Read Nyishi HIBRU 5 Bible Online

HIBRU 5 - Nyishi bible

HIBRU 5

¹Nyub But vxiam nyi tulug pengko hoqgv xuqlin banv nyi tulug nyid gab bulug nyic nyinam mam Pwnbog agaho aky beal Pwnboam guum dvb xuqlin pan.

²Mwvkam vigo almab nyixiaq wxiaqngv doognum, mwv cengmabo nyi tulug nyimur-wmuram dama dvb nyidwn.

³Ho mwv atv almab nyik gab mwv nyi tulug nyic gab aro Pwnboam guudwb nyima, hvbmabde mwwg atwg nyic gabkam Pwnboam xumdwb nyidwn.

⁴Hiyvkam atam paqk dvb Nyub Butub swwma dvn. Hvbmabde Pwnbov dvgoq goqnam nyi akv Nyub But swwdwn. Aaronnvn kam soq sib goqnum.

⁵Hoq hvbkalam Kristo mwv atv Nyub But gab mwam paqnam sam naas maanum. Hvbmabde Pwnbov mwam benum, “No ngoqg Ko tuupv; Soolo gv ngo noqg Abwb nyidkun.”

⁶Mwv akta benamv doodwn, “No nwrba xaqb nyub akv Melkijedek swwtungam nyub swwkil dootayin.”

⁷Gvda gvt so doodwkho Jisu mwv nyiqs dil, xabl, sinam hoqgv ywwd bo Pwnboam swgwl benum, mwv Pwnboam bos sol xuml swwgam gab Pwnbov mwwg xuml konam mam tanum.

⁸Hvbmabde mwv Pwnbog Ko Tuupwb nyijaqkam mwv hentwram hembnv Pwnboam bugil gamlam tal swwnum.

⁹Kokw so mwam pwbw dukub mvxo so, mwwg gamlam tal swwnbo nyi tulu mwlw gab mwv nwrba cwtam ywwt ywwnam mam doogbo ab gob nyiknum,

¹⁰hoggab Pwnbov mwam Melkijedek Nyub But Swwtungam swwnbo akgob loorwl loobwq kunum.

¹¹Ngulv nulam vigo soq pagoq so besv doodwn, hvbmabde nulam bisbexaqdo, hoggab nulv nyorib tacin lama do.

¹²Nulug pengko hoqgv tomswrbo nyi lengd moodv wleq paku, hvbmabde sija godab nulam Pwnbog puiyam otuqjaqb gamt tolinl bekin deenam ham hvraqb nulam sijakam nyiv tomswr xiqdwb nyixiqdo. Sija nulv atorbo dvsam dviyin paku, hvbmab hvraqb nulv gwwi twwdul dooxiq do.

¹³Hiyv nyiv gwwi twwxiq dvn mwv ko hoiyin nyidwn, mwv al-korv hognvkv ham vcwr gokam cengma daqdwn.

¹⁴Hvbmabde atorbo dvshv nyi axabo gab doodwn ho ham dvnyioqbo nyi tulungv alboam la alman boam kaalaq dvn.