Read Nyishi 2 TIMOTI 2 Bible Online

2 TIMOTI 2 - Nyishi bible

2 TIMOTI 2

¹Ngoqg ko tuup, no Jisu Kristog anyako galoqkv mwwg lvgab lokub doobal ator alwb swwto.

²Nyi mwlwg agaho ngoqg bekinam agam mam no tankun, hoq tulu ham no mwwgab gvdwl nyi asaqkam tomswr swrl yvnbo nyi tulungam tomswrto.

³Jisu Kristog mwwgw nan albo Sipai akgon hvb nyigdvl no ngoqg lvgab hentwr hemba to.

⁴Sipai swwnbo nyi akv mwam Sipai swwm dvb jinbo Saab akam hang xumdwb bonam nyidwn, hvbmabde mwv atwg swwkoram kaal nyis asaqlo bon nyikar maadwn.

⁵Xarka sunbo nyi akv xarnam hoqg pvvb tulungam nyima baloqkam mwv hoq xarjongam kaapa nyoram.

⁶Rongo mvnbo akv mwwg nyelin bonam nyijongam otuqjaqb naadwb nyidwn.

⁷Ngoqg benam sam mwwkato, hoggab At Sw hog mwlw nyitaqho nam mwwlaq nanam cengm dvb jitayin.

⁸Sik boam purab kunam Debid ko hosiq Jisu Kristog pagoqkam ngoqg bekinam Tugu Puiyam mwwgabto.

⁹Ngo Tugu Puiyam bekin ko-gab ngo hentwr hendwn ho ngam guunyi nyi gon hvb pvtwq lwqpa. Hvbmabde Pwnbog agam mam pvtwq lwqnyi ma.

¹⁰Soq pagoq gab sulak ngo hog mwlwngam Pwnbog xuqnam nyi tulungam bulam Jisu Kristo galoqkv ywwnam mam kaapa mvdwb ho nwrba cwtam yuunam mam lokub kaapa mvdwb hvl mwwgdvn.

¹¹Soq benam si jvqtwngv: “Ngulv mwwg lvgab sipa kunyiloqkam, Ngulv kam mwwg lvgab swwl dooba tayin.

¹²Ngulv cwql swwb nyiloqkam, ngulv kam mwwg lvgab lvpw yirba tayin. Ngulv mwam cengmak hvl vm mvvbaloqkam, mwv kam ngulam cengmak hvl vm mvvtayin.

¹³Ngulv mwam mwwjw swswl doob nyiloqkam, mwv kam ngulam mwwjwl dootayin; hoggab mwv atam atv vm mvvs dvb nyilaram.”

¹⁴Noqg nyi tulungam soq pagoq sam bepato, bulam agam benam mam naal yolu pamin suma bvk hvl Pwnbog agaho atorjaqb bicin to. Soq sib nyinamv hog niqtuq dooma dvn hvbmabde sam tanbo nyi tulungam al mvdwb mvdwn.

¹⁵Pwnbog kaagaho no aljaqb bonam nyin bogub nyito, ho atwg bon nyik gab hvnyw maanbo, Pwnbog jvqtw puiyam kvtaq jaqb tomswrbo nyiib swwto.

¹⁶Niqtuq doomabo bvrwq goonam ho budum-bvram benam hoqgv aado ho dooto, hoggab hoq hvk bvrwqngv nyiam Pwnbog ogum hoqgv aadob booxar dvn.

¹⁷Bulug tomswrnamv un yaanbo gv un hvb gv ayaqngam dvxin dvn. Soq sib tomswrbo nyi tulug pengko lo Haimenaeus la Piletus bunyiv.

¹⁸Bulv jvqtw lamtangam apaq peekul, mwwjwbo nyi tulug mwwjwngam bik-beya banv begamv, ngulug turkur deenamv kol nyixo paknvk hvl bedwn.

¹⁹Hvbmabde Pwnbog swwrw diigab kunamv nywywngam biidwb mvma pan, hoq aoho soq agam sam xeqpwl apnamv doodwn, “At Sw mwwg nyiv hiyv xeq doodwn ham mwv atv cengl doodwn” ho “Hiyvg nyiv ngo At Swg nyivk hvl benbo nyi ak hv almanbo bonam nyinam hoqgv wkur dukub nyiky dvb nyidwn.”

²⁰Nam namda lo pwcw uddu luuxy dvrabpv doodwn, tuugin hun rup hoqgv pwnamv, tuugin svvda hoqgv ho tuugin ked deekam hoqgv pwnam huku betangv doodwn. Hoq tulug pengko hoqgv tuugin xinamv doodwn ho hoq torab pengko ho nyis hvvtw okum koilo dvn mvnamv, ho dvrab tuugin ham hvvtw mak okum anyo amaqlo dvn mvndvb doodwn.

²¹Hoqgab hiyv atam hog mwlw almanbo hoqgv nyedarb dootayin, mwam hvvtw bonam nyiklo nyintayin, hoggab mwv atam jipaq looda pakun ho mwwg At gab hvvtw bonam nyindvb nyidkun.

²²Sijag tuudy yaamy almab mwwnam hoqgv no aadob keleq tuku, ho dvrwq hangwb mwwl At Swn xumn bo nyi tulug lvgab nyiidar nyiib swwnam, mwwjwnam, abynam ho swrsomalongam kwrwb mwwgab gvdwl Atwn xuml svka konbo nyi gob nyil swwto.

²³Dengky maanbo agam goonam hoqgv hoo niqtuq doomabo haqyaq minsnam hoqgv aado ho dooto, hoggab hoq hvkv yolu ceebiob bepadvn.

²⁴Atwg nyerangv yolu dukarl yvdub nyima dvn. Mwv mwlwngam ayadvb nyidwn, albo la hangam cwql tomswrbo,

²⁵hang nyinyial mwam hang baqnboam tomswr swrl bedarbo nyiib nyidwb nyidwn. Soq sib nyinam si lokam Pwnbov bulam hang mwwkurl jvqtwngam cengm dvb mood jikam supaco.

²⁶Ho bulam hang mwwdarl mwwdy gvdkul bulam nootul mwwg benam mam tam dvb mvnbo uiyig alaq hoqgv lengm dukub jipa kun.