Read Nyishi TAITAS 2 Bible Online

TAITAS 2 - Nyishi bible

TAITAS 2

¹Hvbmabde no hognvkv nyegam hvvtwngv ham tomswr dvb nyiky dvn.

²Nyiixa tulungam alwb swwtwk hvl, hingkub kaaxeql gvdwl ho atam hengab gvdwl bulug mwwjwngam jwwkam alwb doom dvb, abynam mam hoo cwqnam mam tomswrto.

³Hoq hvbkalam nyem dvn axa tulungam nyemv hoggub nyil dvrwqb nyil swwyin dvn hoqhvb nyil swwtwk hvl tomswrto. Bulv xwwkar bo nyemwb la twwxum tvl opog paqnwb swwn bob nyimabv. Hoggv aldvn ham bulv tomswr dvb nyidwn,

⁴nyem nyijwr tulungam bulug nyolam hoggub nyil abytayin, ho ko tulungam hoggub abytayin,

⁵hoo atam hvvminl hengabl hoggub nyil namlo dvrwq alwb dvnwb swwtayin, bulug nyolwg benam mam bugil tal swwtayin, ho hiyv nvkam Pwnbog puiyam tary reem mvma dvb nyito.

⁶Hoq hvbkalam nyega ko yaapa tulungam hingkib swwl atam cwqg dvl swwm dvb beto.

⁷No atv hog mwlw nyitaqho albo nyis tulungam nyiswrbo nyi gob nyidwb nyiky dvn. Hoggab alwb hengab gvdwl no tomswrto.

⁸Nulam hang baqnbo nyemaq tulungam, ngulam hog bepaq taiyaql bek pagoq kaapa maalayil bulam atam hvnyw mvdwb ho nyiv haqdwb no agam almanbo bemabv.

⁹Nyera tulungv bulug at tulug benam mam tal bugil swwdwb nyidwn, ho bulug at tulungam hog mwlw nyitaqho hang xumt dvb nyidwb nyidwn. Bulv bulug atam birwq dvb la

¹⁰ho bulug atwg dvrab pam dvco dvb nyima dvn. Hvbmabde doonyig looxiam bulug alwb nyinam mam ho mwwjwnam mam kaakin gvdwl ngulam ywwt ywwnbo Pwnbog pagoqkam tomswrnam mam ximdvb bulug nyitaq mwlwho nyidwb nyidwn.

¹¹Hoggab Pwnbov nyi mwlwngam ywwt ywwnam mwwg anyangam kaakin pakun.

¹²Hoq anyanam hv ngulam dvrwq maab kacib nyinam, gvda gvtwg mwwbynam mam apaq tukuk hvl bekin dvn, ho soq gvda gvt so atam cwqg dvl swwtwk hvl, dvrwqb nyigdvl nyiidar nyiib swwtwk hvl bedwn.

¹³Ngulv ngulug koi albo Pwnbog ywwt ywwnbo Jisu Kristog haad aalam hoq hempnam aalam kaayal doode so.

¹⁴Mwv Atv ngulam hog mwlw nyic hoqgam naalin taab hoo ngulam dvrwqbo nyiib mvdwb, mwwg nyiib swwtwl albo nyis tulungam nyinbo nyiib swwm dvb Atwn mwv jipaqnum.

¹⁵No soq agam tulu sam tomswrto hoo noqg haakam alwb mwwn nan ator lvgab noqg benam mam tanbo nyi tulungam yolu ruqto; hiyv nvkam nam hampeq kaaiyeq komabv.