Read Nyishi 2 TISSOLONIKA 1 Bible Online

2 TISSOLONIKA 1 - Nyishi bible

2 TISSOLONIKA 1

¹Poul, Silas hoo Timoti galoqkv Tissolonika dvrwq namlo ho hiyv ngulug Ab Pwnbo hoo At Sw Jisu Kristo gab doodwn hoq nyi tulu gab—

²Ngulug Ab Pwnbo hoo At Sw Jisu Kristo nulam anyangam la swrsomalongam jignvka.

³Ngulug vbw-bor tulu, nulgab Pwnboam ngulv looxiam paqdwb nyido. Soq si ngulug nyidynamv, hoggab nulug mwwjwnamv koi alwb swwrab paku, hoo nulug pengko lo akwn akwn aby bomin sunamv koi yaiya paku.

⁴Hoqgab ngulv atv nulug hog mwlw mvnyi-mviyanam mam, hentwram hindul cwql doodo, hog mwlwngam cwqk gab hoo mwwjw ko-gab ngulv Pwnbog dvrwq namlo lo nyi tulug agaho nulam paql doodwn.

⁵Soq mwlw si Pwnbog pw-hwwnamv jvqtwngv hvl kaakin dvn, hoo soq pagoq gab nulv Pwnbog lvpwngam kaapa tayin hvl si kaakin dvn, soq gab sulak nulv hentwram hendwn.

⁶Hognvkv aldvn ham Pwnbov nyitayin. Nulam hentwr hem dvb jinbo nyi tulungam mwv bulam ree daqtayin,

⁷hoo mwv nulam hentwr henbo tulungam doonu mvdwb jitayin, hoo ngulam kam xitayin. At Sw Jisu ao gvda toloqgv mwwg ator albo ao gumtw tulug lvgab lengtayin ho,

⁸wm moilib bioql Pwnboam kaacin maanbo tulungam la At Sw Jisu Kristog Tugu Pui pagoqkam tvjw maanbo nyi tulungam mwv laqm-baqm tayin.

⁹Mwv mwwg dvrwqbo nyi tulug galoqkv mwam paqktab hoo mwam mwwjwbo nyi tulu galoqkv xumktab ipoq yukam,

¹⁰Pwnboam kaacin maanbo hoo At Jisug Tugu puiyam tvjw maanbo nyi tulungv nwrba cwtam gob Pwnbog ator yuunam hoqgv bulam aadob mvxia tayin hoo nwrba cwtam gob sipaq mvdwb jitayin.

¹¹Hoqgab ngulv looxiam nulgab xuml doodwn. Ngulug Pwnbov nulam dvgoq goqnam mam niqtuq lengm dvb jitka hvl hoo nulug hang mwwbynam mam hog mwlw alboam hoo mwwjwl bonam nyinam mam niqtuq nyilin mvdwb jignvka.

¹²Soq sib nyil nulug uraho ngulug At Sw Jisu Kristog eminv koi alwb yuunka hoo nulamkam mwwg galoqkv ngulug Pwnbog At Sw Jisu Kristog anyangv nulam yuutaq gvnka.