Read Nyishi 1 TIMOTI 6 Bible Online

1 TIMOTI 6 - Nyishi bible

1 TIMOTI 6

¹Pwnbog eminam almab ho ngulug tomswrnam mam tob-taiyil bem mvma dvb nyera tulungv bulug at tulungam xumdwb nyiky dvn.

²Ho nyera tulug at tulungv mwwjwbo nyiib nyidloqkam bulam at vbw-bor hvb nyigdvl bulam mwwnyi-saqya maab nyito. Hvbmabde bulam ayab kaadwb nyidwn, hoggab bulug bon nyinam niqtuqngam naanbo nyi tulungv mwwjwbo nyiib nyigam gab bulam anya dvb nyidwn. No soq tulu sam tomswrto hoo bekinto.

³Hiyv lajaqkam agam oksub tomswr bov, ho ngulug At Sw Jisu Kristog pui lvgab juma bov, ngulug dormog tomswrnam hvb nyima bov

⁴nyeram yaagub mwwnbov mwv hog gokam cengma dvn. Mwv mwwc mwwyab mwwl Pwnbog agam mam haql yolu haqpaq dvn ho kvvnw maadwn, yolu bedwn, bej-bepar dvn, mwum dvn,

⁵hoo looxiam haqnamv, hang mwwdar lamabo nyi hoqgv lengdwn, hoo mwwg hang uraho jvqtwngv dooma dukun. Bulv mwwdwn dormo swwnamv nyet tvgdvn. Hoqhvk hoqgv no aado ho dooto.

⁶Vjaq su, hiyv akgon mwwg alaqho hognvkv doog gvdwn hoqho mwwg hangv xumb nyiloqkam dormongv nyiam nyet swwg dvn.

⁷Ngulv hognvkam gvda gvtwb bval haag yin? Hog akkam bval haama! Ngulv hognvkam gvda gvt soqgv naal wgtayin? Hog akkam naal wg kuram.

⁸Hoqgab ngulv dvdwb dvs hoo koodwb vj doog twqbo lo ngul gab jotv.

⁹Hvbmabde nyet swwdwb mwwnbo nyi tulungv pooka-yirka ko gombub, almanbo ho ngulam almab nyigbo gombub nyimur mvdwb ho nyiam sig dorg gombub, ho yuupaqko bwdwb dugeq lodwn.

¹⁰Twngkam aby bonamv hog mwlwg almak lamta pagoqkv, nyi tuugin soq sam abydvn, hoqgab bulv mwwjwnam mam apaq pel gaqxar dukun hoo bulug hangam mwwdwq saqk rooxob mvdwn.

¹¹Hvbmabde no Pwnbog nyi no, soq mwlw sam apaq pel keleqto. Hvbmab nyiidar nyiib nyinam mam, dvrwqnam mam, mwwjwnam mam, abynam mam, tumanam mam, hoo dengkib nyinam mam xeng gabtvl paqyin yvgto.

¹²Noqg mwwjwnam mam hindy alwb kwrwb nyigdvl apto, ho noqg at gab nwrba cwtam swwgam nyinwr suto, soq nwrba cwtam swwg gab no hwdgo nyi nyiitw mvqlwg agaho nam Pwnbov goqnam mam bekin dvn.

¹³Mwlwngam swwm dvb jinbo, Pontiyas Pilat agaho atwg mwwjwnam mam kaakin bo Jisu Kristog kaagaho ngo nam gaml jidwn,

¹⁴gamlam bugil swwg dvl dvrwqb apto, ho At Sw Jisu Kristog haad Aalv haanam gob ham kac mvmab apto.

¹⁵At Swn at yaada gob, lvpw atam at yaada gob gvda sam kaaya bo paqnam akam Pwnbov mwwg haad mood jaqkam haam tayin.

¹⁶Mwv nywywngam sima bov, mwv nywywngam hvvc lamako huto ho doodwn. Hiyvkam mwam lokkam kaaka ma, ho kaapa nyoram. Nwrba cwtam gob mwam xinamv ho atorv mwwg lvgab doonka, Amen.

¹⁷Sijag swwca soqg gumn ran sam haajaqb xitor yaagub mwwma bvk hvl nyetbo nyi tulungam beto; ho hoqhvk hinc maanam nyet nyeram mam hingw maabv, hvbmabde ngulam jwwgw mvmab hog mwlwngam hemp alwb bvvdwb jinbo Pwnbo arongam hingwtvk hvl beto.

¹⁸Bulam albo nyis tulungam nyitwk ho albo bon gab nyet tvtwk hvl beto, hoo jiga albo nyiib nyil akwn akwn dvbam twwbam to.

¹⁹Soq sib nyil bulv at gab door tukuml kuiyum godab lwwn dvqgw naadwb bulv gumnam door tukum ap sutayin. Ho kokwngam bulv jvqtw jaqb swwg hvvtwngam kaapal swwtayin.

²⁰Timoti, nam hognvkv noqg alaqho gvqlwq pakun ham hengab bvvto, Niqtuq doomabo agam rooxo goomab, ho dengky maanbo nyi hvb haqyaq minsnam hvk “Cenglaqkam” haqyaqmins maabv.

²¹Hoggab nyi tuugin bulv gon benbo yaagub mwwdwn ho bulv atam mwwjwnam hoqgv lamta gaqxardvn. Pwnbog swrsomalongv nul mwlwg lvgab doonka.