Read Nyishi HIBRU 3 Bible Online

HIBRU 3 - Nyishi bible

HIBRU 3

¹Pwnbog dvgoq goqnam ngoqg Kristan vbw-bor tulu, ngulug googdvn mwwjwnam soqg pagoq so, Pwnbov kanamnam Nyub But ak hoq Jisug bvrwq sam mwwdy koto.

²Mwam soq bon sam nyimdvb hvl xuqlinbo Pwnboam, Mojes hoggub nyil Pwnbog kaagaho mwwjw albo nyi gob nyil Pwnbog namho bon nyinum, hvbkalam mwv Pwnboam mwwjwnum.

³Nam mvnbo akam paqnam hwdgo nammam paqma dvn. Hoq hvbkalam Mojesnvn laabo yaab Jisun paqbin yaadwb nyidwn.

⁴Hvbsujaqkam nammam mvnbo nyiv doodwn, hvbmab hoolu luuxiam mvnbov Pwnbov doodwn.

⁵Mojes Pwnbog namlo mwwjwnam nyera akgob nyimnum, ho mwv kokwngam Pwnbov bedynam mam bekinnum.

⁶Hvbmabde Kristo Pwnbog Ko Tuupwb nyigam gab Pwnbog nammam kaaya bo atv. Ngulug hang uraso mwwgwngam haakam alwb mwwjwl apnam hv sulak mwwg hoq nam hv.

⁷Hoggab, Dvrwqbo Yalv bedwn, “Nulv soolo Pwnbog agam goqnam mam tapa panyiloqkam,

⁸Pwnbog ceebiob nulug kolwg ab-ann tulungv nyinam hvb nulug hangam vdw maabv, ho deexa-raralo Pwnboam pookanam hvb nyimab.

⁹Hogloq ho nulug ab tulungv ngam pooka-yirkal hoo ngoqg nyis tulungam kaapa kunum.

¹⁰Hoqgab ngo hang lengb nv benum, “Soq nyi tulu si looxiam hang mwwjw maanbov, bulv ngoqg gaml tadwn mwwma dvn.”

¹¹Hoqgab ngo hang lengb nv bir pan, “Bulv nywywngam ngo bulam jitanam doonu ko gvdangam kaapa kuram!”

¹²Ngoqg tumanam mwwjwbo ajin tulu nulug pengko lo hang almanbo hang baqnbo ho mwwjw maanbo nyi akukam doom maab hoo turl doonbo Pwnbog dook hoqgv wkur mvdwb jimab, ham hengab to.

¹³Hvbmabde nulug pengko hoqgv hiyv nvkam nyicam pwqk maab ho hangam vdw dvb mvk maab hengab to ho nulv akwn looxiam svka kamin suto, ho Dvrwqbo Potangv benam, “Soolog aal so” hvl benam agam si doody deedib, si ngulam bedwn.

¹⁴Hoggab ngulv mwlwngv Kristog dvpar hoqg nyia kov hvl ator jaqb otuqho nyirab dvkho nyinam hvb mwwjwl doob nyiloqkam, homoloq ngulv Kristog dvpar hoqg nyiib nyitayin.

¹⁵Hoqgab Dvrwqbo Potangv bedwn, “Pwnbog agam mam nulv soolo tapa panyiloqkam, Pwnbog ceebiob hang baqnbo nyi tulug nyinam hvb nulug hangam vdw maab.”

¹⁶Soq agam sam Pwnbog galoqkv tatwl hiyv nyiv mwam tamab Pwnbog yaab nyinum? Mojesg Ijipt gvda hoqgv boolin kunam nyi tulungv.

¹⁷Hiyvg nyiam Pwnbov vnyw campigo hang lengl doonum? Diixa-raraho nyic nyil sinbo nyi tulug lvgab.

¹⁸Pwnbov bitwram bel birwl benum, “Bulv nywywngam ngo bulam jidwb hvl benam birnam doonu ko gvdangam kaaparam.” Hiyvg pagoqkam mwv soq sam begdvn? Pwnboam ceebio hang baqnbo nyi tulungam.

¹⁹Hoqgab ngulv kaapa gvdo, bulv hoq gvdangam kaapal haanyi kumab nyiknum, hoggab bulv mwwjw maanum.