Read Nyishi 1 TIMOTI 1 Bible Online

1 TIMOTI 1 - Nyishi bible

1 TIMOTI 1

¹Ngulam ywwnbo Pwnbog gaml gab xuqnam, ngulug hingwnam Jisu Kristog Poul galoqkv—

²Mwwjwko lo ngoqg jvqtw ko tuup Timoti gab; Pwnbo Ab hoo ngulug At Sw Jisu Kristog anyangam, ayanam mam la swrsomalongam nulam jignvka.

³Ngo Mesidoniyab wdwkho nulam Ipisiho doogdvl tomswr swrxiaqbo nyi tulungam alman boam tomswr maabwk hvl bulam no biturto.

⁴Bulug almanbo xaalyo bo gonam ho aaso albo ab ann nwd gonam bel dooma bvk hvl beto, hoggab hoqhvk gonv yolu bepa dvn, ho haqyaqmins nagub nyidwn. Hoqkv Pwnboam mwwjwnam bvrwqho hog niqtuq dooma dvn.

⁵Soq gaml jinam si abynam mam, dvrwqb mwwdynam mam hoo hvvjwg mwwjwnamv hang dvrwqb mwwnbo lengdwn hvl tomswrto.

⁶Nyi tuugin soq sam apaqpel goos maaiyam goobnv gaqxar nukun.

⁷Bulv Pwnbog pvvbam tomswr bogub nyidwb mwwdwn; hvbmabde bulv hognvkv begdvn ham atwg agam benam mam mwwcin maadwn ho mwwjw suma dvn,

⁸Pvvb bekjaqb nyib nyiloqkam pvvbv aldvn ham ngulv cengdwn.

⁹Hvbmabde soq sam mwwgab dvb nyidwn, pvvb torab pam nyi albo gab mvma pan, hvbmabde pvvbam tama bo gab, pvvb juqbo gab, dormo nyiib nyimab at ab annam meng boam hoqgv sony mengbo nyi tulu gab,

¹⁰yocu-yabio nyinbo gab, dvcobo nyi gab, xaalyo bo gab ho vm mvvl benbo gab ho albo tomswrnam mam nyimab oksub nyinbo nyi tulu gab sulak.

¹¹Soq tulu si anyabo yuunam Pwnbov ngam nyia koam bekin tvk hvl jinam Tugu Puiho doodwn.

¹²Ngam bon nyim dvb ator jinbo At Sw Jisu Kriston ngo paqdwn. Ngo otuqho kol mwam bec-beyal almab besbakam, mvnyi-mviyal mvsbakam ho bej beparl besbakam mwv ngam xinam gob mwwgam gab la mwwg bonam nyim dvb xuqgam gab ngo mwam paqdwn.

¹³Hvbsujaqkam Pwnbov ngam ayanum, hoggab ngo mwam mwwjw maanum; hoqgab ngo hognvkv nyidunum ham ngo atv cengs maanum.

¹⁴Kokw so ngulug At Sw mwwg anyangam ngoqg aosi yoqpup tukul ngulug Jisu Kristog mwwjwngam la abynam mam ngam jinum.

¹⁵Jisu Kristo nyic nyin boam ywwtab gvda gvtwb haanum hvl benam si jvqtw jaqb tvjw dvb la mwwjw dvb nyipan. Ngo bulug pengko hoqg mwlwjaqkam almanbov.

¹⁶Hvbmabde Pwnbov mwlwjaqkam nyic nyinbo nyiingam mwwg ayangam kaakinam si Jisu Kristo mwwg cwqnam mam ngam kaakin dvb, ho kol godab mwam mwwjw boam nwrba cwtam swwg lamtangam kaakin dvb nyinum.

¹⁷Nwrbag Lvpw Atv, nywywngam sima bo, kaapa maanam, Pwnbo akin ciqnyingv xinamv hoo yuunamv nwrba cwtam hoqgv nwrba gob dooky nvka. Amen.

¹⁸Ngoqg ko Timoti, ngo soq gaml sam nam jidwn, kol otuq ho noqg pagoqkam nyiqry kaanbov benam hvb, hoq agam tulu ham noqg svtam-soruqb begdvl noqg nyob pakho hindy alwb pan to.

¹⁹Soqg mwwjwngam la mwwdynam mam hengab apto. Nyi tuugin vd-koram mwwdy nyoma layil bulug mwwjwngam yuupaq nukun.

²⁰Himenias la Alekjendar bunyiv bulug pengko hoqgv vnyi gon, ngo bunyiam Pwnboam bec benam mam paqm dvb hvl uiyig alaqho gvqlwq tukun.