Read Nyishi JEMS 1 Bible Online

JEMS 1 - Nyishi bible

JEMS 1

¹Pwnbog la At Sw Jisu Kristog nyera Jems galoqkv; swcw nvg gort so doonbo Pwnbog nyi tulu mwlw gab salam jidwn.

²Ngoqg vbw-bor tulu; nulam hog mwlw deedy luuxiv pooka-yirka bvnyiloqkam, nulv atv atam paqyalinco mwwgdvl mwwjwngam pooka-yirkanamv cwqnam mam dwr buqlin dvn hvl nulv ham hemp ponam poot jaqgob mwwto.

³Hoggab mwwjwnam hoqkv pooka-yirkanam mam mviya kubnyiloqkam, ho nulug cwqnam mam dwr buqlin dvn hvl nulv ham cengl doos do.

⁴Hoqgab nulug cwqnamv niqtuq cwqlin dvb hindib nyigdvl nyinya nagub hog gokam pwwma cimadvb nyimab hog mwlwho swwgwb nyil pwwd cidwb nyil swwn to.

⁵Hvbmabde hiyv akgon nulug pengko hoqgv pumb rwnam dooma nyiloqkam, mwv nyi mwlwngam anyal jiga alwb jinbo Pwnboam xumg dvl koto.

⁶Hvbmabde nulv mwwjw swsw gvdwl mwum maabjaq xuml nyiky dvb nyidwn. Hoggab hiyv mwwjw maab mwum dvn hoq nyi akv sa-svlo ho issam dooiyv nuubnv nuus nuutarnam hvb nyidwn.

⁷Hoqhvb nyinbo nyi akv mwv hang pwnyi gob baqnbov mwv hog mwlw nyitaqlo mwwbwq nyoma bo nyiv;

⁸hoqgab mwv At Sw galoqkv hog vcwr gokam kaapa tayin hvl mwwdwb nyiky maadwn.

⁹Jwwgw nyi akv mwam Pwnbov nyiib nyil swwm dvb jib nyiloqkam mwv hemp poto.

¹⁰Ho Nyet nyi ak hvvkam mwam Pwnbov anyo dvb mvnyiloqkam hvvkam hemp poky dvb nyitayin, hoggab nyet swwnamv nyoro hoqg svvn opu hvb niileq tayin.

¹¹Doonyiv caalin banv doonyi oggv xomrab banv svvnam kaaxy dvn, ho svvn hoqgv opungv yoql dvn, ho hoqg anyangv niidkun. Hoq hvbkalam nyet nyiam mwwg swwg moomab nyidu yukam mwam twrdwb nyitayin.

¹²Pooka ko mwlwho mwwjwl biimab doonbo nyi ak hv jaqmolo hemp podynam nyiv, hoggab mwv hoq pookanam mam mviya kubnyiloqkam Pwnbov mwam aby bonbo nyi tulungam jidwb hvl birwl ap kunam nwrba cwtam swwg akiam kaapa tayin.

¹³Ho hiyv ak gonam soq sib nyil pookal sup pubnyiloqkam mwv “Soq si Pwnbo galoqkv haadwn,” hvl bedwb nyima dvn hoggab almanbov Pwnboam sup punyi maadwn, ho Pwnbov hiyv nvkam mwv atv sup puma dvn.

¹⁴Hvbmabde nyi vxy cwram sup puk gvdwn hv atwg hangv almab mwwc-saqyal mwwgam gab la hangam pwqktvl hoqgab nyidwn.

¹⁵Kokwngam mwwg almab mwwc-saqyal mwwnamv koiyib yirab banv nyicam dwr buqlin dvn, ho nyicv vi yukam sigam dwr buqlin dvn.

¹⁶Ngoqg tumanam vbw-bor tulu! Nulv pwqkjaq maabv.

¹⁷Hog mwlw luuxy cwr albo jinyinamv la albo aky jinamv ao gvda toloqgv ipoq dvn, ao tolo huunbo takaram Pwnbo toloqgv ipoq dvn. Mwv atvkam swly maadwn ho gwwkam maadwn ho mwv ngulam apaqpel ngulug agam hoqgv wleqtvl ngulam kanho doom maadwn.

¹⁸Mwv ngulam mwwg atwg mwwlwqkob pwtwl, ngulam mwwg jvqtw agam galoqkv pwnam mwlwg pengko hoqgv ngulam otuq jaqb doom dvb mvnum.

¹⁹Ngoqg tumanam vbw-bor tulu, nulv sam mwwg gabto! Nulv vxy cwrv cox alwb tagab dvb nyiky dvn, hvbmabde nulv nyinyiaqb soqyuml bedwb nyiky dvn, ho nyebia alwb hang lengdwb nyima dvn.

²⁰Nyiig hang lengnamv Pwnbog dvrwqbo pagoqkam niqtuq nyilin maadwn.

²¹Hoqgab nulv atv almab kacbo hoqgv la hang baqnam hoqgv lengtku, ho Pwnbog alaqho atam gvqlwqtvl nulug Yalam ywwt ywwd bo agam mam nulug hang uraho vly liigab jinam mam mvnyi-moiyul svgagvrwq to.

²²Nulv agam benum mam nyurungv tvtwq tvl ham tangaql doomab, hvbmabde bon nyil kaakin to.

²³Hvbmabde hiyv lajaqkam agam mam tvtwq tvl hoqham bon nyima bov atwg nyuqm mam vrs lo mwv hoggub nyidwn hoq hvbkalam nyidwb kaasbo hvb nyidwn.

²⁴Mwv atam hindy alwb kvvdy lalal kaaspel wleq dvn, ho oyu kama dab mwwg niqtuq moorv hoggub nyidwn ham mwwpa suma bo nyi ak hvbjaq nyidwn.

²⁵Hvbmabde hiyv lajaqkam nyi tulungam nyidybo pvvbam mvlinl kvvdy lalal kaagab tvl ham hingxw cwrwl mwwpa maab nyimab, mwwgabl aptvl hoq hvbkalam bon nyinbo nyi akam Pwnbov mwwg nyinam mwlwngam lvqctayin.

²⁶Hiyv nyiv mwam dormo nyi gonyi hvl mwwtayin? Mwv mwwg atwg agam mam mvtur nyoma bvnyiloqkam mwwg dormongvkam niqtuq dooma dvn, hvbmabde mwv atv atam vm mvvs dvn.

²⁷Hognvkam Pwnbog Abv dvrwqbo hoo albo dormongv hvl benam hv xwwmy hopin tulungam bulug nyelin dors hvdam kvvyw-tadal kaanam mvla atam gvda gvtwg surdornyib nyinam hoqgv aado ho dooto.