Read Nyishi 2 TISSOLONIKA 2 Bible Online

2 TISSOLONIKA 2 - Nyishi bible

2 TISSOLONIKA 2

¹Ngulug vbw-bor tulu, ngulv nulam xuml At Sw Jisu Kristog haadynam pagoqkam hoo ngulug mwwg ogumho olum gob hookumko bvrwqngam bedwn.

²At Swg haad Aalv wnwq pakun hvl nulug hangv akukam biimab, loomab, ho yalwg bekgab, ho ngulug agam mvk hvl bekgab, ho ngulug pota xeqnam mvk hvl bekgab, nulug hangv biimab ho mwwkwq-svqwq maab.

³Kristog haad Aalv haapa ku hvl hiyv nvkam nulv hoggub nyilakam vm mvvxa komab, hoggab otuqcob ui nyookub idybo Almanbo Akv, dormongam ximabo akv mwwg dwr nyitwram nyima daab hoq Aalv haaram, mwv mwlwngam ceebio baqnbov.

⁴Mwv atv mwlwngam koi yaanbo gob xil, atam pwnbovk hvl xumdynam akvk hvl betayin. Ho mwv hvb nyitwq ram, hvbmabde mwv Pwnbog namlo urab haal hoq uraho dootwl atam pwnbovk hvl bikub tayin.

⁵Nulv mwwgab kuma i? Ngo nulug lvgab lokub doodwkho nulam soq mwlw agam sam bekinnum.

⁶Ho sam nyim mvma dvb hognvkv nootul apdvn ham nulv cengdo. Mood jaqkam hoq Almanbo Akv lengtayin.

⁷Hvbsujaqkam hoq Almanbo Akv sijakam mwv urab nyis-nyipeql kvsil nyidul doodwn, hvbmabde mwam nootul apbo akam naaxa maady deedib mwv kvsil bonam nyidul dootayin, ho mwwg nyidynam jaqkam nyilaram.

⁸Hoq kokwb hoq Almanbo Akv lengtayin, hvbmabde At Sw Jisu haaikukam mwam Jisug agam saqnam saqlinam dooiyv mengtayin. Hoo mwwg lvlaqkv mwam mvqmwq-tvkwq dvb mvtayin.

⁹Ho hoq Almanbo Akv uiyig atoram naalayil haatayin hoo vm xaalyob swrdorxeqb nyil luuxy deedib nyil kaakin tayin,

¹⁰hoo luuxy deedib vm xaalyob nyiknv nyi tulungam nyil kaakin tayin. Hoggab bulv yuutayin, hv bulv ywwk dvb hvl jvqtwngam mwwjwl aby bol svgagvrwq maanum.

¹¹Hoqgab Pwnbov almab nyimurnam atoram bulug hang uraho jilwqtvl bulam xaalyonam mam mwwjw tayin.

¹²Jvqtwngam mwwjw maanbo nyi tulungam, hvbmabde nyic nyiklo hwnyir boam sig bwdwb paqgeq lotayin.

¹³At Sw Jisug aby bonam vbw-bor tulu, nulgab ngulv Pwnboam looxiam paqky dvb nyidku. Nulam mwwg dvrwqbo nyi tulub mvdwb Dvrwqbo Yalv otuqjaq hoqgv nulam ywwdkub nulug jvqtwngam mwwjwnam mam kaatwl xuqlin ap pakun.

¹⁴Pwnbov nulam ngulug tugu pui bekin kunam lvgab goqpa kun ho nulam ngulug At Sw Jisu Kristog yuunam gumnam naaba mvdwb mwv nulam dvgoq goqpa kun.

¹⁵Hoqgab ngulug vbw-bor tulu, nulv haakam jaqb biimab, hoo ngulv nulam tomswr dvkho, ho Tugu Puiyam bekin dvkho pota xeql tomswrl bekinam jvqtwngam hindib hengabl mwlwngam doogto.

¹⁶Sija ngulam aby bonbo ngulug At Sw Jisu Kristo hoo ngulug Ab Pwnbov mwwg anyangam ngulam nwrba cwtam biimabo haakam nan hoo mwwgw nan hangam jitka,

¹⁷ho nulam looxiam albo bonam la albo agam mam bel swwm dvb ator tormin gvl biywr gvnka.