam bulam mengnum, ho bulv Israel nyi tulug pengko doonum, ho bulam taqg-taqsaqb doqyum kunum. Hoo Israelv bulam akjijaqkam kelin mvma dvb mingtwrnum.

²³‍Hvbmabde bulv Aiyig lvpw atam tordwb nootu layil mwam Josua dookho boanum.

²⁴‍Hwdlo Israelv lyoqr orioq hoqgv bulam ruqmin gvnbo Ai nyi tulungam akam ge hoo anyo ge deexa-raraho mingyum peel, mwlw Israel nyiilungv Aiyib wkurnv lyoqr orioq hoqgv bulam mengnum.

²⁵‍Hoo hoq aalho nyem-nyegab Ai nyi tulungam mengnamv 12,000 go.

²⁶‍Hvbmabde Josua mwwg alaqho nwwxongam Aiyam twrkiq-twrmal twryum maady deedib mwv tuugab tvl doodunum.

²⁷‍Israel nyiilungv bopam hoqgv nyob pal naareqnam dupum-dvrab pam la tuun-meengam arongam At Swg gomcwram Josuag gaml jik jaqb bulv naareql naanum.

²⁸‍Ho Josua Aiyam wm parpaqnum hoo hoqham nwrba gob mui olum gob mvknum, hoqhv soolo godab doodwn.

²⁹‍Hoo Aiyig lvpw atam svvn ho mwv ariyum namgub paqyinl apnum. Hoo doonyiv haata yukho, Josua gaml jitwl bulv mwwg svmangam naapoq layil bopamg haagag toggoqho joop tvl hoo hoq aoho koi jaqb wlwngv paataml apnum, hv soolo godab daqdwn.

³⁰‍Hoq moodho Josua Ebal Puutu ho Israelwg Pwnbo At Sw gab yugw ak mvnum,

³¹‍At Swg nyera Mojes Israel nyiilungam gaml jinam hvb nyiknum, Mojes Pvvb Kitap ho hvl xeqpnum, “Alaq hoqgv yoqdwr lvgab wlw taqlin maanam wlw yugw ak mvtayin.” Hoo hoqho At Sw gab boyuqnam akiam jitayin hoo swrso pwr akiam jitayin.

³²‍Hoo hoqho Israel nyiilug kaagaho Mojesg pvvb xeqpnam ham, mwv wlw aoho xeqpnum.

³³‍Hoo At Swg nyera Mojes otuq jaqb gaml, Israel nyiilungam lvqc cil benum hvb, Israel nyi mwlwngv, nyoodo nyi ngvla nyiidub ko bwwnamv, bulug nyigbo tulu ngvla, bulug nyegam bo tulug papo gon Gerijim Puutu ho hoo papo gon Ebal Puutu ho, Lebi nyub tulug hiyv At Swg pvvb uddum joon bov hulu agag daqnum.

³⁴‍Hoo hoq kokwb Pvvb Kitap ho xeqp kunam lvqcam la beenam pvvb gomcwr tulungam poory reelinum.

³⁵‍Ho bulug pengko doonbo nyem tulug pagoqkam, hoo ko anyo tulug pagoqkam, hoo nyoodo nyi tulug pagoqkam, Mojesg gaml jinam gomcwram, Josua Israelwg hookum ko pengko ho akkam poory riyum maab poory jinum.