Read Nyishi 1 TIMOTI 3 Bible Online

1 TIMOTI 3 - Nyishi bible

1 TIMOTI 3

¹Hiyv lajaqkam dvrwq namlongam nyig wggwl swwg dvb mwwnbo nyi ak hv albo bonam nyikybo nyiib nyidwb nyiky tayin hvl benam agam si jvqtwngv.

²Dvrwq namlongam nyig-wggwl swwg dvb nyi akv yolu doomabo, nywxw akin boonbo nyiib, albo nyi, atam cwqsbo, kvtaq-rvpaqb nyinbo, nyiinam namho svgagvrwq bo, hang kor maanbo, hang nyinyiaqbo, nyiam tomswr dvb cengnbo;

³twwxum dviyaq maanbo, swrsomalob mwwnbo, twngkam aby maanbo;

⁴mwwg imiqngam anyab kaanbo, mwwg ko tulungam mwwg benam mam bugil swwn bo nyiib nyidwb nyikin dvn.

⁵Hoggab mwv mwwg atwg imiqngam kaadwb cengma baloqkam mwv hoggub nyil Pwnbog dvrwq namlongam kvvyw-tada nyotayin?

⁶Oyu maadab nitib mwwjwbo nyiam dvrwq namlo hoqg nyigbo nyiib swwm maabv, hvb nyib nyiloqkam mwv lokam nyeram yaagub nyil ui alaqho haadwn.

⁷Hoq hvk, dvrwq namlongam nyigbo nyiv dvrwq namlo hoqg nyiv xitwq maab nyi asaq mwlwngv xinam nyiv aldvn, hoggab hvk nyiv ui gombub haamab ho benyi-beya komab aldvn.

⁸Dvrwq namlongam svka bo tulungv, dvrwq namlo gab mwwdwqbo, agam gomnyi maanbo, mwwtw kwlw bo; twwxum dvb twwma bv ho roogum maanbo nyiib nyidwb nyidwn.

⁹Bulv mwwc lamanam jvqtwngam mwwjwnam mam hingxw cwrwl dardarjaqb kaakin dvb nyidwn.

¹⁰Bulam otuqb vnyiq hangam hengka coodwb nyidwn ho al hindy nyiloqkam bulam ham nyim dvb jidwb nyitayin.

¹¹Bulug nywxw tulungv kam al jaqb nyid wdwb nyitayin, xwkar maanbo, hog mwlwho mwwjwnam nyemwb nyinbov aldvn.

¹²Dvrwq namlongam svka bo nyi akv nywxw akin go boodwb nyidwn, ho mwwg nywxw koam alwb kvvyw-tada bo nyiib nyidwb nyidwn.

¹³Hoggab albo bonam nyinbo nyi tulungv bulv at gab albo bonam kaapa tayin ho haakam alwb Jisu Kristog lvgab doobanam mwwjwko bvrwqngam betayin.

¹⁴Ngo soq pota sam nam xeqs jaqkam ngo oyu maadab noqg dookub vnwqb haatayin.

¹⁵Hvbmabde ngo vnwqb haamab oyu kub nyiloqkam soq pota si ngulv hoggub nyil Pwnbog namlo ho simab Pwnbog dvrwq namlo lo jvqtwngam rwwda annwb la kwtwb nyil torl daqgtayin ham cengmtayin.

¹⁶Hiyv nyiv kam ngulug dormongv hog hwdgo koidvn ham bepaq nyoram ho benyiram: Mwv nyi nyiipwb nyil kaakinum! Yal ho dvrwqbo nyiv hvl xiknum Ao gumtwngv mwam kaapanum. Mwwg puiyam nyob luusaq agaho bekin kunum, Gvda gvt si mwwjw kunum, mwam ao gvdab yuudub booca gvnkun.