Read Nyishi PILIMON 1 Bible Online

PILIMON 1 - Nyishi bible

PILIMON 1

¹Jisu Kristog emin gab nyumwb nyil pvtwq ho doonbo Poul la ngulug bor Timoti galoqkv— Ngulug ajin ho ngulug lvgab bonam nyibambo Pilimon

²hoo noqg namho hookumbo dvrwq namlo ho doonbo ngulug bwrm Appia, ngulug ajin Sipai swwnbo Arkipas:

³Ngulug Ab Pwnbo galoqkv la At Sw Jisu Kristo nulam anyangam la swrsomalongam jitka.

⁴Pwnboam swgw gwwcw gwwtam, ngo bor Pilimonnvn, nam ngo bepa dvn hoo ngoqg Pwnboam paqdwn.

⁵Hoggab noqg Pwnbog nyi tulungam abynam mam la noqg At Sw Jisun mwwjwnam mam ngo tapa gvdo.

⁶Ngo xumdwn, ngulv mwwjwbo nyiib nyil ngulug noqg lvgab nyibamnamv ngulam meegta Kristog lvqc cinam mam cengm dvb jiyi nvp mwwl doodwn.

⁷Ngoqg tumanam bor, noqg abynamv ngam koi alwb hemp pomdvb la haakam al mvdwb jipa. Hoggab no Pwnbog nyi tulungam bulug hangam nyiu nyibia pa.

⁸Ngo Kristog uraho doogam gab haakam alwb noqg vbw du hwiywb nam ngo hognvkam nyidwb nyidwn ham gaml jidwn.

⁹Hvbmab abynam bvrwqngv ngam mvnyi-moiyul nam bemdvb jipa. Soq sam ngo axab nyis kujaqkam, Poul ngo Jisu Kristog hvvkib nyil sija soq aposo nyumwb nyil mwwg gab pvtwq so doos jaqkam ngo sam nyigdvn.

¹⁰Hoqgab ngo nam mvnyi-moiyul Onisimas taqb bedwn, mwv ngoqg atwg ko tuup jaqhvb Kristog uraho nyidwn, hoggab pvtwq uraho doodwkho ngo mwwg yal abwb nyinum.

¹¹Otuq mood golo mwv noqg gab hog niqtuq nyiib nyimanum, hvbmab sija mwv noqg gab kam hoo ngoqgab kam niqtuq nyiib al paku.

¹²Ngo sija mwam noqg dookub kanam gvikun, mwv noqg hang biinamv.

¹³Ngo mwam ngoqg dook so doog dvb mwwnum, hoggab ngo pvtwq uraso tugu puiywg pagoq gab doodwk so noqg ngam svka ko-gab mwam svka kaak dvb mwwnum.

¹⁴Hvbsujaqkam ngo nam beteq beiyeql ngam svka tvbwk hvl binwma, hvbmabde ngo nam alwb hang mwwlwqb nyim sudub mwwdwn. Hoqgab ngo hog akukam no vv hvl looma deedib nyiram.

¹⁵Lokam Onisimas noqg galoqkv apo go aado ho dooleqnamv kokwngam no mwam nwrba gob nookur laikul looxiam doog dvb nyikam yin pv.

¹⁶Hoggab mwv sija nyerab nyituq ma, hvbmabde nyerangam hilayab xinam gob nyipa ku; mwv Kristog galo tumanam borv ku. Mwv hog hwdgo ngoqgab xidwb nyidwn! Ho noqg gab nyera ak gob jaqkam hog hwdgo At Swg emin gab bor ak gob xidwb nyidwn!

¹⁷Hoqgab no ngam noqg ajin bon nyibamv mwwd loqkam ngam svgagvrwqnam hvbkalam mwam no svgagvrwq to.

¹⁸Mwv nam hog ak nyimur-wmur pak nyiloqkam ho hog jisgo doop kunyiloqkam ngoqg emin gab apaqto.

¹⁹Soq sam ngo atwg alaqngv xeqg yin, Poul ngo, nam hoqham xeqtayin. (Ngo nam bepa dvb nyima sudwn, noqg swwg dvnhv ngo doogam gab swwdwn.)

²⁰Hoqgab ngoqg bor, aya mwwpa gvdwl At Swg emin gab sam nyito; ngoqg hang sam Kristog galo hoopu-haabia dvb jito.

²¹Ngo jvqtwb mwwjwdvn, no soq ngoqg benam sam laabo yaab nyiyi nvp mwwdwn.

²²Agam gamgta besv doodo, ngoqgab dook loq ak ap yaato, hoggub ngo hingwdvn nul mwlwg swgwl konam mam Pwnbov tai nvpv mwwdo hoo ngam nulam jikur yuk nvp mwwdo.

²³Epapras, ngoqg lvgab pvtwq uraso Jisu Kristog emin gab dooba do, mwv nulam salam jilwqdo,

²⁴hoo ngoqg bonam nyibam ajin Mark kam, Aristarkas, Demas hoo Luk bulv nulam salam jilwqdo.

²⁵At Sw Jisu Kristog anyangv nul mwlwg lvgab doonka.