Read Nyishi HIBRU 9 Bible Online

HIBRU 9 - Nyishi bible

HIBRU 9

¹Otuq jiconam pvvb hookam hoggub xumtayin hoq xumcw bvrwqngam mvpnamv doonum, ho gvda soq nyiv mvnam xumk nyook akkam doonum.

²Tombu ak torptvl, hoq haagaho doonbo cwwrw ak ham Dvrwqbo cwwrwngv hvl benum. Hoq cwwrw uraho mur apnam ak doonum. Pwnboam jinam wtwngam apnan tebol ak doonum.

³Vj torciql apnan cwwrw vnyi deenhv mwlw jaqkam Dvrwq yaanbo cwwrwngv hvl benum.

⁴Soq uraso hun yugw pvvb ak sulum parn nanv doonum, ho hun lvgab hun pvtaq ak pvvb uddumv doonum, hoq uddum uraho hun hoqgv mvnam huc ak doonum, hoq huc uraho mannangam apnum. Uddum uraho Aaron gv beqnyia pommum jurlin bo akv doonum, ho gamlam xeqpwl apnam wlw lwlyap pataq tvqnyi go doonum.

⁵Ho uddum aoho Pwnbog yuunam mam kaakin dvb, alap gvnbo korbo gumtw vnyi go nyicam apaq jik dookho, bulug alapv labgal lobyum tvl doognum. Hvbmabde sija hoq mwlw ham bii-bemil bidul dood mood kuma.

⁶Soq sib hoq tulu ham mvl apnamv doodwn, Nyub tulungv agaho doonbo cwwrwb aalwg looxiam haal bulug xumdynam bonam xumtab haadwn.

⁷Hvbmabde Nyub But akv aro uraho doonbo cwwrwb vnywngam lvkin go hoq urab haadwn. Mwv mwwg nyi nyinam gab la nyi tulungv bulug nyiip nyic ceebio hvl cengmab nyic nyik gab guunnan uiyam bvvlayil urab haadwn.

⁸Agaho doonbo cwwrwhv dood deedib mwlwngam Dvrwq yaanbo cwwrwb haapel ho dooma dvn hvl Dvrwqbo Yalv bidlalal bekin dvn.

⁹Soq nyinam si swnyw-soolog mood soqg bvrwqngam bekin dvn. Soq sib Pwnboam sibin-sviya mengl guunamv guunbo ak hoqg hangam dvrwq dvb mvma dvn,

¹⁰hoggab bulv nyedar darxaq dvbwk hvl dvnam-twwnam ho asaq asaq paxiam xeenum. Soq mwlw si kaaga-tagab aob nyinam nyicwngv, ham Pwnbov nitib nyedar nagub soq tulu si dootayin.

¹¹Hvbmabde Kristo Nyub Butub swwknv pwnam tulug pengko lo doonbo albo gab nyil haapa kun. Mwwg nyigwnan cwwrwhv koi yanbov, ho dvrwq al yaan bov; soq si nyi tombu ma, ho soq si gvda gvt soqg pwknam pengko hoqgv kama.

¹²Kristo mwv mwlwngam Dvrwq yaanbo cwwrwb lvkin go hvvtwr-haanyab haanum, hoq haadwk ho sibin hoo sviya hijum mam bvvlayil guutab haamanum, hvbmabde mwv mwwg atwg uiyam bvvl haanum, ho nwrba cwtam gob ywwt ywwnam mam ngul gab jiknum.

¹³Sibin-sviya uiyam, ho sviya koam wm parknam hoq wm muiyam kacbo nyi tulug aoho paqyaql bulam bulug nyikynam kacbo hoqgv nyedar darxaq dvnyiloqkam,

¹⁴soq si jvqtwngv nyiloqkam, hvbnyiloqkam, Kristog uiyv hog hwdgo ham koi yaab atorv dooyin pa. Mwv atam nwrba cwtam Yalwg lvga hoqkv Pwnboam jvqtw jaqb guun suknum. Mwwg uiyv ngulam niqtuq doomabo ngulug nyicw mwwcw hoqgv ngulug hang mwwnam mam dvrwq dvb mvdwn, hoqg kokwb mwv ngulam sima bo Pwnboam xuml swwm dvb jidwn.

¹⁵Soq pagoq soq gab nit pvvb birnam hvvky pootam swwl mvdar deenbov Kristo lak, ho Pwnbov dvgoq goqknam nyi tulungam Pwnbog birwl apnam nwrba cwtam gab aky lvqc cidynam lvqcam kaapa mvdwb jidy bov mwv sulak. Otuqho mvcol apnam pvvbam pvvb juqbo bo bulv nyic nyigam gab sidkub nyinum.

¹⁶Hoggab hoglo pvvb potangv doodwn, hoq mvnbo akv sipa kun hvl kaakin dvb nyidwn.

¹⁷Hoggab pvvbam mvnbo akv sixo kokw ngam mwwg pvvbv biimab doodwn, hvbmab pvvbam mvnbo akv sima baloqkam hoq pvvbv niqtuq dooma dvn.

¹⁸Hoqgab otuq mvconam pvvbv kam uiyam mvn maalo hog niqtuq doomanum.

¹⁹Otuq jaqb Mojes pvvbam la gaml jinam mam nyi tulungam bekinnum. Hoq kokwb mwv sibin-sviya uiyam issiv mviyaqtvl hissop nwmwngam la lwwcw bo topum tanam ui urahv swwbam tvl ham pvvbwg Pota aoho la nyi tulug aoho pwqyaq banv

²⁰mwv benum, “Soq si nulug gab Pwnbov birwl jinam ui biqwrnam nulam tal bugil swwtwk hvl gaml jinamv.”

²¹Hoq hvbkalam, Mojes uiyam pvvb Tombungam ho xumnan dvrab, pwcw, huku, beta mwlwg aoho paqyaqnum.

²²Jvqtw jaqb pvvbwg bekwb hog luuxiam uiyv nyedar darxaq naadwb nyidwn, ho ui lengmalo nyic nyinam mam nyedar darxaq lama dvn.

²³Hoqgab ao gvdag bvrwqngam mwsiqnam mam mwlwngam hoqhvb nyedar darxaq dvb nyidwn. Hvbmabde ao gvdalo mwlwngam soq sam koi yaanbo alboam bulam guundvb nyidwn.

²⁴Hoggab Kristo jvqtw jaqb nyi alaqngv mvnam Dvrwqbo cwwrw uraho haamanum. hvbmabde mwv ao gvdab ngulug gab Pwnbog agaho gootab caankun.

²⁵Juhudi tulug Nyub But akv mwlwngam Dvrwq yaanbo cwwrwb sibin-sviya uiyam bvvlayil vnyw nyixiam haanum. hvbmabde Kristo hoq urab atam hirin taab haadaq kvlaq maanum,

²⁶hoggab mwv hvb nyiloqkam gvda gvt sam pwdwk hoqgv sija godab vigo hentwram hempa kunv. Hvbmabde sija hog mwlw moodv hvvnwq yukam kokw so mwv kol nwrba nagub lvkin ciqnyi golo lengb nv nyicam mengtab atam hirin suknum.

²⁷Mwlwngv lok sidwb nyitayin, hoq kokwb Pwnbov pw-hwwtayin.

²⁸hoq hvbkalam Kriston nyi mwlwg nyicam baqxia mvdwb lvkin go hirin naknum. Mwv lwnyi dvb lengtayin, ho mwv nyicam mvtab lengram, hvbmabde hiyv ywwk dvb kaayal doodu dvn. Hoq nyi tulu gab haatayin.