Read Nyishi HIBRU 6 Bible Online

HIBRU 6 - Nyishi bible

HIBRU 6

¹Hoqgab ngulv Kristog pui vmwqngam tomswrnam pagoqkam apaq tukul nyi axab nyil pwbwb swwtju. Ngulv apaq kunam almanbo nyis tulungam nyinam hoqgv mwwkurl, Pwnboam mwwjwnam,

²baptijumg pagoqkam, alaq idaqnam, sinam hoqgv turkurnam ho nwrba cwtam pw-hwwnam bvrwqngam bidu takmab hoq tulungam niqtuq nyilin dvb kwrwb bon nyitju.

³Ngulug Pwnbov ngulam nyimdvb jiloqkam ngulv sam nyil wtayin.

⁴Hoggub nyil atwg mwwjw kunam mwwjwngam apaq kunbo nyi tulungam lokta mwwkur mvdwb bookur nyotayin? Bulv lok Pwnbog huto uraho doonum, bulv Pwnbog lvpw akiam kaakanum, Dvrwqbo yalwg akiam kaapanum.

⁵Bulv Pwnbog agamv aldvn hvl cengknum ho haata bo mood hoq atoram kam cengnum.

⁶Hvbsujaqkam bulv mwwjw kunam mwwjwngam apaq pakun. Sija bulam lokta mwwkur tukuk hvl bookurnam bvrwq si hogram, hoggab bulv Pwnbog Ko Tuupam lokta daapo aotv mengdo, ho nyi tulug kaagaho hvnyw-har nyisu gvdo.

⁷Hoggab hogloq kedho nyodongv hodaq kvlaql hoky dvn, hoq kedho rongo mvnbo oongv la svvnv swwdwn ham Pwnbov lvqc cidwn.

⁸Hvbmabde kedho taa-ngv la ww-ngv swwb nyiloqkam hoqhv niqtuq dooram, ham Pwnbov beetayin ho kokwngam wm rwlwq tvl guxia mvtayin.

⁹Ngulug tumanam, ngulv soq sib nulam agam goos jaqkam, nulv biimab doodnvbo ho nulug swwkorb ywwt ywwnam niqtuqkv aldvn pvbo hvl jvqtw jaqb mwwjwdvn.

¹⁰Pwnbov nulug bonam nyinam mam mwwpa maab nyima dvn. Pwnbov almab nyima dvn nulv mwwg emin gab nulug Kristan ajin tulungam svka kaanam mam ho bulam aby bonam mam ho sijakam nulug ham nyidul doonam mam mwv mwwgab doodwn.

¹¹Ngulv vigo nulug mwwgwnam mam niqtuq lengm dvb mwwdwn nulv vxiv nulug hoq mwwgwnam ham kol godab ap gvn nvnwp mwwdo.

¹²Ngulug jaamanam bvrwqngam vcwr gokam mwwby maadwn, hvbmabde mwwjwl jwwlaqbo nyi tulug nyinam hvb nyil Pwnbog birwl ap kunam mam kaapa bo nyi tulu gob nyinka hvl ngulv mwwdwn.

¹³Pwnbov Abrahamnvn dingl benum, ngo hognvkv birwl ap pakun ham niqtuq nyintayin. Pwnboam mwwg aoho mwam koi yaanbo akukam dooma dvn, hoqgab mwwg atwg eminam besbanv mwv ding dwkho dingnum.

¹⁴Mwv benum, “Ngo nam bitwdvn, nam ngo lvqc citayin ho noqg ko hosiqlo vigo lengm tayin.”

¹⁵Abraham cwqbnv kaayal doonum ho Pwnbov birnam hvbkalam mwv kokw so kaapa kunum.

¹⁶Hiyv akgon ding yukam, mwv mwam koi yaanbo nyi akgonwg eminam bel dingdwn ho hoq dingnamv hog mwlw yolungam pvvb padwn.

¹⁷Pwnbov birwl apnam mam kaapa deenbo nyi tulungam Pwnbov mwwg birnam bvrwqngam biimab apdvn ho mwv nywywngam kwly maadnvk hvl hoq aoho mwv dingtum kunv bedarnum.

¹⁸Hoggab soq agam gomnyi si doodwn, Pwnbov kwly maadwn, ho xaalyob bema dvn. Hoqgab mwwg uraho kvs sigwl doon bov ngulv mwwg galoqkv vigo haakam alwb ngulug otuqlo doonbo mwwjwnam mam hingky jaqb hengab nyialaju. Ngulv soq mwwgwnam sam ngulug yalwg swwgw tooky ab gob hingw dvn.

¹⁹Soq mwwgwnam si swwgv ho jvqtwngv, soq si Pwnbog lvpw xumk nam uraho vj torciql apnam ura jaqb haadwn.

²⁰Ngulug hoodgab Jisu hoq urab ngulug otuqb haaco kunv, Melkijedekg nyinam hvb, hoq kwlib kol nwrba gob Nyub But gob swwpa kun.