Read Nyishi HIBRU 2 Bible Online

HIBRU 2 - Nyishi bible

HIBRU 2

¹Hoqgab ngulv vdwjaqb ngulug tapa kunam jvqtw agam mam hengab jaqb mwwjwl nootul doog dvb nyidwn. Hoggab hiyv cengdwn lamtangam wngo pel wkur dvb nyinv sukam yv.

²Ngulug ab-ann tulungam ao gumtwngv bekin kunam puiyv jvqtw jaqkv lengpa ku; hiyv nyiv sam tamanum ho haqnum hoq nyiv mwwg tama ko-gab laqm baqdynam mam mwv baqnum.

³Soq koi albo ywwt ywwnam sam ngulv tagab maab tvmwl apaq baloqkam ngulv hoggub nyil keleq nyotayin? Soq ywwt ywwnam pui sam otuqjaqb At Sw mwv at jaqkv bekinnum, hoqgv mwwg bekinam mam tanbo nyi tulungv ngulam jvqtw jaqb bekindo, soq si jvqtwngv hvl.

⁴Hoq lvgab Pwnbov swrdorxeqb nyima-wmanam deedy luuxiam nyil kaakin banv, Pwnbog mwwg atwg mwwlwqkob mwwg Dvrwqbo Yalam aky horbnv mwwg bon nyinam pagoqkam lengnum.

⁵Ngulug googdvn si haata bo nitbo gvda gvtam ao gumtw tulungam bemdvb Pwnbov bulug alaqho jima pan.

⁶Hvbmabde Dvrwqbo Potalo hog golo xeqnamv doodwn: “Nyia kov hognvkv, Pwnbo, no mwwg pagoqkam mwwdwq dvn, ho nyia koam hog nyitwl no gab mwwdwq dwqdwn?

⁷No mwam ao gumtw tulungam vcwr koggo anyo yvvtwq dvb pwnum; no nyia koam swsw-sangam yuupw dvb nyet-nyetam xilo abwb nyil swwdwb jinum,

⁸hoo nyia koam no hog mwlwngam mwwg alaqho bemdvb jinum.” Si hvl benamv doodo, Pwnbov nyiam, “hog mwlwngam bvvm dvb jinum”; hvgdvn si, hog mwlw luuxiam dardarjaqb betaqpa. Hvbsujaqkam nyiam ngulv sija hog mwlwngam mwwg alaqho bvvnam mam kaapa ma.

⁹Hvbmabde oyu maadab ao gumtw tulungam anyo yaadwb mvnam, Pwnbog anyanam galoqkv mwv nyi vxig pagoq gab sidbo Jisun ngulv kaapa gvdo. Mwwg sinam gab, ngulv sija mwam swsw-saab yuupwl xil yuunam mam tapa do

¹⁰Hog mwlwngam pwnbo alaqlo bvvnbo Pwnbov Jisun mwwg hentwr henam hoqgv mwwg yuunam gumnam naaba mvdwb vigo nyi lo mwwg ko tuupwb swwm dvb boamdvb nyinam sam Pwnbov kvtaqb nyinam go. Hoggab bulam ywwt ywwnam mam kaapa mvdwb jinbov Jisu.

¹¹Mwv nyi tulungam bulug nyicam nyedar darxaq dvn, hoqgv mwv la mwwg nyedar darxaqnam nyi tulungv mwlwjaqkv Ab akin hoqgv. Hoggab Jisu bulam mwwg vbw-borv hvl goqsam hvnyw maadwn.

¹²Mwv Pwnboam bedwn, “Hoggv no nyij pakun, ngoqg nyiilungam ngo betayin; bulug dookumko ho nam ngo paqtayin.”

¹³Mwv hvl kam Pwnboam bedwn. “Ngo ngoqg mwwjwngam Pwnbog aoho aptayin.” Ho hoq aob hvl kam bedwn, “Pwnbov ngam jinam ko tulug lvgab ngo si doodwn.”

¹⁴Mwwg ko tulungv, hvl goqnam nyi tuluhv bulug gv soodinv la uiyv nyiakob nyidwn, Jisu mwv atv bulug hvbkalam swly kunum ho nyiakog soodin ayaqngam baqnum. Mwv soq sam nyinam si mwwg sinam hoqgv sigam doogbo uiyam mwwg atoram twrdwb

¹⁵ho sinam mam bos sol, bulug swwca lo nyerab swwl dooknam hoqgab yuudub mwv siywnum.

¹⁶Hoggab soq sam jvqtw jaqb cengdwb nyido, mwv ao gumtw tulungam svka dvb ma, hvbmabde mwv Abraham gv ko hosiq tulungam svka dvn.

¹⁷Hvgdvn si, mwv mwwg vbw-bor tulug nyuqtuq-mooram guss dvb nyidwb nyiknum. Bulug mwwjwnam ho aya albo Nyub But akgob nyil nyi tulug nyicam apaq mvdwb Pwnbog kaagaho bon nyidwb nyinum.

¹⁸Ho sija mwv pooka-yirkanam nyi tulungam svka tayin, hoggab mwam at jaqkam pooka-yirkanum ho hentwram hendwb nyinum.