Read Nyishi JEMS 4 Bible Online

JEMS 4 - Nyishi bible

JEMS 4

¹Hogloqgv nulug pengko ho yolu-swcin dul nwqyaq-pacaq minsnam mwlwngv haadwn? Hoq mwlw hv nulug at atwg gab mwwsw ko-gab nyima dvn i?

²Nulv hog mwlwngam mwwby sudwn, hvbmabde nulv ham kaapa nyoma yukam nulv nyi mengdwb mwwl mwx-mvaql doodwn; nulv kaabil roogum dvn, hvbmabde ham kaapa nyoma, hoqgab nulv yolu paiyaq mins dvn. Nulv vijaqg dwnw nvvnw sujaqkam nulv ham naanyi maadwn hoggab nulv hoq gabwk hvl Pwnboam koma dvn.

³Hoo nulv kosjaqkam, hoq nulug konam hv nulug atwg hemp-hengam ngaml hwnyir-hvmar sool hang xuml nyin dvb mwwgam gab nyidwn.

⁴Mwwjw maanbo nyi tulu nul! Gvda gvtam aby bonamv Pwnbog ceebiob nyidwn hvl ham nulv cengma dvn i? Hiyv lajaqkam gvda gvtam aby tvb mwwnbov mwv atv atam Pwnbog ceebiob mvsdvn.

⁵Dvrwqbo potalo benam mam nulv niqtuq doomab besam-beyam dvn mwwmabv, “Ngulug uraso Pwnbov yal jinam hv almab kaaxaql mwwc-saqya rooxo dvn mwwdwn i”?

⁶Hvbmabde Pwnbov jinam anyangv ham ator yaadwn. Dvrwqbo potangv bedwn, “Pwnbov xitor yaagub mwwn boam nyemaq daqmin gvma dvn, hvbmabde yanwl swwn boam mwv anya dvn.”

⁷Hoggab nulv sija Pwnbog benam mam tagdvl swwto, hvbmabde uiyam mvtur to, hoo mwv nulug ogum hoqgv keleqtayin.

⁸Nulv Pwnbog dookub ogum hvvnwqto, ho mwvkam nulug dookub ogumb haatayin. Nyic nyinbo nyi tulu, nulug alaqngam losuqto, gwwnbo nyi tulu! Nulug hangam nyedar darxaqto.

⁹Mwwdwqto, xabto, hoo nyiqs dito; nulug nywrkaq potaql nyinam mam xabnam gob mukubto, nulug hemp ponam mam hingr dvb nyimto.

¹⁰Nulv At Swg kaagaho yanwl swwto, hoo mwv nulam purab tayin.

¹¹Ngoqg vbw-bor tulu, nulv akwn akwn benyi-beya mins maabv. Hiyv atwg Kristan vbw-bor gon benyi-beya dvn ho yolu pw-hwwdwn, mwv pvvbam kam benyi-beya dvn, ho pw-hwwdwn. No pvvbam pw-hwwd nyiloqkam no pvvbam tal bugil swwn bogub nyima dukun, hvbmabde ham pw-hwwnbo gob nyidkun.

¹²Pwnbov twqlak pvvb jinbov, ho pw-hwwdy bov, mwv akin twqlak ywwt ywwd bov hoo twrdy bov. Nulv hiyv nulug gutu-gorag nyi tulungam pw-hwwdy bov?

¹³Nulv ngoqg benam sam tagabto, nulv bedwn “Soolo maab nyiloqkam aram ngulv nampam ak golo nyoyw wtayin, hoo vnyw gob hoq nampamho doog dvl kor-pam mvgdvl twngk lo vigo paatayin.”

¹⁴Aram nulug swwgv hoggub nyitayin ham nulv cengma. Nulv haapamv miceqgo juul doopel oyu maadab niileqbo hvb nyido.

¹⁵Hvbmabde nulug bedynamv soq si “At Swg mwwlwqkob ngulv simab doob nyiloqkam, ngulv soq sam maabaloqkam ham nyitayin.”

¹⁶Hvbmabde nulv sija nyeram yaagub nyil xitor gob nyido. Soq sib xitor yaagub nyinam mwlw si nyixiaq dvn.

¹⁷Hoqgab hiyv nyiv bon alboam nyidwb cengtwl ham nyima dvn mwv nyic nyidwn.