Read Nyishi 2 TISSOLONIKA 3 Bible Online

2 TISSOLONIKA 3 - Nyishi bible

2 TISSOLONIKA 3

¹Ngulug vbw-bor tulu, bitwr jaqb, ngulug pengko lo hoggub nyil At Swg puiyv nyory alwb haanum, hoq hvbkalam nyebiab puiyam yuupw mvdwb hoo xil nyi tulungam naamdvb ngul gab Pwnboam xumto.

²Nyi almanbo hoo swrdornyi bo nyi tulug alaq hoqgv ngulam Pwnboam naalin mvdwb kam xumto; hoggab nyi mwlwngv Tugu Puiyam tvjw maadwn.

³Hvbmabde At Swn mwwjw dvb nyidwn, mwv nulam ator jitayin hoo Almanbo Ak hoqgv nulam cuml swrsob rvkil aptayin.

⁴Hoo At Sw nulam bos mvmab haakamnan atoram jignvka, hoo nulam ngulug nyitwk hvl benam gamlam nulv nyidu dvnbo hoo nyidul dooky tai nvbo hvl nulam ngulv mwwjwdvn.

⁵At Sw nulam vigo Pwnbog abynam mam cengm dvb hoo Kristog jinam cwqnan atoram pwbwb cenglaq mvdwb svka gvnka.

⁶Ngulug vbw-bor tulu, ngulv nulam ngulug At Sw Jisu Kristog eminlo gaml jil bedwn, hiyv vbw-bor gon jaama sepil swwdwn hoo ngulug tomswrnam mam tal swwma dvn hoq nyi tulu hoqgv aado to.

⁷Nul mwlwngv atv hindy jaqb cengdo, ngulv hognvkv nyipan ham nyidwb doodwn hvl nulv cengdo. Ngulv nulug lvgab lokub doodwkho ngulv jaama sepil nyimanum.

⁸Hvbmabde ngulv nulug hiyv galoq gvkam hog nyimab dvnyib dvmanum, hvbmabde ngulv aal aiyib moomma jaqb bonam nyil kwrwb nyinum, hoqgv nulam hiyv nvkam mwwdwq mvdwb jimanum.

⁹Ngulv soq nyinam sam nulug galoqkv svka kaaiyin mvtwl nyinum hvbma, hvbmabde ngulv sam nulam bon nyikin gvdwl kaakin dvb ho nulam kaagwl nyim dvb nyinum.

¹⁰Ngulv nulug lvgab lokub doodwkho ngulv nulam benum, “Hiyv bonam mwwram dvn mwam dvdwb jimab.”

¹¹Ngulv sam hoggab bedwn, ngulv nyurungv tapanamv nulug pengko hv nyi tuugin jaama mal hogjaq nyimab nyi asaqg nyinam yaangam dvkarl yvnbo nyi tulug pui go tapa do.

¹²At Sw Jisu Kristog eminlo ngulv gaml jil soq nyi tulu sam yvtw padwn, bulv hingkib nyil kwrwb atwg dvsam door twnwrsul dvl swwtwk hvl bedwn.

¹³Hvbmabde vbw-bor tulu, nulv albo bonam nyidwb nyiram nyixam gob mwwmab.

¹⁴Nulug pengko lo ak vnyi go nulug soq pui pota xeql jinam pui sam tama bovkam doodnvp, hvk nyi ak dood nyiloqkam, mwam kaagabto hoo mwwg lvgab nulv hog gokam nyibam wbam maabv, ho mwv hvnyw tayin.

¹⁵Hvbsujaqkam mwam ceebio hang baqmab, hvbmabde mwam vbw-bor gob mwwg dvl yvtw pato.

¹⁶Sija swrsomalongam doogbo At Sw nulam swrsomalongam looxiam nyitaq mwlwho jignvka. Nul mwlwg lvgab At Sw dooba nvka.

¹⁷Soq salam jinam sam Poul ngo atv ngoqg alaqngv xeqs pan. Pota tvqxiam ngoqg xeqnam mam soq sib kaacin dvb mvgdvn, soq si ngoqg xiqcwngv.

¹⁸Ngulug At Sw Jisu Kristog anyangv nul mwlwg lvgab dooba nvka.