Read Nyishi HIBRU 4 Bible Online

HIBRU 4 - Nyishi bible

HIBRU 4

¹Sija, Pwnbov ngulam jitayin hvl birwl apnam doonunam jipa ku. Hoggab sija ngulv mwwg birwl doonunam mam jinam sam hengab aptuj, ho nulug pengko hiyvkam hoq birwl apnam doonunam ham kaapa maadwb nyidwb nyima dvb hengab doonyia to.

²Bulv hoggub nyil Tugu Puiyam tapanum hvbkalam ngulv kam hvb nyil tapanum. Bulv puiyam tapa sunum, hvbmab bulv ham tatwl mwwjwl svgagvrwq maagam gab hoq puiyv niqtuq dook maanum.

³Ngulv hiyv xeq tatwl mwwjw pakun, Pwnbov birwl apnam, ngulam jitanam doonunam ham kaapa tayin. Hoqgab mwv benum, “Ngo hang lengnum hoo dingtw jaqb dingtkun; Bulv nywywngam ngoqg bulam jitanam doonu ko gvdangam bulv kaapal haanyiram!’” Mwv gvda gvtam pwnam mam pwrab dvk mood daqho pwnam bonam nyiyum kunum.

⁴Dvrwqbo Potangv hog golo aal kvnwg pagoqkam bepwl apnamv, “Pwnbov aal kvn deen aalho mwwg bonam nyinam mwlw hoqgv doonu kunum.”

⁵Soq pagoq goqkin sam akta xeqpnamv doodwn, “Bulv nywywngam ngo bulam doonu dvb jitanam ngoqg doonu ko gvdangam kaapal haanyiram.”

⁶Tugu puiyam otuqcob tapa bo nyi tulungv soq doonunam sam kaapa maanum, hoggab bulv tamab mwwjw maab nyinum. Hvbmab nyi tulu gon sam kaapa mvdwb jipan. Hvbmab nyi tulu gon sam kaapa mvdwb jipan.

⁷Hoqgab Pwnbov aal loosaq ak xil ap pakun, sam “Soolo” hvl begdvn. Vnywngv vigo wxo kokw so otuqho beknam hvb Pwnbov Debid agam hoqgv benum, “Pwnbog agam mam nulv soolo tapa panyiloqkam nulug hangv vdw maabv.”

⁸Hoggab Josua Pwnbog birwl apnam doonunam mam nyi tulungam jinyiloqkam Pwnbov kokw so aal loosaq bvrwq sam beram.

⁹Hvbsujaqkam sija hvraqb Pwnbov nyi tulu gab Pwnbov aal kvn deenho doonunam hvb doonunam aalv doodwn.

¹⁰Hoggab hiyv nyiv Pwnbog birwl doonunam ham kaapa pan hoq nyi hv Pwnbov mwwg nyis tulungam nyinam hoqgv doonunam hvbkalam mwv doonu tayin.

¹¹Hoqgab ngulv kam hoq doonunam ham kaapa dvb kwrwb nyitju, ngulug pengko soqgv hiyvkam, bulug nyinam hvb mwwjwnam dooma ko-gab doonunam mam kaapa maab akukam nyima buj.

¹²Pwnbog agamv turnbo ho kwrwb bon nyinbov, lyoqgw lyoqar kaadar maab areqbo lyoqr orioqngam areq yaadwn. Si yvjam kam ho Yalam kam, alo loonyiq looram piipeq bov, si nyiakog hang mwwbynam mam ho mwwsnam mam kaacin dvn,

¹³hog akkam Pwnbog vnyiq kaapa ko hoqgv kvsil apdvb nyima dvn ho pwnam luuxiv Pwnbog kaagaho dol lonam hvb nyidwn ho Pwnbog vnyiq kaagaho hog mwlwngv asarb talo tvl doodwn. Hoqgab ngulv mwlwngv mwam ngulug at atwg xootwram cingkinl kaakin dvb nyiky tayin.

¹⁴Hoqgab ngulv mwwjw kunam mwwjwnam sam vdwb gvbwl doogtuj. Hoggab ngulug nyub But koi albo ak doodwn, mwv Pwnbog dook ura jaqhv hvvc pakun, Jisu Pwnbog Ko Tuupv.

¹⁵Ngulug Nyub But ak si ngulug laanyi maakho aya mwwpa maab nyinbo ma. Hvbmab ngulug doognam Nyub But akkam ngulam nyinam hvb mwam deedy luuxib pooka-yirkanum, hvbsujaqkam mwv nyic nyimanum.

¹⁶Hoqgab ngulv haakam alwb Pwnbog pwqlw ogumb anyangam kaapa dvb hvvnwq nyanuj. Hoq aalam ngulv ayangam kaapa tayin hoo abiam kaapal ngulug xumdwl dood jaqkam naadwb altayin.