Read Nyishi HIBRU 8 Bible Online

HIBRU 8 - Nyishi bible

HIBRU 8

¹Ngulug begdvn agam soq niqtuqkv si, ngulug Nyub But ak doodwn, mwv ao gvdag At Pwnbo Abwg alaq lvqbwq taqc pwqlw tv doodwn.

²Mwv mwlw jaqkam Dvrwq Yaanbo Nyub But gob nyil jvqtw tombu, nyiv mvmanam, At Swg tombu ho Pwnboam guudwn.

³Nyub But vxiam iriq-poroq mengl xumdvb xuqlin pan, hoqgab ngulug Nyub But akv kam sibin-sviya mengl Pwnboam guudwb nyidwn, hoqgab ngulug Nyub But akv kam Pwnboam xuml hog ak jisv kam dood nvbo.

⁴Mwv gvda so dooi nyiloqkam nyub gob nyil swwram, hoggab gvda si Juhudi tulug pvvbv doodo; hoqgab hoq nyicwngam nyil akiam jidy bo nyubv naleql doodo.

⁵Bulug nyubwb nyil swwl bon nyigdvn hv jvqtw jaqb ao gvda tolo nyinam mam nyiyw-nyicil nyinam yal bobongv. Soq sam nyigdvn si Mojesg nyinam akinam nyidwn. Mojes pvvb tombungam mvrab tadwkho Pwnbov mwam benum, “Yorn nyiody ao tolo ngo nam hoggub mvtwk hvl kaakinum hoq hvbjaq mvto.”

⁶Hvbmabde sija Jisun bulam koi yaadwb nyub swwm dvb jipa kun, ho nyi tulug la Pwnbog pengko ho pvvbam mvdarnam si alpa, hoggab soq so Pwnbov birwl apnam albo bvrwqngv doodwn.

⁷Otuq mvconam kucuqbo pvvb hoq nyixiaqnam dooma nyiloqkam hoggab nitbo asaq ak naadwb nyipan.

⁸Hvbmabde Pwnbov mwwg nyi tulug aoho bulug nyixiaqnam mam kaapa tvl benum, “At Sw begamv, Kaato, ngo al loog golo Israel nyi tulu ngvla Judag nyi tulug lvgab nit pvvb ak mvdarko moodv haatayin.

⁹Soq nit pvvb si ngo bulam Ijipt gvda hoqgam alaq gvbwtvl boolin dvkho, bulug ab-ann tulungam jinam pvvb hvb nyiram. Bulv ngoqg pvvb jinam mam mwwjw maanum, ho hoq pvvbam bulv hang biil mwwgab maanum.

¹⁰At Sw bedwn, soq si ngoqg Israel nyi tulug lvgab haata bo moodam ngoqg pvvb mvdynamv; Ngo bulug hang uraho ngoqg pvvbam vlwq tayin, ho bulug hvvjw-hara lo ngo soq sam xiqlwql aptayin. Ngo bulug Pwnbob swwtayin, ho bulv ngoqg nyiib nyitayin.

¹¹Bulug pengko hoqgv hiyvkam bulug atwg gutu-gorag nyi tulungam, hvbmab, mwwg nampam nyi tulungam beram, At Swn cengto, Hoggab, ko hoiyin hoqgv nyekam nagub bulv ngam cengtayin.

¹²Ngo bulug nyicam apaq jitayin, ho ngo kokwngam nywywngam bulug nyimur-wmuram mwwpa kuram.”

¹³Nit pvvb sam bepa banv Pwnbov otuq jiconam akam kucuq gab mvgnukun hoo hognvkv kucuq dvb mvgnukun, hoo alkumabov vnyiq kaaga hoqgv oyu maadab niita yukun.