Read Nyishi 1 TIMOTI 5 Bible Online

1 TIMOTI 5 - Nyishi bible

1 TIMOTI 5

¹Nyi nyiixangam yolu bemabv, hvbmabde mwam noqg ab hvb mwwto. Nam anyo yaanbo tulungam noqg bor hvb,

²dvn axa tulungam ann hvb, nyem anyobo tulungam noqg bwrm hvb mwlwngam dvrwq alwb mwwl nyito.

³Jvqtw jaqb xwwmy meel swwnbo tulungam paqto.

⁴Hvbmabde ko doonbo ho ko hosiq doon bov bulv atwg imiqlo dormob bon nyinam sam nyico to, hoomo lo bulug ab-ann tulungam nyilwq kalam tayin hoo Pwnbog hangam xumdwb nyitayin.

⁵Xwwmy swwnbo nyem mam mwnwn hiyv akkam kaanbo dooma baloqkam mwn ai aalam Pwnboam hingw gvdwl swgwl svka kol dooto.

⁶Hvbmabde hemp-hengam mwwtaqb nyinbo xwwmy akv turl doojaqkam mwn sidkun hvb nyidwn.

⁷Bulug lvgab hiyv nvkam kanyi mvma dvb, soq gaml sam jito.

⁸Hiyv akgon atwg lwkw xwwmy imiq nyi tulungam kvvyw-tada nyoma bov mwwjwnam pagoqkam xuqpaq bov, hoo mwv mwwjw maanbo nyiam hilayab al maadwn.

⁹Xwwmy gotwq bolo vnyw camx maalo xwwmiv hvl xitaq maab. Ham betlakam, nyol akin go boonbo,

¹⁰albo nyis tulungam nyinbov hvl yuunam, mwn alwb ko tulungam sokambo nyem, nyiin haan boam alwb svgagvrwq bob, Pwnbog nyi tulungam yanwl modu bob nyil, nyelin dorswb nyin boam svka bob, hoo albo bonam nyidwb mood jinbo xwwmy ak ham jvqtw jaqb xwwmiv hvdwb nyidwn.

¹¹Hvbmabde xwwmy sujaqkam nyijwrb nyin boam xwwmiv hvl xitaq maab, hoggab bulv hang mwwnam mam cwqla maab nyol nvvnwdvn, ho bulv Kristog hoqgv aado wleq dukun.

¹²Hoqhvb nyigam gab bulug otuqho mwwg lvgab birnam mam pvvb juqbo dukun.

¹³Bulv nam namgin hoqgv namginwb gaqkarnv bulug mood moomangam nyipaq dvn. Ham al yaama bo bonam nyikar banv goos maaiyam goobnv, nyis maaiyam nyikar banv agam bes maaiyam bekar yvdwn.

¹⁴Hoqgab ngo bedwn, nyijwr nyixiqbo xwwmiv nyol naadarl ko dool atwg nam rongongam hindib kaagdvl doonamv altayin, ho ngulam ceebio baqnbo nyi tulungv ngulam bec bedwb hampeqram.

¹⁵Hoggab xwwmy nyi tuugin sijakam ui kokwb wmin gvdwn.

¹⁶Hvbmabde mwwjwbo nyem dvn gonwg imiqlo xwwmy swwn bov doob nyiloqkam mwn hoq nyi tulungam kaato, dvrwq namlongam kaatwk hvl bemab, hvbmabde dvrwq namlongv jvqtw jaqb kaan doomabo vp-cwkwb doonbo xwwmy akam kaam dvb nyidwn.

¹⁷Albo bonam nyinbo nyi axa tulungam nyig wgbo du hwiywb nyin boam bulam vi yaab nyijongam jidwb nyidwn, ham betlakam Pwnbog agam mam bekin boam hoo tomswrbo nyi tulungam xibin yaadwb nyidwn.

¹⁸Hoggab dvrwqbo potangv bedwn, “Svv ham am swqm yukam svv agam mam puutum maabv,” hoo “Bon nyinbov mwwg nyijongam naadwb nyidwn.”

¹⁹Nyi vnyi goma lo oum go hvvky haal axa nyi akgonwg aoho yolu bemalo ham tamin gvmabv.

²⁰Nyic nyinbo nyi tulungam mwlwg tagaho toxum dvb yolu beto, hoggab hvb bebaloqkam nyi nyimabo nyi tulungv hoqgab bostayin.

²¹Pwnbo Jisu Kristo ho xuqnam dvrwqbo ao gumtw tulug agaho nam ngo bidlalal soq tomswrnam agam tulu sam bugil hiyv nvkam nyemaq haamin gvmab noqg nyitaq mwlwho nyitwk hvl gaml jidwn.

²²Atwg bonam nyim dvb hvl nyi gotwq bolo alaq idaql cox alwb xuqmabv. Nyiig nyic nyikho nyiba maab, no atam dvrwqb ap suto.

²³Iss aro twwmab, hvbmabde roo ala loq miceq gogaqb noqg aiyeq vcam cingngin mvdwb twwto, hoggab no vc cidaqdo.

²⁴Nyi tuugin bulug nyic nyinamv kaadar cekar dvn ho bulug otuqb pw-hwwk lamtab wco dvn ho nyi tuugin hoq nyic nyinamv bulug kokw kokwb wdwn.

²⁵Ho hvbkalam albo nyis tulungam nyinamv kaadar cekar dvn, hvbmabde kaadar dvb nyimabo tulu hvvkam kvsil doonyiram.