Read Nyishi HIBRU 13 Bible Online

HIBRU 13 - Nyishi bible

HIBRU 13

¹Kristan vbw-borwb nyil akwn akwn aby bomin sul swwto.

²Kaacin maanam nyi nyiin tulungam nulug nammwb svgagvrwq dvb mwwpa maab nyimab. Hoq nyigam gab nyi tulu gon ao gumtwngam kam bulv cengmab bulug nammwb svgagvrwq banv haal doomnum.

³Pvtwq uraho doonbo nyi tulungam mwwpato, nulvkam bulug lvgab pvtwq uraho doomin gvnam hwiywb mwwto. Hentwr nyelin duqn bo nyi tulungam mwwpa to, nulvkam bulug hvb hentwr nyelin henbo hwiywb mwwto.

⁴Nyem-nyena naanamv mwlwg xinamv. Nywxw nyolv akwn akwn mwwjw minsul swwdwb nyidwn. Yocu-yabio nyin boam ho nyi asaqg nyem mam yocu-yabio nyil naareq boam Pwnbov bulam pw-hwwtayin.

⁵Twngkam aby bol swwnam hoqgv nulv aado to, nulug lvgab hognvkv doodwn hoqho nulug hangv xumtwl dooto. Hoggab Pwnbov bedwn, “Ngo nam nywywngam apaqram; ngo nam nywywngam paqxia tama.”

⁶Hoqgab ngulv haakam alwb mwwgdvl betju, “At Sw ngam svka bov, ngo bos dvb nyiram. Hiyv ngam hog mvnyitayin?”

⁷Nulam otuqho Pwnbog Tugu puiyam bekinbo, nulam nyig-wgbo nyi tulungam mwwpato. Bulv hoggub nyil swwnum hoo siknum ham kookur kaato hoo bulug mwwjwnam mam kaagwl swwto.

⁸Jisu Kristo moiyo kam, soolo kam hoo nwrba gob hvraqb dooky tayin.

⁹Luusaq-luusaqb tomswrnam tulu hoqgv booxar kumabv, hoggab dvs tulu hoqgv ma, hvbmabde anya hoqgv hang urangam ator dvb mvnamv alyadwn, hoq tulu ham haagab jaqb nyin bov niqtuq lengk ma.

¹⁰Juhudi tulug Pwnboam guukho guunbo nyubv yugw ho guunam mam hog gokam dvdwb nyimanum.

¹¹Juhudi tulug Nyub But akv sibin-sviya uiyam beal Mwlwngam Dvrwq yaanbo cwwrw urab haal ham nyicgab guun taab haadwn. Hvbmabde sibin-sviya gv vpam agaho wm parxianum.

¹²Soq pagoq gab Jisu kam nampam hoqgv aado ho mwwg atwg uiyv nyi tulungam bulug nyiv hoqgv nyedar darxaq dvb sinum.

¹³Hoqgab ngulv kam mwwg lvgab mwwg hvnyw-haram hemba dvb agab mootum doonu koob lengba nuj.

¹⁴Hoqgab ngulug gab soq gvda so dooyu deenam nampam dooma, hvbmabde ngulv haady bo nampam ak kaayal doodwn.

¹⁵Hoqgab ngulv looxiam Jisu galoqkv hirin rinnam hwiywb ngul agamv Pwnboam paqgdvl mwwg eminam xuml mwam Atv hvl kaacin tuju.

¹⁶Albo bonam nyidwb mwwpa maab nyimabv ho akwn akwn svka kamin sunam mam mwwpa maab nyimabv, hoggab soq torab si Pwnboam hang xumdub guunanv.

¹⁷Nulam nyig-wg boam xigdvl bulug gaml jinam mam tal swwto. Bulv nulam rvkil nulug Yalam kaayal doonu majaqb doodwn, hoggab bulv Pwnboam bulug bon bonam nyinam mam xikin jidub nyiky dvn. Nulv bulug benam mam taab nyiloqkam bulv bulug bon bonam hemp alwb nyitayin; hvbmabde nulv bulug benam mam tama baloqkam bulv muur alwl bonam nyitayin. Hoqhvb bonam nyinamsi nulgab haajaqb alram.

¹⁸Ngulug gab nulv Pwnboam xuml dooto. Ngulv jvqtw jaqb cengdwn, ngulv hindy pwcwl ngulug mwwnam albo bonam aal looxiam kvtaq jaqb nyidwb mwwdo.

¹⁹Ngo nulam ator jaqb ngoqgab xumt bek hvl mvnyi-moiyul bedwn. Ngam Pwnbov nulug dookub vnwqb bookur mvdkub jimto.

²⁰At Swam hirin rinsul siyw bo, sviya tulungam rvkybo Koi Albo, ngulug At Sw Jisu Kriston Sik boam Pwnbov turdkub purab kunum, ho nwrba cwtam hoqgv nwrba gob pvvbam daapo poorwl ap pakun. Swrsomalongam doogbo Pwnbov nulam nulug pwwmanam mwlwngam alyanbo jis jaqkam nulam mwwg bonam nyimdvb jignvka, ho mwv Jisu Kristo galoqkv ngulug uraso mwam hang xumdwb niqtuq nyilin mvdwb jitka. Kuiyum mam nwrba cwtam nagub Kristog eminam yuukil doonka! Amen.

²²Ngoqg vbw-bor tulu, ngo nulam mvnyi-moiyul xuml bedwn, ngoqg soq biywr-bebianam pui gaml sam hindy alwb tagabto, hoggab soq ngoqg nulam pota xeqnam taqsi aaso haajaq ma.

²³Ngo nulam bekin nwwdo, ngulug bor Timotinvn pvtwq ura hoqgv tolin paku. Mwv vnwqb haaba loqkam, ngo nulam mwwg lvgab lokub kaapa tayin.

²⁴Ngulug salam mam nulam nyig-wgbo mwlwngam ho Pwnbog dvrwqbo nyi tulungam jitka. Itali soq doonbo vbw-bor tulungv nulam bulv salam jilwqdo. Pwnbog anyangv nul mwlwg lvgab dooba nvka.