Read Nyishi HIBRU 12 Bible Online

HIBRU 12 - Nyishi bible

HIBRU 12

¹Ngulam hvvky mvqlw jaqgo taqg-loosaqb hwwiyum doog ko-gab, ngulv ngulug wga lo doonbo hog mwlw duqtup teriam mvpaq pel, ngulv topaq majaqb kaqgabtvl ngulug lvgab doonbo nyicam apaq tvl, mwwx-svqrw gvdwl ngulug agalo xarka sudub doonam mam xarka sutju.

²Ho ngulug vnyiqkv Jisug ao tol kaagab lalal doonyia tuj, hoggab ngulug mwwjwnam mam kol otuq hoqgv kokw nam godab niqtuq leng deebv Jisu. Mwv kaapa deenam hempam mwung banv daapo ao hoqg hvnyw-haram mwwdwq maab daapoho sinum ho sija mwv Pwnbog lvqbwq alaq taqc dootam tv doodkun.

³Mwam mwwkato, mwv hog hwdgo nyic nyinbo nyi tulug hoqgv mwam oyum bo ceebio hang baqnam mam kaapanum ho ham himwnum, hoqgab nulv atv hang homab ho apaqmab. Soq mwlw si mwv nulam hang hom mvma dvb ho mwwdwql swwm mvma dvb nyinum.

⁴Nulv nyicig lvgab nyob pamin sukho, mviyaq minsul sija godab ui lengdwb mvmin suma da.

⁵Hvbmabde Pwnbov nulam mwwg Ko Tuupv hvl biywr-bebiab agam mam nulv mwwpa kuma dvn i? “Ngoqg ko tuup, noqg nyixiaqnam mam At Sw nam tomswrnam mam no tagabto, ho mwv nam yolu ruqinyiloqkam hang homabv.

⁶Hoggab At Sw mwwg abynam nyi vxiam mwv tomswr dvn, ho mwwg ko tuupv hvl benam akam laqm-baqm dvn.”

⁷Ngulug hentwr henamv ab galoqkv laqm sam baqdnvbo hvl cwqto, nulug hentwr henam hv Pwnbov nulam mwwg ko tuup gob mvgam gab soq si nyido. Hiyv ko tuupv mwwg ab galoqkv nywywngam laqm baka maanbog doodwn?

⁸Nulv laqm lokam mwwg ko tuup tulu gob nyil laqm baqka manyiloqkam, nulv jvqtw jaqb ko tuup gob nyima, hvbmabde asaqg ko tuupv.

⁹Ngulug nyia kog abv, bulv ngulam laqm-baqm dvn, hvbmab ngulv bulam hvraqb xidwn. Hvb nyiloqkam ngulv hog hwdgo ngulug yalwg Abam xil mvnyi-moiyul swwkin do?

¹⁰Ngulug nyia kog abv ngulam apo gotwq laqm mam baqm dvn ho mwlwg nyidynam pagoq ab nyinam si kvtaq pa. Hvbmabde Pwnbov soq sam ngulug atwg alko gab mwv nyidwn ho ngulam mwwg lvgab dvrwqb swwm dvb mwwdwn.

¹¹Ngulv laqm hentwram baqyikam, ngulam hog ak hog moodam muur mvdwb jidwn, hemp dvb jima dvn kokwngam, hvbsujaqkam, soq svkam laqm hengky kubv hoq nyi tulungv bulv swrsomalob nyiidar nyiib swwjo akiam kaapa tayin.

¹²Nulug vpy kunbo alaqngam irabto, ho nulug tvmdwr hwqnbo lwbwngam ator torab mvto,

¹³lvca bog alo loorwqngam biim mvma dvb ham al mvdkub lamta dinda ho wdul dooto.

¹⁴Nyi mwlwg lvgab swrsomalob swwbam dvb ho dvrwqbo nyiib swwdwb mwwto, hoggab dvrwq nyiib swwma baloqkam At Swn kaapa nyoram.

¹⁵Pwnbog anyanam hoqgv wkur kuma dvb hingkib swwto. Hiyvkam kacaqbo svvnwb nyil swwrab layil vigo mwwdwq-saqk dvb cumdwq svvnwb swwmab.

¹⁶Hiyvkam yocu-yabio nyinbo gob ho dormongam almanbo nyiib nyil Isug apiab atwg dwr butaqnam gumnam vcin kopin pengkin gob, tuup vbw yab nyistvl puqxia namhvb nyimab.

¹⁷Nulv cengdo, mwv kokw so mwwg abwg lvqc cinam mam naadwb mwwnum, hvbmabde mwam roopaq kunum, hoqgab mwv ham kaapa nyok maanum mwv hognvkam nyipa kun ham nookur nyok maanum.

¹⁸Israel nyi tulungv haanam hvb nulv nyil haamanum, bulv Sinai yorn aoho wm moily bioqdunam mam, kaiya bo doomwqngam, kan twdwqngam, doogum dooiyam,

¹⁹tuuly miqnam mam, agam yal dunam mam kaan tanbov. Nyi tulungv agam yal dunam mam tapa tvl, bulv bos banv hoq agam yal ham lokta bulam tapa dvb jimabvk hvl xumnum.

²⁰Hoggab bulv hog agam hoqg gaml jil “Hiyv sudum svrv yorn ham alaq idaqtayin, ham wlw hurx dvb” hvl benam agam mam tadwb mwwmanum.

²¹Hoq nyinam hv bos soma vrram sodwb nyinum. Hoggab Mojes benum, “Ngo bos sol tvmdwr hwqdu dvn.”

²²Hvbmabde nulv Jaiyon yornwb, nywywngam sima bo Pwnbog nampam, ao gvdag Jerusalem lwwyw-lwwyw ao gumtw tulug dookho haapa ku.

²³Nulv Pwnbog dwr buqconam ko tuup tulug hemp alwb dookumko dvrwq namlo ho hiyvg eminam ao gvdaho xeqp pakun hoqb haapa ku. Nyia koam mwlw jaqkam pw-hwwnbo albo nyi tulug Yalam niqtuq lengmbo Pwnbog dookub nulv haapa ku.

²⁴Nulv nit pvvbwg mvdar bog birnam hvvky, hoo Abelwg pwqyaqnam uiyam xibin yaanam albo ui pwqyaqnamv Jisug dookub haapa ku.

²⁵Hoqgab nulv hengab to, agam goonbo ak ham haqpaq maab, hoggab gvda gvt so Pwnbog gaml jinbo akam haqpaqbo nyi tulungv mwwg galoqkv keleq nyoram. Hvnyiloqkam ngulv hoggub ao gvda toloqgv agam goonbo ak hoqgv mwam apaqpel keleq nyotayin!

²⁶Mwv gvdangam lok agam yalwg lvgab hwqdinum, hvbmabde sija mwv dingl bedwn, “Ngo lokta gvda gvtam hwqdin yukam ngo ao gvdangam kam hwqlin tayin.

²⁷“Lokta” hvl benam agam si tadar lala dvb bedo, pwnam hoolungam hwqdin tayin hoo naapaq tayin, hvbmab hwqdin lamanam hoolungv dooky tayin.

²⁸Hoqgab ngulv hemp pomanam mam hemp polaju, hoggab ngulv hwqdin lamanam biimabo lvpw ak kaapa pakun, ngulv Pwnboam paqyalinco hvl mwwg hangam xumdwb mwam xigdvl bos sol poqkum nyiatuj.

²⁹Hoggab ngulug Pwnbov jvqtw jaqb wm hvb guxbo Pwnbov.