Read Nyishi 1 PITOR 1 Bible Online

1 PITOR 1 - Nyishi bible

1 PITOR 1

¹Jisu Kristog xuqnam Pitor galoqkv— Pontas, Galati, kappadosiya, Asiya hoo Bitinia gvda tvqpw ho cwrsaq twqb kekarl doonbo Pwnbog xuqnam nyi tulu gab.

²Nulv Pwnbog mwwlwqkob Abwg bvrwq pagoqkam niqtuq lengm dvb mwwg yal galoqkv dvrwqbo nyiib mvknam, ho Jisu Kriston bugil swwm dvb mwwg uiyv nyedar darxaqnam nyi tulu. Pwnbog anyangv la swrsomalongv nulug lvgab koijaqb doonka.

³Ngulug At Sw Jisu Kristog Ab Pwnboam paqtuj! Hoggab ngulam mwv aya al banv Jisu Kriston sik boam turdkub purab kunv ngulam nitib swwg ak jinum. Soq swwg si ngulug nwrba cwtam nagub hingw deenamv, nywywngam sima bo swwgv.

⁴Hoqgab Pwnbov mwwg nyi tulungam jidwb apnam nywywngam yaama bo, kac-kanyiaq maanbo ho niima bov ngulug gab ao gvda tolo gumn apnam mam naadwb kaayal doodwn.

⁵Soq torab si Pwnbog atorv cumciq alwb rvkil apnam mwwjwbo nyi tulungam ywwt ywwnam mam kuiyum mam swcw nyodongv tvnwr dwrd aalam kaakin tanam haady boam nulug kaayal doonbo nyi tulu gab doodwn.

⁶Nulv sija soq apo so nulam deedy luuxib pooka ko-gab hentwram henl doodwb nyisjaqkam hemp poto.

⁷Soq sib nyinam si hvbaloqkam nulug mwwjwngam al mvdwb, hoo hunamkam wmho jiqbnv kaakal mvgdvn, hoo hunv yuupaq dvn, ham xibin yaadwb nulug mwwjwngam dooyu mvdwb hvl mvka dvb nyiky dvn. Ho kokwngam Jisu Kristo ipoq yukam hoq aalam nulam paqyalinco hvl paqdwb, xikum poqkum dvb ho yuukum dvb nyitayin.

⁸Nulv mwam kama sujaqkam nulv mwam abydo, nulv mwam sija kaapa maasu, hvbjaqkam nulv mwwjw do; hoq gab nulug agamv belin lamanam hang mwwc lamanam hemp poma vrram poto.

⁹Hoggab nulug mwwjwngam niqtuq nyilin banv nulug yalam ywwt ywwdnam mam kaapa paku.

¹⁰Soq ywwt ywwnam pagoq sam nyiqry benbo tulungv mwwdy lalal mwwtkul bulv nulam Pwnbov soq jinyi tanam pagoq sam betam apnum.

¹¹Nyiqry kaanbo tulungv hogloq moodam hoggub nyil haatayin ham bulv mwwdy lalal mvlin dvb nyinum. Hoggab Kristog Yalv bulug urahv dootwl Kristog nyelin dorswb hendynam mam la hoq kokwb mwam yuudynam mam nyiqry kaal bepwl apnum.

¹²Pwnbov soq nyiqry kaanbo tulu sam bulug atwg swwg gab bulam betam maanum, hvbmabde nulug sija tapa kunam pui jvqtwngam bulv nulug gab bijkunum. Ao gvda toloqgv kanamnam tugu pui baqnbo tulungv soq torab sam Dvrwqbo Yalwg ator hoqgv nulam soq jvqtw pagoq sam bekinnum. Soq jvqtw pui soqg bvrwqkam ao gumtw tulu ngvkam cengnwnum.

¹³Nulug hangv mwx-mvaql hengab dooto, hoo nulug hingwnam mwlwngam Jisu Kristo haai kukam nulam jitanam hemp aoho hingwl dooto.

¹⁴Pwnboam bugil swwto, hvbmabde nulv mwwcin maadab hog cengmab doodwkho nyinam hvb nyimabv.

¹⁵Hvbmabde nyitaq mwlwho nulam goqnbo Pwnbov dvrwqnam hvbkalam nulvkam nyitaq mwlwho dvrwqb nyigdvl swwto.

¹⁶Hoggab Dvrwqbo Potangv bedwn, “Nulv dvrwq dvb nyiky dvn, hoggab ngo dvrwqbov.”

¹⁷Hiyv nyi mwlwngam bulv hognvkv nyiknum ham bulug nyijongam, hiyv nvkam mwwswl xibin yaamab pw-hwwnbo akam nulv Aba hvl goqd nyiloqkam, nulv mwam xumg dvl soq gvda gvt so doody deedib mwam bos sog dvl swwto.

¹⁸Hoggab nulug at ab tulug swwca ho hognvkv nyimurnum, hoqgv nulam mvlin dvb hvl hognvkam hiqn kunum ham nulv atv cengl doodo. Soq si nyamabo hun kama ho rup kama,

¹⁹hvbmabde ator doomabo Sviya ko hvb nyinbo Kristog xitwr kamab xinam uiyv nulam ywwlin pakun.

²⁰Mwam Pwnbov gvda gvt sam pwma daab xuql ap kunum, ho kokw jaqso mwam nulug nyigo gab jilin kunum.

²¹Mwam sik boam turdkub purab tukul yuud kub jinbo Pwnboam mwwg galoqkv nulv mwwjwdo, ho nulug mwwjwnamv la hingwnam mam Pwnbog aoho hengab lalal ap paku.

²²Nulv sija jvqtwngam bugil swwgam gab nulv atam nyedar darxaq supa kun, hoqgab nulv mwwjwbo vbw-bor tulungam aby body lalal akwn akwn hvvjw-hara hoqgv aby bominsul swwbam to.

²³Nywywngam sima bo ho nwrba cwtam gob doody bo Pwnbog agam galoqkv nywywngam sima bo imiq dvparlo nulam nitib ko bwwdar pakun.

²⁴Dvrwqbo Potangv bedwn, “Nyi mwlwngv nyorog nwmw hvb nyidwn, bulug yuunam mwlwngv svvnwg opu hvb nyidwn; nwmwngv sengd kun, opungv kam yoql dukun,

²⁵hvbmabde At Swg agamv nwrba gob dooky dvn.” Nulam Tugu Pui bekin kunamv soq si suk lak.