Read Nyishi JEMS 3 Bible Online

JEMS 3 - Nyishi bible

JEMS 3

¹Ngoqg vbw-bor tulu, nulug pengko lo viyagon tomswrbo gub swwdwb nyima dvn, hoggab nulv atv cengdwn ngulam tomswrbo tulungam nyi asaqngam pw-hwwnam hvb pw-hwwram hvbmab ngulam oksub pw-hwwdy lalal vcjaqb pw-hwwtayin.

²Ngul mwlwngv vi yaanv nyixiaqngam nyiky dvn. Hiyv nyiv lokukam nyixiaq maadwn, hoq akwg benam nyi hv kvtaq dvn, hoo mwv mwwg gv dorpwngam kam mvtur sudwn.

³Ngulv svpuram ngulug benam mam tamdvb mwwg agam mam tag kvrlwq tvl ngulug wb mwwkwb mwam wwm dvb mvgdvn.

⁴Hoq hvbkalam iss jaajv koi sujaqkam dooi ator albov jaajam nuul wg yukam ham pwrkub nan pataq anyoko lvgab jaajam mvl wgbo tulungv bulug wb mwwkwb hoqb mvl wg gvdwn.

⁵Hoqgab lyolv kam hoqhvb nyidwn, lyolv sonyo ko sujaqkam, hoqhv hvdkalam go koi alwb xitor yaagub koi alwb pagoqkam bedwn. Mwwkato hoggub nyil wm mwwjwr anyokov nyoro rokam koi alboam gudwn.

⁶Hoqgab lyolv wm kalam hvb nyidwn. Soq gvda gvt si hog nyimur nyiyeqko nyookv, ho ngulug gv dorpwngam nyicv pumbum tvl doodwn, ho almanbov ngulug gv galoqkv jvvsiql jvvmw dvn. Soq si ngulug swwg mwlwngam swwxw-ywlw hoqgv haanbo wm mam mwam gujo ywwk tvl ngulam hoq urab tolwqdvn.

⁷Nyiv sudum svram, pvtangam, gwn-xarn boam hoo iss uraho doonbo mwlwngam nguiyam sodwn.

⁸Hvbmabde hiyvkam sija godab lyolam munyiub nyoma. Soq si almanbov ho munyiub lamanamv mwv sig cumdwqkam doogdvn.

⁹Soq lvgab ngulv At Swn la Abwn paqn dvn, ho soq akin si Pwnboam kvlyw kaac dvb Pwnbog pwnam nyia koam been dvn.

¹⁰Agam gamkin hoqgv paqnamv la beenamv lengdwn. Ngoqg vbw-bor tulu, soq sib nyinam si alma.

¹¹Iss subuq hokin hoqgv iss tiiswr bog la kacaqbov lengma dvn.

¹²Ngoqg vbw-bor tulu, taoq svvnv Olib aaxy xeema dvn, roo terivkam taoq aaxy xeenyi maadwn, ho kwcwqbo iss subuq ngvkam tiiswrbo iss mvlin nyoma dvn.

¹³Nulug pengko ho mwwlaqbo hoo pumb rwnam nyiv hiyv doodwn? Mwwg alwb nyil swwnam mam, hoo mwwg nyis tulungam albo nyinam mam, pumb rwnam mam mvnyi-moiyul swwnam mam kaakin dvb nyidwn.

¹⁴Hvbmabde nulug hang uraho mwwc-saqyanamv, hang baqnamv, hang hengxaqnamv ho roogumnamv doob nyiloqkam nulv jvqtwngam pvvb juqbol atam xitor yaagub nyic nyimabv hoo xaalyo bvkam bemabv.

¹⁵Soq svk pumb rwnam ao gvda toloqgv ipoq maadwn, hvbmabde soq si gvda gvt soqgv, ho soq si dvrwq maab la ui gv.

¹⁶Hogloq ho hang baqnamv la roogumnamv doodwn hoqho nyic-nyianamv la almanbov luuxiv doodwn.

¹⁷Hvbmabde ao gvda toloqgv pumb rwpoqnamv otuqjaqb dvrwqdvn, swrsomalo aldvn, nyinyiaq aldvn ho ajinb nyidwn; soq si hang biidwn, ho soqg nyinamv bon alboam niqtuq nyilin dvn. Soq si hang baqnam hoqgv la gwwlywnam hoqgv aado ho doodwn.

¹⁸Swrsomalob swwnbo tulungv vly liinamv swrsomalob swwl niqtuq lengdwn.