Read Nyishi JOSUA 9 Bible Online

JOSUA 9 - Nyishi bible

JOSUA 9

¹Jordon lvvg ho doonbo diisw gvda gvla Koibo Sa-svlo soiyoqg haapa hoqgv Lebanon namgub gvda doonbo Hittait nyi tulug, Amor nyi tulug, Kanaan nyi tulug, Perijj nyi tulug, Hibitait nyi tulug, hoo Jebus nyi tulug lvpw at tulungv ham tapa kalam twqda,

²‍bulv maqkin gob nyil Josua nvla Israelam ceekol nyob padwb lvkin gob hookumnum.

³‍Hvbmabde hwdlo Gibeon ho doonbo nyi tulungv, Josua hoggub Jerikongam la Aiyam nyinam mam tapa tvl,

⁴‍bulv bulam surjaqb dvs-twwsam mwx-mvaqnum hoo paceq-paiyeqbo tuila vjam bulug svdam tulungam koomnum, hoo vpin pinguqkam la paceq-paiyeq dvb hamnam mam gvmnum,

⁵‍puceq-puiyeq bo samtaq nanam bulug lvpia ho gvnum, hoo paceq-paiyeq bo vjam bulv koonum. Hoo bulug dvs-twwsam sengkuq-sengraq mvnum.

⁶‍Hoo bulv Josua dookub Gilgal svmcwb wnum hoo mwam la Israel nyiilungam benum, “Ngulv aado gvda hoqgv haai kun, hoqgab sija ngulug lvgab pvvb birnam loq mvtbv.”

⁷‍Hvbmabde Israel nyiilungv Hibait nyi tulungam benum, “Nulv ngulug pengko si doodo; hvnyiloqkam hoggab ngulv nulug lvgab pvvb birnam mam mvtayin?”

⁸‍Bulv Josuanvn benum, “Ngulv noqg nyera tulungv.” Hoo Josua bulam benum, “Nulv hiyv? Hoo nulv hogloqkv haai yin?”

⁹‍Bulv mwam benum, “Noqg nyera tulungv aado gvda hoqgv haai yin, hoggab noqg Pwnbo At Swg emin gab haai yin. Hoggab Ijipt ho mwwg hog mwlw nyinam mam, ngulv mwwg puiyam tapa paku,

¹⁰‍hoo Jordon lvvg alo Astarot ho doon boam, mwv hoggub Amor lvpw at vnyiam, Hesbonwg lvpw at Sihonnvn la Basanwg lvpw at Ognvn nyiknam mam tapanum.

¹¹‍Hoqgab ngulug nyiixa tulu ngvla ngulug gvdaho doonbo nyi mwlwngv ngulam benum, ‘Dvs-twws baqlayil nyiody bog dvl nulam kvvrwq taak hvl ngulam bilwqnum, “Ngulv noqg nyera tulungv. Kv sija, ngulug lvgab pvvb birnam mam mvtbv.” ’

¹²‍Si ngulug wtwngv. Hwdlo ngulv ngulug nam hoqgv nyiody boorab yukho raab og xiqdwb baqlayil noqg dookub wgnum, hvbmabde, sija kaato, hoqhv sengkuq-sengraq paku.

¹³‍Soq vpin yooxaq tulu sam nit dvb ngulv twws pwlwql baqnum, hoo kaato, sija hoq tuluhv buqc paku. Hoo soq vjam tulu sam la samtaqnan tulu si ngulug nyiody bogam gab xuul nyapa kun.”

¹⁴‍Hoqgab nyi tulungv bulug dvs-twwsam mee naanum, hvbmabde At Swn tomswr-honynam mam taka maanum.

¹⁵‍Hoo Josua bulug lvgab swrsob dood bvla swrsob doom dvb hvl pvvb birnam mam bulug lvgab pvvb mvknum, hoo nyi tulungam nyigbo tulungv bulam dingr jiknum.

¹⁶‍Bulv bulug lvgab pvvb birnam mam mvxo tvl aal loum kokw so bulv tapa kunamv bulv bulug door-doopw gob la bulug pengko ho doonbo nyi tulu gob tapa kunum.

¹⁷‍Hoo Israel nyiilungv wrab kunv bulug bopam tuluho aal loum deen ho wc kunum. Ho bulug bopam tuluho Gibeon, Kepira, Beerot, hoo Kiriat-jearim nyi tulungv doonum.

¹⁸‍Hvbmabde Israel nyiilungv bulam nyob pamanum, hoggab nyi tulungam nyigbo tulungv Israelwg Pwnbo At Swg emin ho bulam dingr jiknum. Ho nyigbo tulungam nyi tulungv ceekol budum-bvram jabnum.

¹⁹‍Hvbmabde nyi tulungam nyigbo tulungv benum, “Israelwg Pwnbo At Swg emin ho ngulv bulam dingr jipa kun, hoqgab sija ngulv bulam alaq idaq dvb nyikma.

²⁰‍Soq sam ngulv bulam nyitayin: bulam swwl doom to, hvbma baloqkam hang lingtwrnamv ngulug aoso haatayin, hoggab ngulv bulam dingr jiknum.”

²¹‍Hoo nyigbo tulungv bulam benum, “Bulam swwm to.” Ho bulv Israelwg nyiilu gab wsw paiya jinbob la iss bwiya bob nyiknum, bulam nyigbo tulungv bek jaqb nyinum.

²²‍Josua bulam goqkumnum, hoo bulam mwv benum, “Hoggub nulv ngulam xaalyo lyopaql begamv, ‘Nulv ngulug pengko si dootwl,’ hoggab nulv aado hoqgv haai yin hvl ngulam benum?

²³‍Hoqgab sija nulam beepa kun, hoo nulug nyi tuugin nywywngam hog akkam dooram hvbmabde ngoqg Pwnbog namlo ho nyera akwb nyitwl wsw paiya jinbob la iss bwiya bob nyitayin.”

²⁴‍Bulv Josuanvn birwqnum, “Noqg Pwnbo At Swg mwwg nyera Mojesnvn gaml jil begamv soq gvda sam nam jitayin hoo gvdaho doonbo nyi mwlwngam twryum tayin hvnam mam, noqg nyera tulungam ngulv tapa kunum—hoqgab ngulv ngulug swwgam vc looda bosnum nulug haagam gab hoo soq sam nyiknum.

²⁵‍Hoo sija, kaato, ngulv noqg alaqho dood kun. Hoggv noqg kvvlwq dvb al dvb noqg kaagaho ngulam nyin nwwdwn, ham nyin to.”

²⁶‍Hoqgab mwv bulam soq sam nyij kunum hoo bulam Israel nyiilug alaq hoqgv ywwlinum hoo bulam bulv mengmanum.

²⁷‍Hvbmabde Josua bulam nyiilu gab wsw paiya jinbob la At Swg yugw gab iss bwiya bob swwm kunum, hoqgab soolo aal namgub At Swg xumdwb xuqlin ko nyookho bulv bon nyil doodwn.