Read Nyishi TAITAS 3 Bible Online

TAITAS 3 - Nyishi bible

TAITAS 3

¹Saab tulungam la lvpw abam atoram doogbo nyi tulungam bulug gamlam tal bugil swwtwk ho albo bonam luuxiam nyidwb mwwxy-saqal dootwk hvl noqg nyi tulungam biurto.

²Bulam hiyv nvkam bec-beyab bemabv, hvbmabde swrsomalob ajin hangwb mwwgdvl looxiam nyi mwlwngam anya hang baqg dvl kaakin tvk hvl tomswrto.

³Hoggab ngulv atv lok aal golo pacab nyinum, benam mam tamanum hoo nyixiaqnum. Ngulv hog mwlwngam hemp-hengam mam kaabil hoq nyerab swwnum. Ngulug swwnam mam ngulv nyic nyibnv hoo hang baqbnv akwn akwn oyum minsul doonum.

⁴Hvbmabde ngulam ywwt ywwnbo Pwnbog ayangam la abynamv lengxo so,

⁵mwv ngulam ywwnum. Soq sib nyinam si ngulv albo nyis tulungam ak nyigam gab ma, hvbmabde mwwg Atwg aya ko-gab sulak mwv ngulam nyedar darxaqtvl Dvrwqbo Yal galoqkv nitib ko bwwdar mvpan hoo nit swwgam jitwl ywwt ywwpan.

⁶Hoggab Pwnbov ngulug aoso Dvrwqbo Yalam ngulam ywwt ywwnbo Jisu Kristo galoqkv vijaqg jipan hoo mwwg anyangv ngulam Pwnbog lvgab kvtaq al mins dukub hoo ngulug hingwnam nwrba cwtam swwgam gumn bvba dukub jipan,

⁷hoqgab ngulv mwwg anya ko hoqgv Pwnbog lvgab kvtaq kunv ho nwrba cwtam mwwgw duku swwgwg dupum dvrab gob nyidwn.

⁸Soq benam si jvqtwngv, Pwnboam mwwjwbo nyi tulungv albo nyis tulungam nyingo tvl apaq maab doonyig looxiam nyimdvb no bulam ator alwb betwk hvl ngo nam gaml jidwn. Soq sib nyinam si aldvn hoo nyi tulu gab kam nyin dvb aldvn.

⁹Hvbmabde paca bo hvb ab-ann nugungam xwwl, yolu dunam mam, hoo pvvbwg bvrwqngam bel haqmin sunam mam apaqto. Hoq tuluhv niqtuq doomabo hoo ximanamv.

¹⁰Hang pwsaq dvb mvnbo nyiam lwnyi go yvtw pato, hoq kokwngam mwam apaq tuku hoo mwwg lvgab nyiba kumab.

¹¹Hoqgab no ham cengnbo hoqhvk nyiv lamta wxiaq gvnbov ho mwwg nyic nyinamv mwv almadwn hvl kaakin dvn.

¹²Ngo Artemaswn maabnyilo Taikikasnvn noqg dookub kanam tayin, ho Nikopolis alo no ngam wrwqto, hoggab ngo tapam poolam alo doodwb mwwbwq pakun.

¹³Nyegam belaqbo Jenasnvn mwam svka kaasv doody deedib svka to. Apolloswn bulug nyoywngam wrab mvto, ho hognvkv bulv dooma dvn ham luuxiam pwwma boam svka to.

¹⁴Ngulug nyi tulungam albo nyis tulungam nyil jvqtw jaqb pwwma bo gab pwwdwb cengmto, hoggab bulv ho bon nyimab doonamv alma.

¹⁵Ngoqg lvgab dooba bo nyi tulu mwlwngv nulam salam jilwqdvn ngulug salam mam mwwjwl doonbo ngulug ajin tulungam jito. Pwnbog anyangv nul mwlwg lvgab doonka.