Read Nyishi 1 PITOR 2 Bible Online

1 PITOR 2 - Nyishi bible

1 PITOR 2

¹Nulug pengko hoqgv hog mwlw alman boam, vm mvvnam mam, gwwlywnam mam, hang bvqsnam mam hoo tob-taiyil agam benam mam apaq paku!

²Nulv nitib ko hoiyinv dvrwqbo yalwg twws sam twwdwb hvngwrnam hvbkalam nyito, hoggab ham nulv twbnyiloqkam koiyib swwrab banv nulam ywwt ywwdwb nyitayin.

³Hoggab Dvrwqbo Potangv bedwn, “At Sw hog hwdgo ayadvn ham nulv atv meepa paku.”

⁴Nyi tulungv xuqbnv haqxanam wlwngam Pwnbov ham xinam gob daalinum Atwn swwg wlwb mvknum dookub haanya taaku.

⁵Nulv kam swwnbo wlw hvb nyigdvl yalwg nam mvk ho mvko tvl dvrwqbo nyobub nyigdvl yal gab Pwnboam xumg dvl mwam Jisu Kristo galoqkv mwwg eminb nvvrwq kodwb nyito.

⁶Hoggab Dvrwqbo Potangv bedwn, “Ngo wlw xinam pwg xuqbnv, Jaiyon hoqg cuukiqg rwwda ann gob mwgw napa kun, ho hiyv lajaqkam mwam mwwjw bov lokukam hvnyw-har hendwb nyiram.”

⁷Hoggab mwwjwbo nyi tulu gab soq wlw pw si xinam jaqkv hvbmabde mwwjw maanbo nyi tulu gab: “Nam mvnbo nyi tulungv xuqpaqnam wlw pwv rwwda annwb mwlwngam xibin yaanam wlwb nyiknum.”

⁸Dvrwqbo Potangv taqsaq golo bedwn, “Soq wlw pwkin si nyi tulungam duqtup mvtayin, Soq lwwn pwkin si bulam duleql geqmtayin. Bulv duleql geqdwn si bulv agam mam mwwjw mak gab nyidwn, ho Pwnbov bulam hvb nyimdvb mvl ap pan.

⁹Hvbmabde nulv Pwnbog xuqdumnam nyobv, Pwnbo Lvpw at loodag nyubv, mwwg swrdorxeqb bon nyinam mam nyi tulungam bekin mvdwb kan ura hoqgv mwwg dvrwqko hutob nulam goqlin kunbo Pwnbo mwwg atwg nyi tulungv.

¹⁰Nulv kol otuqho Pwnbog nyiib doomanum, hvbmabde nulv sija mwwg nyiib nyidkun, kol nulv otuqho Pwnbog ayangam cengmanum, hvbmabde sija nulv mwwg nulam ayanam mam kaapa paku.

¹¹Ngoqg ajin tulu, ngo nulam mvnyi-moiyul bedwn, nulv soq gvda gvt so nyiinwb nyil soq gvda gvtwg gv ayaqkv nulam ceebiob baql nulug gvvngam nyob panbo hoqgv aado ho dooto.

¹²Nulug nyinam wnam mam nyob luusaqg kaagaho al mvto, ho bulv nyimur-wmur bogub nulam yolu bei kam nulug alwb nyinam mam kaatwl kuiyum mam mwwg haaikuk Aalam Pwnboam paqmto.

¹³Nul mwlwngv At Sw gab hentaql nyig wgbo nyicw-mwcwngam bugil swwto, hoggab lvpw At Sw mwlwngam koi yaadwn

¹⁴hoo laat saabam mwwg galoqkv nyixiaq boam laqm-baqm dvb, hoo alwb nyin boam paqyalinco hvl paqm dvb kanam pan.

¹⁵Hoggab Pwnbov mwwnamv, nulv albo bonam nyigdvl damabo nyi tulungam bulam bes maaiyam benboam nulug alwb nyinam mam kaatwl bulam gombeq maab doom dvb mwwdwn.

¹⁶Nulv dod yolu doomabo nyi hvb nyil swwto, hvbmabde dod yolu doomabo nyi hvb swwnam ham nulug almab nyinam bonam tomlup ap mvmabv, hvbmabde Pwnbog nyera hvb nyil swwto.

¹⁷Nyi mwlwngam xito, nulug mwwjwnam mam mwwjw jwbam ajin vbw-bor tulungam abyto, Pwnboam xito, hoo Atam xito.

¹⁸Nyera tulu nulv nulug at tulungam xuml swwdwb nyiky dvn, ho bulam xima vrram xil swwto, nulam ayabo nyi tulungam twqma, hvbmabde nulam gamtor alwb benbo nyi tulungam kam xil swwto.

¹⁹Nulv hentwr hens maanam golo henl ham vcam cwql doob nyiloqkam Pwnbov nulam vjaqbo hvl alpa hvl paqtayin, hoggab nulv mwwg mwwnam mam hempal doodwn.

²⁰Nulv nyixiaq-wxiaq lakam nulam jwwnamv hognvk xinamv doodwn? Hvbmabde nulv kvtaqb nyijaqkam nulam nyiv jwwb nyiloqkam homolo nulv xinam jaqkv. Pwnbov nulam xitayin.

²¹Soq pagoq gab sulak, Kristo mwv atv nulug gab hentwram henum, hoo nulug gab mwv nyiswrnam mam apaq jinum, hoo mwwg lvlam sam kaatwl lws swqmin gvl wwm dvb sulak nulam Pwnbov goqnum.

²²Mwv nyic akukam nyimanum. Hiyvkam mwwg agam hoqgv lokukam xaalyob benam mam tapa maanum.

²³Mwam nyi tulungv bej-bepar bis bakam mwv bulam birwq maanum; Mwv hentwram hens bakam mwv hiyv nvkam bos belam maanum. Hvbmabde dvrwq alwb pw-hwwnbo Pwnboam mwv hingw twqnum.

²⁴Kristo ngulug nyicam mwv atwg gv aoho baqknv daapo ho baqxia gvnkun, hoo ngulug nyic gab sidkun hvb nyim dvb hoo nyiidar nyiib ngulug gv sam nyil swwm dvb jipa kun. Mwwg un baqnam hoqgv nulam mwp pakun.

²⁵Nulv sviya hvb lamtangam niim kunum, hvbmabde sija nulam sviya rvky bog kokwb wmin gvm dukub nulug yvjam rvkybo akv nulam bookur pakun.