Read Nyishi JEMS 5 Bible Online

JEMS 5 - Nyishi bible

JEMS 5

¹Nyetbo nyi tulu, sija nulv ngoqg benam sam tagabto! Nulug aoho hvvc hvvdwq haata bo gab nyiqs tanap dil xabl ril dooto!

²Nulug nyet tvnamv yaadku, hoo nulug vj torab pam togv duiyum paku.

³Nulug hun rupam eexam xomyum paku, hoo soq eexamnam si hvvky akwb nyil nulug ceebiob nyitayin, hoo soq si nulug gv ayaqngam wm hvb gul dvtayin. Swcw nyodongv tvnwr dwrta xwqt lo nulv soolo godab nyet tudul dooxiqdo.

⁴Nulug rongo ho bon nyijobo nyi tulungam nulv bulug bon nyijongam jikma. Bulug sornam mam taka to! Nulug rongo ho nulam dvn nookum jinbo nyi tulug sogoq goqnamv mwlwjaqkam ator yaanbo Pwnbo At Swg nyuru tv hvvc paku.

⁵Nulv gvda gvt so swwdwk ho nulv dvp-twwiyin dvl hemp-hengam alwb nyil swwnum. Nulv atv pad aalam patab kodwb atam dwjw supa ku.

⁶Nulv hog dod yolu doomabo nyiam yolu doonum, jvqtwbongam mengnum. Bulv nulam hog mwrwq jima.

⁷Ngoqg vbw-bor tulu, At Sw haama deedib cwql nulv dooto. Mwwkato rongo mvnbov hoggub nyil mwwg rongongv am temiv vmlyw lengnam gob kaayal doodwn. Mwv dwr poolwg nyodongv honam gob kaayal cwql doodwn.

⁸Hoqgab nulvkam cwql doodwb nyiky dvn. Nulv mwwjw alwl dooto, hoggab At Swg haad aalv ogumb hvvnwq paku.

⁹Ngoqg vbw-bor tulu, nulv Pwnboam pw-hwwk maadwb, akwn akwn haqmin sumabv, hoggab yolu pw-hwwdy bov ogum si urab haadwb mwx-mvaql doodo.

¹⁰Ngoqg vbw-bor tulu, nyiqry benbo tulug At Swg eminb benam mam mwwgabto. Hoq torab sam nulv kvvgwl bulug cwql swwnam hvbkalam hentwram cwql swwto.

¹¹Ngulv bulam cwql swwgam gab hempbov hvl goqg dvn. Nulv Jobwg gonam tapa pan, mwv hoggub nyil cwql swwnum, hoo hoggub nyil Pwnbov mwam kokw so hog mwlwngam jinum, ham nulv cengl doodo. Hoggab At Swg ayangv la hang biinamv doogdvn.

¹²Hog mwlwngam bet lakam, ngoqg vbw-bor tulu, nulv hog ak birwl bei kam nulv dingl bemabv, nulv ao gvdag eminb ho gvda gvtwg eminb ho hog luugwg eminb dingmab. Nulv hvl birwqto, “Vv” hvnam mam vv hvto hoo noqg “Ma” hvnam mam ma hvto, hoo hvb nyibaloqkam nulv Pwnbog pw-hwwdy koho haadwb nyiram.

¹³Nulug pengko ho hiyv akgon mwwdwq mwwkwl doonbo nyi ak doos i” Mwv Pwnboam xumto. Hiyv akgon hemp-hvnyirs i? Mwv bemin bvl Pwnboam paqto.

¹⁴Nulug pengko ho hiyv vc dvn? Mwv dvrwq namlo hoqg nyi nyiixa tulungam goqkum gvdwl mwwg gab Pwnboam xuml mwwg gv ho Atwg emin gab kuty neemto.

¹⁵Soq mwwjwl swgwl benam si vcbo nyi akam aldvb mwptayin, ho At Sw vcbo nyi akam vc karnam hoqgv al dukub mwptayin, hoo mwwg nyic nyiknam mam axia jita yukun.

¹⁶Hoqgab nulv akwn akwn nulug pengko lo at atwg nyic nyinam mam betam mins gvdwl nulv al dukub akwn akwn gab Pwnboam xumin suto. Nyi albo ak hoqg swgwnamv ator doodwn, hoggab Pwnbov mwwg lvgab bonam nyidwn.

¹⁷Ilija kam ngulug hvk nyiib nyinum. Mwv nyodo hom maadwb hvl mwwjwl dwqdwq jaqb ator alwb Pwnboam xumnum, hoo kokw so vnyw nyium gola pool barxgo gvda so nyodo homab doonum.

¹⁸Kokw so mwv Pwnboam xumnum, ho nyodongv hoknv gvdaho am temiv swwrab kunum.

¹⁹Ngoqg vbw-bor tulu, nulug pengko ho hiyv akgon jvqtwngam apaqpel gaqxar bvnyiloqkam, nulv akwn akwn mwam lokta bookur minsto,

²⁰sam mwwgabto: hiyv lajaqkam nyic nyinbo nyi akgon mwwg nyic nyik lamta hoqgv bookur kub nyiloqkam, mwv nyic nyinbo nyi akwg Yalam sig hoqgv ywwlin pakun, hoo nyic nyinam mwlwngam axia jim dvb mvdwn.