Read Nyishi 2 TIMOTI 3 Bible Online

2 TIMOTI 3 - Nyishi bible

2 TIMOTI 3

¹Soq sam mwwgabto kuiyum mam swcwnv dubd aalam moodv vs-axaq jaqtayin.

²Hoggab nyi tulungv meeg yaiya atam aby bobin sutayin, twngk aby bob, lartayin, kwcwr-kvpar tayin, bej-bepartayin, bulug ab ann benam mam tama tayin, paqyalinco hvl bekram, dvrwq kuram,

³hang biimabo, aya kumab nyirab tayin, xaalyo bo, atam cwqnyi maanbo, kwr korbo, alboam oyum tayin,

⁴xaalyo bob, nyitu-nyixwbob, at mwwkwb nyitwqbob; bulv hemp-hengam yaangam Pwnboam hilayab abytayin,

⁵bulv nyiig vnyiq kaagaho aro nyiv kaanam-tanam gob nyil dvrwqb swwdwn, hvbmabde jvqtw huqlwngam haqpaq dvn. Soq svk nyi tulug ogum hoqgv aado ho dooto.

⁶Bulug pengko hoqgv nyi tuugin nombu tulug urab pagoq kaacoql haadwn hoo hang vdw maanbo, nyicig vgwngam baqn boam hoo deedy luuxig hemp-hengamv booxar kunam dvn tulungam nootu dvn.

⁷looxiam tomswrnamv su, hvbmabde nywywngam jvqtw lamtangam cengdwb mwwma dvnv.

⁸Janis la Jambris bunyiv Mojesnvn haqnam hvbkalam soq nyi tulu si jvqtwngam haqdwn; bulug hangv hog mwwdar lakma hoo bulug mwwjwngv kam niqtuq dook maadwn.

⁹Hvbmabde bulv oyu go nyinyi kuram, hoggab nyi mwlwngv bulug paca yaagub nyinam mam kaapa tayin. Hoq si Janis la Jambris hoggub nyiknum hoqhvb nyita do.

¹⁰Hvbmabde no ngoqg biswrnam mam tagab paku, ngoqg nyinam mam kaagab paku, ngoqg swwg pagoqkam cengpaku, no ngoqg mwwjwnam mam kvvdy paku, ngoqg cwqnam mam, ngoqg abynam, looxiam cwqnam mam kaapa ku,

¹¹ngam mvnyi mviyanam mam ho ngoqg hentwr nyelin henam mam cengdo. Antiok, Aikoniyum ho Listra alo hoggub nyil lomdwb nyinbo mvnyi-mviyanam mam cwqtkun ham no cengl doodo. Hvbsujaqkam hoq mwlw hoqgv At Sw ngam ywwknum.

¹²Jisu Kristog lvgab dvrwqb nyil swwt nvp mwwnbo nyi mwlwngam mvnyi-mviyal mvtayin.

¹³Hvbmabde almanbo nyi tulungv ho kaaga tagab nyinbo nyi tulungv meeg yaiya almab aoho almab yanboam nyitayin ho nyi asaqkam vm mvvpaql ho atam kam vm mvvpaqsul swwtayin.

¹⁴Hvbmabde no nyiloqkam nam tagab dvb tomswr kunam mam jvqtwngam no biimab mwwjwl dooto. Hoggab no cengdo nam hiyv xeq biswrnum,

¹⁵hoo sam kam cengdo noqg ko anyo hoqgv no Dvrwqbo Potangam cengcal swwnum, hoo Jisu Kristog tolo mwwjwko hoqgv nam ywwt ywwnam mam cengm dvb mwwlaq nan hangam jinum.

¹⁶Hoggab Dvrwqbo Potangv Pwnbog bilwqnamv hoo jvqtwngam tomswr naadwb kvtaq aldvn; nyimurnam mam yolu ben dvb, nyixiaqnam mam bedar naadwb, hoo alwb kvtaq nyil swwm dvb tomswr naadwb aldvn.

¹⁷Ho Pwnboam xuml swwnbo nyi akam hwngkw alwb oj gvmtvl mwam albo bonam looxiam nyim dvb ator jidwb nyidwn.