Read Nyishi HIBRU 11 Bible Online

HIBRU 11 - Nyishi bible

HIBRU 11

¹Mwwjwnam si, ngulv hognvkam mwwby dvn ham mwwgwnamv, ngulv kaapa maanam bvrwqkam jvqtw jaqb hingwnamv.

²Mwwjw ko-gab kolwg moodho nyi tulungv Pwnbog galoqkv bulam alpa hvl looknum.

³Ngulug mwwjwnam hoqgv ngulv cengdwn Pwnbog agam benamv agam hoqgv swcw-nyodongam pwnum, ho hognvkam kaapa gvdwn hoq tuluhv kaapa maanam tulug pengko hoqgv mvlinpan.

⁴Mwwjwnam pagoq gab Abel Keennvn alyab Pwnboam aky pwr jinum. Mwwg mwwjw ko-gab mwam Pwnbov nyiidar nyiv hvl loonum, hoggab mwwg aky jinam mam Pwnbov mwv atv alpa hvl nvvrwqnum. Abel mwv siknum, hvbsujaqkam mwwg mwwjwnam agamv sijakam turl goodul doodwn.

⁵Mwwjwnam gab Inok sigam kaapa maab nyinum, hoggab Pwnbov mwam ao gvdab boocanum, hiyvkam mwam mvpa kumanum, hoggab Pwnbog dookub boocanum. Dvrwqbo potangv bedwn, Inoknvn aob booca maadab, Inok mwv Pwnbog hangam jubxo-yaro dvb xumdwb nyinum.

⁶Mwwjwnam doog majaqb hiyvkam Pwnbog hangam xumdub nyijiqram, hoggab hiyv nyiv lajaqkam Pwnbog dookub haanbo nyi vxiv Pwnbov doodnvbo ho mwam mvgaql haanbo nyi tulungam mwv amin jinbov hvl mwwjw dvb nyiky dvn.

⁷Mwwjwnam gab Noa haata bo pagoqkam Pwnbog yvtw panam mam tabnv kaapa majaqkam mwv Pwnbog gamlam tal iss jaaj ak hingkib mvl atwg imiq dvpar nyi tulungam hoq jaaj hoqgv ywwnum. Mwwjwnam gab Noa gvda gvtam xuqpaqnum, ho mwv Pwnbog galoqkv mwwg mwwjwnam gab nyiidarbo nyiv hvl nyiidarbo nyi tulug pengko lo xitaq dukub nyiknum.

⁸Mwwjwnam gab Abraham Pwnbov mwam jitayin hvl dingrwl benam gvda asaqb Pwnbog gamlam tal lengl wknum. Mwv atwg gvdangam apaq pel, mwv hogloqb wdu dvn hamkam cengmab wnum.

⁹Mwwjwnam gab Pwnbog dingrwl mwam gvda jinam gvdaho mwv Nyoodo nyi gob nyil swwl doonum. Mwwjwnam gab mwv tombu uraho Aisak ho Jakub dookho Pwnbog galoqkv dingrnam akinam kaapa bo dookub doobanum.

¹⁰Hoggab Abraham Pwnbog oj junam nywywngam biima dvb rwwda diilwql mvnam nampam ak ham kaadwb mwv kaayal doonum.

¹¹Mwwjwnam gab Abraham nyekam konguq sukbakam ab gob nyiknum, ho Sara kam xox kunv ko dookin kumanum, hvbsujaqkam ko dooknum, ho nyi nyiiliam hotar tarlin jinum. Hoggab birwl apnam mam pvvb juqbo maanbo Pwnboam mwv mwwjwnum.

¹²Abraham nyiipv siknum, hvbmabde mwwg akin galoqkv doa aog takar, ho swnyiq bviywr sugurlo xilamanam xuqx hwdgo nyi nyiiliv hotar tarlinum.

¹³Soq mwlw nyi tulu si mwwjwl siknum, bulv Pwnbog birwl bulam jidynam jaqkam kaapa kumanum, hvbmabde bulv aado hoqgv kootul kaapa tvl hoq tulungam xumnum, ho bulv atv gvda soq nyiinv ho lit doonu bo nyiv hvl atam besnum.

¹⁴Soq sib benbo nyi tulungv jvqtw jaqb bulv gvda asaq ak bulug gab bekar dvn ham bes dooma.

¹⁵Bulv apaqpel wleq kunam gvda hoqg pagoqkam mwwbil mwwdwq dwqdu kumanum hvb mwwdwq nyiloqkam, bulv wkur dvb nyidkub nyisbaco.

¹⁶Hvbmabde bulv mwungnam alyanbo gvda ak, hoqhv ao gvdangam. Hoqgab Pwnbov, bulug Pwnbov hvl bedwb hvnyw maadwn, hoggab bul gab mwv bopam ak mwx-mvaql ap pakun.

¹⁷Mwwjw nam gab Abraham mwwg ko tuup Aisaknvn Pwnbov mwam pooka dvkho Pwnboam aky pwr jitanum. Pwnbov birnam akv Abraham lak, hvbjaqkam mwv atwg Ko Tuup akinam aky pwr jindwb mwwx-svqrwnum.

¹⁸Pwnbov mwam benam, “Aisak galoqkv noqg hosiv ngo nam birnam hvb lengtayin.”

¹⁹Abraham cengnum, Aisak sijaqkam Pwnbov turdkub purab nyotayin ham mwv mwwjwnum; hoqham doocnam hwiywb Abraham Aisaknvn sik boam turdkub alaqho joopa pookurnum.

²⁰Mwwjwnam gab Aisak Jakubn la Isu bunyiam kokwngam nyidynam mwlwngam lvqc cinum.

²¹Mwwjwnam gab Jakub mwv sima daab Josap ko tuup vnyi bwbwngam lvqc cinum. Mwwg beqnyia niqtuqb wgnv hoo Pwnboam xumnum.

²²Mwwjwnam gab Jakub mwv sita dukho Israel nyi tulug Ijipt hoqgv nyiogy gilin lengnam bvrwqngam benum, hoo mwwg svmangam hoggub mvtayin ham bulam tomswr banv svxin benum.

²³Mwwjwnam gab Mojesg ab annv mwam ko bwwxo kokw so pool borumgo kvsil apnum. Ko akv kangam alnum, hoggab ann ab nyu bir abwg gamlam bos mwwpa maab tamab nyinum.

²⁴Mwwjwnamv Mojesnvn kokw so akam dukho Lvpw atwg nyem ko hoqg ko tuupv hvl bekramwk hvl haqnum.

²⁵Nyic nyil mood anyoko apo gob hemp pommam lingsam Pwnbog nyi tulug hentwr henam mam ya mwwbwqnum.

²⁶Mwv Ijipt gvdag hog mwlw gumn ranam mwwby maab apaq tvl Ywwnbo ak gab hvnyw-haram henamv mwlwngam xibin yaadwb nyidwn hvl mwv cengnum, hoggab mwv kokwngam kaapal naadynam aminam mwwg vnyiqkv tuugabnum.

²⁷Mwwjwnam gab Mojes Lvpw at hang lengnam mam bos haai maab Ijipt gvdangam apaqpel wleqnum. Hoggab kaapa maanam ak ham mwv kaapa panjaq hvb biimab mwwgab doonum.

²⁸Mwwjwnam gab Israel nyi tulug dwr buqconam ko tulungam sig gumtwngam mvm mvma dvb Nyedarko Durum rumrabnum ho viyap yabtam haagaho uiyam paqyaq mvdwb gaml jinum.

²⁹Mwwjwnam gab Israel nyi tulungv Lwwcw Sa-svlongam ked pwtw aob wnam hvb kvdgonwb rabnum, hvbmab Ijipt nyi tulungv ham kaatwl nyitakubv bulam issiv hwwlup gvnkun.

³⁰Mwwjwnam gab Israel nyi tulungv loox kvngo Jeriko nampam mam aal loox kvnho warnum, kokw so hoq nampam mam mulupnam cwqc temtiv tapto kunum.

³¹Mwwjwnam gab yocu-yabio nyijobo Rahab Pwnbog benam mam tama bo pengko hoqkam mengm mvmab apaq mvnum, hoggab mwn Israel nyi tulug mvqky-maqlam swwn boam anyab ajin gab svgagvrwqnum.

³²Hog hwdgo ngo sam bidu tayin? Gideon, Barak, Samson, Jepta, Debid la Samuyel hoo nyiqry benbo tulug bvrwqngam goodwb mood vigo dookma.

³³Mwwjwnam gab bulv vigo gvdangam nyob pareql paiyal naanum. Bulv nyidynam mam ham nyinum ho Pwnbog birwl apnam mam kaapanum. Bulv sony nyot tulug agam mam mutumnum.

³⁴Bos alnam wm mam mwmiqnum, lyoqr orioqngv pvriql mvntanam orioq niqtuq hoqgv keleqnum, bulv any masnum, hvbmabde bulv ator alkunum. Bulam nyob paklo paxa lamanum ho nyoodo nyobwg nyemaqngam paiyanum.

³⁵Mwwjwnam gab nyem tulungv bulug sikbo atwg lwkw nyi tulungam lokta kaapa maadwb bulam turkur dukub jipa kun. Nyi tulu gon, tolin kota ma hvl benbo tulungam mvx mvlal mvx gvnkun, hoggab bulv albo swwgam kaapa dvb mwwnum.

³⁶Nyi tulu gonam bej-beparl beknum, xipwql jwwnum, ho nyi tulu gonam tag kvrlwq tvl pvtwqb bool wgnum.

³⁷Nyi tulu gon wlwngv hurxnum, tulu gonam arangv xwriqnum, tulu gonam orioqkv pvriql mvnum. Bulv sibin-sviya vpinam vj kootwl gaqkarl yvnum, ximanam, mvnyi-mviyanam, mvx mvlanam gob nyinum.

³⁸Gvda gvtv bul gab al haajaq kumanum. Bulv nam rongo doomabo mooro, yorn aoho paqkar yvnbo atwg gvda hoqgv ruqlinam nyoodo nyi hvb hoo wlw lwwpwq uraho, ked ung uraho dookar bo nyi hvb nyiknum.

³⁹Soq mwlw si Pwnbog kaagaho al sunum, hvbmabde bulv Pwnbog birwl ap kunam mam kaapa kumanum.

⁴⁰Hoggab Pwnbov ngul gab ham meeg alyanboam xipwl ap pan, ho ngulv maalo bulv niqtuq dooram.