Read Nyishi HIBRU 7 Bible Online

HIBRU 7 - Nyishi bible

HIBRU 7

¹Sool Melkijedek si Salemg lvpw at abwb la mwlwg aoho mwlwngam koi yaanbo Pwnbog nyub akgob swwnum. Abraham lvpw at vpiam nyob pal paiya peekul wkur dukukho Melkijedek mwam kaapa banv alwb swwnka hvl lvqcnum.

²Kokw so Abraham mwwg nyob pareql naanam dvrab hoqgv Melkijedeknvn wyw hoqgv akwn jinum. (Otuqjaqb Melkijedek hvl benam hoq niqtuqkv “Nyiidar albog Lvpw atv,” hoggab mwv Salemg lvpw abwb swwnum. Mwwg emin akwn hoqg niqtuqkv “Swrsomalog Lvpw Abv” hvl kam benum.)

³Melkijedekg ab ann emin gokam xeqnam dooma, mwwg nwdam kam xeqnam dooma, ko bwwnam ho sinam pui gokam doonam kaapa ma. Mwv kol nwrba gob Pwnbog Ko Tuup jaqhvb nyub akgon swwl dood kun.

⁴Hoqgab nulv mwwkato, mwv hog hwdgo koibo nyiv. Hoggab ngulug xikynam mwlwg cengnam kolwg at ab Abraham mwwg nyob pareqnam gumn hoqgv wyw taqt hoqgv akwn mwam akib jinum.

⁵Hvbmabde nyub swwnbo Lebi nyi tulungv bulug ko hosiam pvvbv wyw taqt hoqgv akwn Israel gvdag atwg nyi tulug hoqgv kotwk hvl gaml jigam gab konum, hvbmabde bulv kam Abraham gv ko hosiqkv.

⁶Melkijedek nyub swwnbo Lebi nyi dvpar hoqg ko hosiq ma, hvbjaqkam mwv Abraham galoqkv wyw taqt hoqgv akwn naanum ho Pwnbog birwl ap kunam mam kaapa bo nyi akam Abrahamnvn mwv lvqc cinum.

⁷Nyi anyobov koibo galoqkv lvqc cikdvn ham bidum dvb nyima.

⁸Soq wyw taqt soqgv akwn jinam sam nyiv naanum, ho hoq nyi tulungv sidy bov, hvbmab Melkijedekg wyw taqt hoqgv akwn naanbo akv simab turl doodnvk hvl Dvrwqbo Potangv bedwn.

⁹Wyw taqt hoqgv akwn naanbo Lebi, mwv atvkam wyw taqt hoqgv akwn jinum, hoggab Lebinvn dwr buqma daqs bakam mwv Abraham galoqkv jipan.

¹⁰Hoggab mwv mwwg abwg dvqsiqbo ko hosiqkv, hwdlo Melkijedek mwam kaapa yukho.

¹¹Lebi nyi tulungam nyub swwm dvb dwr buqtaqnam soq pagoq gab hentaql pvvbam Israel nyi tulungam jil ap pan. Lebi nyi dvparg nyub swwnamv pvvbv la niqtuq doonyiloqkam Melkijedek kwlib swwsiq bo Aaron gv nwdwb toma bo luusaq nyub ak lengdwb nyikin mapan.

¹²Hoggab nyubwg dvparam apaq tukul ham mwly pakun, hoqgab pvvb bvrwq so kam oksub mwly dvb nyidwb nyipan.

¹³Hiyvg pagoqkam soq so bepan mwwg nwd sosaq hoq dvpar hoqg nyiv. Mwwg nyob dvpar hoqgv hiyvkam ak nywywngam nyub swwka bo dooma.

¹⁴Hvbmabde mwlwngv cimpwdvn, ngulug at Judag nyob hoqgv mwam dwr buqlinum. Nyub swwnam pagoqkam Mojes bedwkho soq nyob soqg bvrwqngam bepa maanum.

¹⁵Sija kaadar cekar dvb Melkijedek hvbkalam nyinbo nyub ak leng paku.

¹⁶Mwwg nyub swwnam si nyiakog nyicw-wcwb hvbma nyia kog nyegam agam gabma, hvbmabde nywywngam niimabo swwgbo ator galoqkv mwam nyub swwm dvb jipan. Dvrwqbo Potangv bedwn.

¹⁷“No nwrba xaqb nyub akv, Melkijedek kwlib nyub swwsiql dootayin,”

¹⁸Hoqgab kolwg kucuqbo niqtuq doomabo ator maanbo pvvbam apaq pakun.

¹⁹Hoqgab Mojesg pvvbv hog akukam niqtuq lengdwb mvnyi kumanum. Hoggab sija nit mwwgwnam ak jipa ku, soq galoqkv ngulv Pwnbog ogumb haadwb nyidku.

²⁰Soq aoso Pwnbov dingl apnamv kam doodwn. Otuqho nyub surbo nyi tulungam Pwnbov dingm maanum.

²¹Hvbmabde Jisu nyub swwdwk ho Pwnbov dingbnv mwam benum, “At Sw dingl bepa kun, mwwg hangv gwwram; No looxiam nwrba gob, nyub swwkil dootayin.”

²²Hoqgab Jisu nit pvvb hoqg ab jaqkv.

²³Soq pagoq so oksunam ak kaapa gvdo, nyubv vigo doonum hvbmabde bulv kokw so bulug nyub swwnam mam swwkil dook maanum, hvbmab siknum.

²⁴Hvbmabde Jisu nwrba gob swwl dooky tayin ho mwwg nyub swwnam mam hiyv nvkam jisiq kuram.

²⁵Hoqgab mwwg galoqkv Pwnbog dookub haanbo nyi tulungam ywwdwb mwwg atorv looxiam doodwn, hoggab mwv kol nwrba nagub dootayin ho mwv Pwnbog agaho bulug gab xuml kojtayin.

²⁶Hoqgab Jisu lok ngulug Nyub But jaqkv, mwv ngulug pwwmanam mam pwwdy bov. Mwv dvrwqbov, mwwgho nyicv la nyimurv dooma dvn, mwam nyic nyinbo hoqgv aado mvpa kun hoo ao gvdag aoho ap pakun.

²⁷Mwv nyub but asaq hvb nyima dvn, mwv iriq poroq mengl atwg nyic gab otuq ho nyi tulu gab kokwb guundvb nyima dvn. Mwv lvkin golo mwlw gab guutwqnum, lwnyi dvb guutin kuram, hoggab mwv atam guun supa kun.

²⁸Mojes pvvbv nyedar maanbo nyi tulungam Nyub But swwm dvb jinum, hvbmabde Pwnbov dingbnv birnamv pvvb kokwb lengnum ho Ko Tuupam kol nwrba gob niqtuq nyilin mvdwb jiknum.