Read Nyishi JEMS 2 Bible Online

JEMS 2 - Nyishi bible

JEMS 2

¹Ngoqg vbw-bor tulu! Ngulug At Sw Jisu Kriston mwwjwbo nyiib mwwk dvb nyigam gab, yuugnam At Sw, nulv nyi tulungam bulug nyuqtuq-moor rooxongam kaal nyimabv.

²Mwwkato, nyet nyi ak hun lvqc gvtwl, hoqgv kangam bo vj kootwl dookum golo haado, kokw so jwwgw nyi akv kam vj jiiyinam kootwl haadwn.

³Ho nulv vj hindib koonbo akam xibin yaabnv mwam bedwn “Mwlwjaqkam al yaanbo soq dootam so dooto,” hvbmabde no jwwgw nyi akam bedwn, “Soq so daqto, hvbmaloqkam ngoqg lvpia lwkwg ked so dooto.”

⁴Hvb nyiloqkam nulv nulug pengko ho koi anyo ko xuql akin xitwl akin ximab nyidwn, hoq nyinam hv nulv mwwnyi-saqyal mwwl nyidwn.

⁵Ngoqg tumanam vbw-bor tulu, tagabto Pwnbov gvda gvt soqg jwwgw nyi tulungam bulug mwwjwngam jwwkam alwl swwm dvb la mwam aby bonbo tulungam mwwg lvpw hatiam bem dvb bulam birwl apnam mam jidwb bulam xuqnum.

⁶Hvbmabde nulv jwwgw nyi tulungam xima! Nulam hiyv nyibum nyiyiql saab agaho siilwq dvn? Nyetbo nyi tulungv mas i?

⁷Bulv lak nulam bec-beyal nulug ceebiob baql nulam emin albo jinam mam hang baqdwn.

⁸Nulv dvrwqbo potalo xeqpwl apnam hvbkalam nulv lvpw hatig pvvbam tal ham bugil swwb nyiloqkam nulv nyidynam nyis poot jaqkam nyidwn “Noqg gutu-gorag nyi tulungam no atam aby sunam hvbjaq aby boto,” hvl benam mam nyipa kun.

⁹Hvbmabde nulv nyi tulungam aob nyuqtuq nyuqm rooxongam kaab nyiloqkam nulv nyic nyipan, ho nulam pvvbam juqbo bogub betayin, ho pvvbv nulam mvpaq tayin.

¹⁰Hiyv lajaqkam birwl apnam pvvbam akin gonjaqkam pvvb juqbo dvn, mwv mwlwngam pvvb juqbo pakun.

¹¹Hoqgab, “Nywxw-nyolv bwwxin minsmabv” hvl benbo akinv “Nyi mengmabv” hvl kam benum. No nywxw nyolam bwwxin maasjaqkam, no nyi mengb nyiloqkam no pvvbam juqbo bogub nyidkun.

¹²Nyi tulungam pvvb lvgab pw-hwwl naalin tanam nyi tulug hvb agam benam kalam hvb bon nyito.

¹³Hoggab Pwnbov nyi aya maanboam mwv pw-hwwikam hoq nyi ham aya mwwpa ram, hvbmabde ayanamv pw-hwwnam mam mviya dvn.

¹⁴Ngoqg vbw-bor tulu, nyi tuugin gab ngoqg mwwjwngv doodwn hvl benam si aldvn, hvbmabde mwwg mwwjwngam nyis tulungam nyil kaakin maab nyiloqkam, hoq mwwjwngv mwam ywwny tayin i?

¹⁵Bwrm bor gon vj koos doomab la dvs doomab doom tvl bulam nulv,

¹⁶“Pwnbov nulam lvqc citka!” Og dvb aptvka, ho hindib dvdwb jitka, hvl nulv bulam hog koos buqs hoo dvs-twws jima baloqkam hognvk niqtuqkv doodwn?

¹⁷Hoqgab mwwjwnam arongv vpwb hoqg lvgab hog nyis tulungam nyinam dooma baloqkam, hv niqtuq dooma dvn, hvbmabde sidkun.

¹⁸Hvbmabde nyi tuugin betayin, “Nyi akgon mwwjwngv doodwn ho nyi akgon nyis tulungam nyinamv doodwn.” Ngo betayin, “Nyis tulungv dooma jaqb hoggub nyil mwwjwngam nyiv doog nyotayin. Ngo nam ngoqg mwwjwngam nyis tulungam nyigdvl kaakin tayin.”

¹⁹Pwnbov akin go doodwn hvl no mwwjw maadwn i? Alpa! Uiyv kam Pwnbov akin gotwq hvl mwwjwdvn, hoo mwwg agaho bos sol tvmdwr hwqdwn.

²⁰Asoq paca is! Mwwjwngv nyis tulungam doog maalo niqtuq dooma dvn ham no kaakin konw dvn?

²¹Ngulug ab Abraham hoggub nyil mwwg ko Aisaknvn Pwnboam gul hirin dvb yugw aoho apwl kaakin banv mwv dormo nyiv hvl Pwnbov mwam xiknum.

²²Mwwg mwwjwnamv la nyis tulungam lokub nyikab subnv mwwg mwwjwnam mam nyis tulungam nyibnv nyidil kaakinum.

²³Hoo dvrwqbo potalo bepwl apnam hvbkalam jvqtw jaqb hoqg niqtuqngv lengknum, “Abraham Pwnboam mwwjwnum, hoggab Pwnbov mwwg mwwjw ko-gab mwam dormo nyiv hvl xiknum.” Hoggab Abrahamnvn Pwnbog ajinv hvl goqnum.

²⁴Nyiam nyis tulungam nyik gab xigdvn, hvbmabde mwwjw ko-gab aro twqma.

²⁵Soq nyinam akin sibkalam meqjo bo Rahab kam, Israel tulug mvqky-maqlam runboam svgagvrwql svka banv bulam kvsil lamta basaqb keleq mvdwb svkal mwnwg nyis tulungam nyik galoqkv mwnwn Pwnbog lvgab al pakun hvl xiknum.

²⁶Hoqgab, Yalv dooma lo gv vpv sidkun, hoq hvbkalam mwwjwnamv nyis tulu nyinam mam doog maalo sidkun.