Read Nyishi HIBRU 10 Bible Online

HIBRU 10 - Nyishi bible

HIBRU 10

¹Juhudi tulug pvvb si jvqtw jaqb mwwjwnam mam kaagdvb nyima bov hoo kvtaqjaqb pwbw yooma bov, hvbmabde haady bo pagoqkam yal bobo hvb kvvyw tacdvb kaakin twqdwn. Soq sibin-sviya lvgab guunam sam vnyw nywxiam nyi tulungv nyikil doodwn. Hoggab soq pvvb si Pwnbog dookub ogum haanbo nyi tulungam soq sibin-sviya pal guunam si

²bulam bulug nyicam nyedar darxaq nyiloqkam bulv vnyw nywxiam sam nyidub nyiram ho bulv bulug nyicam mwwpa kuram ho sibin-sviya pal guunam mam kam nyikram.

³hvbmabde nyi tulungv vnyw nyixiam sibin sviya pal guunam si nyi tulungam bulug nyicam lokta bepadvn.

⁴Hoggab sibin-sviya uiyv nywywngam nyicam baqxia nyoma dvn.

⁵Soq pagoq gab Kristo gvda gvtwb ipoq maadab mwv Pwnboam benum: “No sibin-sviya pal aky jinam mam mwwby maadwn, hvbmabde no ngoqgab gv vp ak mwx-mvaql ap pan.

⁶No sibin-sviya pal nyicam nyedar darxaqnam pagoqkam, noqg-hangv xuma dvn.

⁷Ho ngo benum, “Pwnbo, kaato, ngo noqg hang mwwlwqkob, Dvrwqbo pvvb potalo ngoqg pagoqkam. Xeqpwl apnam hvb nyidub ngo si doodwn.’”

⁸Sam mwv jvqtw jaqb benum, “No sibin-sviya pal aky jil nam guunamho noqg hangv xuma dvn, hvbmab nyedar darxaq dvb hvl yugw aoho sibin-sviya rwwlwql panam hookam noqg hangv xuma dvn.” Pvvb ho xeqpwl ap kunam hvbkalam soq mwlw sibin-sviya pal guudwb nyiskujaqkam mwv sam hvraqb benum.

⁹Kokw so mwv benum, “Pwnbo, kaato, ngo noqg hang mwwlwqkob nyidub ngo si doodwn.” Soq pagoq gab Pwnbov kokw so hog mwlw sibin-sviya pal guunam mam kucuq boam apaq tukul hoq kwlib Kriston hirin rin kunum.

¹⁰Hoggab Jisu Kristo, Pwnbov mwam nyimdvb jinam mam niqtuq nyilin jinum, ho mwv atam ngulug gab hirin rink hoqgv ngulug nyic mwlwngam nyedar darxaq pakun. Mwv sam lvkinho mwlw gab nyinya dvb nyipa kun.

¹¹Aal looxiam Juhudi nyub vxiv xumbnv aky jinam akwn sibin-svvam guun banv nyidwn, hvbmabde soq sib nyinam si nywywngam nyicam nyedar darxaq nyoma dvn.

¹²Hvbmabde Kriston lvkin go hirin rinnum, hoq hirin rinnam hv niqtuq doon bov ho kolam nwrba cwtam nagub nywywngam biim maadwb pvvbam papa kun, ho kokw so mwv Pwnbog alaq lvqbwq taqc ho doodkun.

¹³Sija Pwnbov mwwg ui-nyemaqkam mwwg lvpia niikum uraho cvvly tukul caatin ap maady deedib kaayal dootayin.

¹⁴Lvkin golo hirin rinl, kol nwrba cwtam nagub bulam nyic hoqgv nyedar darxaq pakun.

¹⁵Hoggab Dvrwqbo Yalvkam mwwg pagoqkam ngulam bekin dvn. Mwv otuqjaqb bedwn,

¹⁶“Hoq moodv haaxo kokwngam ngo soq bvrwq sam bulam birwl aptayin, hvl At Sw bedwn; Ngo bulug hvvjwg uraho ngoqg pvvbam aptayin. Ho bulug hang uraho ngoqg pvvbam xeqpwl aptayin.”

¹⁷Hoq kokw so mwv sam benum, “Ngo bulug nyicam la nyimurnam mam nywywngam mwwpa kuram.”

¹⁸Hoqgab hogloqho soq mwlw gab nyicam apaq jiknamv doodwn hoqho nyicam nyedar darxaq dvb hvl hog asaq ak guundvb hog nyikur dook maadwn.

¹⁹Hoqgab, ngoqg tumanam vbw-bor tulu, Jisu sik gab ngulv mwlwngam Dvrwq yaanbo cwwrw urab haadwb ngulug atorv doodwn.

²⁰Mwv ngulug gab lamta nit ak kaakin pakun, ho nit swwg pagoq ak ngulam vj torl apnam pengkob mwwg atwg gv vpv wpeql kaakin pakun.

²¹Ngulug Pwnbog nammam kaaya bo nyub but ak doodwn.

²²Hoqgab ngulug mwwc-mwwya hang mwwnam mam apaq tuku, ngulug gv sam iss dvrwq cojorbo ho hwrxaq gvdkul jvqtw hangam baql mwwjw swwswl Pwnbog ogumb haanya tuj.

²³Hoqgab ngulv hognvkam begaqdvn, hoq mwwgwnam ham mwwgab lalal dootju, hoggab ngulug mwwjwnam Pwnbov mwwg birnam mam nywywngam biim maab apdvn.

²⁴Ngulv, akwn, akwn gab mwwdwql, akwn akwn aby bomin sunam mam kaakin gvdwl albo nyis tulungam nyilaju.

²⁵Ngulv nyi tuugin nyinam hvb, ngulv hookum haapal dookum doonam mam apaq yooju, Hvbmab ngulv mwlwngv akwn akwn biywr-bebial doobam tuju, hoggab nulv kaapa do Atwg haad aalv ogum hvvnwq paku.

²⁶Hoqgab jvqtw lamtangam cengxo tvl hoq kokwngam ngulv cingdum tvl nyic nyidul doob nyiloqkam nyic nyinam mam nyedar darxaq dvb hvl sibin-svv pal xuml hog guus pagoq dooma dukun.

²⁷Hvbmabde huto bo Pw-hwwnam mam bos soma vrram sool, Pwnboam haqnbo, loopaqbo nyi tulungam twrdy bo mwam kaaya yal dootwq dukub doodkun.

²⁸Hiyvg nyiv Mojesg pvvbam pvvb juqbonum hoq nyi akam mwwg nyixiaqnam mam kaanbov nyi vnyi-oum go hvvky dootwq bolo mwam hiyvkam ywwmab ayamab sidwb jinum.

²⁹Hvb nyiloqkam, hiyv Pwnbog Ko Tuupam al uraho caajab-caiyabo akv ho Pwnbog nitib hijum biqwrnam mam mwam nyedar darxaqnan uiyam ximabo akv, ho anyabo Yalam hvnyw bepabo nyi akv hog hwdgo almanbo laqm mam baqkin dvn ham mwwdy kaato.

³⁰Hoggab ngulv cengdwn, mwv benum, “Ree daqnamv ngoqg nyisv, ngo ree kwlwqngam daqtayin,” hvl benbo akv mwv sam kam benum, “At Sw mwv mwwg nyi tulungam pw-hwwtayin.”

³¹Turl doonbo sima bo Pwnbog alaqho haanam si bos soma vrram sodwb nyidwn!

³²Pwnbog hutongv nulug aoho huuxo kokw so nulv hog hwdgo hentwram henum, ho hvb nyiskujaqkam nulv hvraqb mvka sukho mviya kunum, ham nulv mwwpato otuq ham.

³³Nulam nyi mwlwg kaagaho hvnyw-haram nyipanum, ho almab benyi-beyal benum, hvbsujaqkam nulam mvnam hvb mvnyi-mviyanam nyi tulug dookub nulv doobamnum.

³⁴Nulv pvtwq haanbo nyi tulug hentwram hengbanum, ho nulug gumnam naareqnam mam nulv hemp alwb himwnum, hoggab nulv cengnam ham koi yaanbo, kol nwrba cwtam nagub doody bo albo gumn ak nulgab doodnvbo hvl cengnum

³⁵Hoqgab nulv hang homabv, hoggab soq si kokwngam ngulam amin aljaqboam jitayin.

³⁶Nulv Pwnbog mwwlwqkob mwwg bonam nyidwb hoo birwl apnam ham kaapa dvb nyiloq nulug hangam cwqdwb nyitayin.

³⁷Hoggab Dvrwqbo potangv bedwn, “Haady bo akv mwv haatayin, mwv oyu ram.

³⁸Hvbmabde ngoqg nyiidarbo nyi tulungv mwwjw ko-gab swwtayin, hvbmabde hiyv bulug pengko hoqgv wkur tayin, Ngo mwwg lvgab ngoqg hangv xumram.”

³⁹Hvbmabde ngulv langkwb wkurl hoo nyiidbo nyi ma, hvbmabde ngulv mwwjw bov hoo ywwlin kunamv.