Read Nyishi 1 PITOR 3 Bible Online

1 PITOR 3 - Nyishi bible

1 PITOR 3

¹Hoq hvbkalam nywxw tulu nulv nulug atwg nyol tulug benam mam tagdvl bugil swwto, hoggab hvb nyil nulv swwb nyiloqkam bulug pengko hoqgv Pwnbog agam mam mwwjw maanbo, gamlam tama bo nulug nyol tulungv nulug dvrwqb bulam mvnyi-moiyul bulug benam mam nulv tal swwb nyiloqkam, nulug nyinam wnam mam kaatwl, nulv agamv bulam bema jaqkam lokam mwwjw tayin;

²hoggab bulv nulug dvrwqb nyil bulam bos sol swwnam mam kaatayin.

³Nulv atam anya dvb kangam mvdwb hvl hengam kaaramb nyil nyi tulug kaagaho nulug dum baqnam mam, hun rupam lwwpo ho oj gvtwl, vj koonam mam nyi tulungam kaala bes mwwl nyil yvdwb nyima dvn.

⁴Hvbmabde nulug anyangv nulug hang uraho jvqtwb niimabo anya hvb swrsomalob, haat alwb nyil swwnam yal hv moloq Pwnbog kaagaho mwlw jaqkam xibin yaanamv.

⁵Hoggab Pwnboam mwwjwl hingwl xuml swwnbo kolwg nyem tulungv bulv atwg nyol tulug alaqb doonum, ho bulv anya kaapa dvb nyil swwnum.

⁶Sara kam hoqhvb nyinum; mwn Abrahamnvn bugil swwnum, ho mwn Abramnvn ngoqg atv hvl goqnum. Hoqgab nulv albo bonam nyidwb hog gokam bos maab swwb nyiloqkam nulvkam Sarag nyem koob swwtayin.

⁷Hoq hvbkalam nyol tulu, nulvkam nywxw bool nulug nywxw tulug lvgab doode so nulv bulam ator doomabo nyob dvparv hvl mwwcin gvdwl swwto. Hoggab nulv bulam anya soto, hoggab bulv kam nulug lvgab lokub Pwnbog anya mwwpal jinam swwgam kaapa mingtayin. Nulug swgw ko ho nyitub wtub mvma dvb soq sam nyil swwto.

⁸Bitwr benya so, nul mwlwngv mwwnam akinam mwwiyin dvb ho hengnam akinam hendwb nyiky tayin, ho akwn akwn aya minsul yanwb mwwg dvl swwto.

⁹Nyicib nyin boam nyilwq maabv, hvbmab nulam been boamkam biilwq maabv, hvbmabde hoq kwlib ayato, hoggab ayanam si Pwnbov nulam goqdwk ho mwv nulam jidwb birwl apnamv.

¹⁰Hoqgab Dvrwqbo potangv bedwn, “Hiyv nyiv hemp pol swwnw dvn, hoo albo moodam kaapa nwwdwn, mwv almab agam mam bedwb nyima dvn, ho xaalyob benam mam bema dukub nyiky dvn.

¹¹Mwv alman boam apaq peekul albo bonam nyidwb nyitayin; mwv swrsomalongam romo maajaqb meekar dvb nyiky tayin.

¹²Hoggab nyiidarbo nyi tulungam At Sw mwwg vnyiqkv kaagab lalal doog gvdwn, ho bulug swgwl konam mam looxiam tadwn, hvbmabde alman boam nyinbo nyi tulungam mwv nywwrwql kaama dvn.”

¹³Nulv albo bonam nyib mwwb nyiloqkam nulam hiyv mwur dvb mvdy bov?

¹⁴Hvbmabde albo bonam nyik gab nulv hentwr hend nyiloqkam nulv jaqmolo paqnam jaqkv! Nyi tulungam boswl bos somabv, ho mwwdwq maabv.

¹⁵Hvbmabde Kriston nulug hang uraho mwwjw swswl mwam nulug At Sw gob xito. Looxiam nulug hang uraho hingwl doognam bvrwqkam bekin tvbwk hvl toxbo nyi akam birwq dvb hengabl dooto.

¹⁶Hvbmabde ham nyinyiaq alwb la modu gvdwl birwqto. Nulug hingxw cwrwnam mam mwwdy lalal doogto. Hoggab Kriston nulv mwwjwl bvvbwl swwgam gab la nulug alwb nyil swwnam mam kaatwl nulam bej-beparl almab benbo nyi tulungam bulv hog nvkv beknum hoqgab hvnyw mvdkub mvtayin.

¹⁷Almanbo bonam nyil hentwr hemmam lingsam albo bonam nyik gab hentwr henamv Pwnbog mwwlwqkob nyib nyiloqkam hv alyadwn.

¹⁸Hoggab Kristo ngulam Pwnbog ogumb boa dvb hvl nyiidarbo nyi akv nyiidar maanbo nyi tulug nyi mwlw gab lvkin ciqnyi gob sinkun, mwwg gv vpam sidkub mengknum, hvbmabde mwwg Yalam turkur dvb mvknum,

¹⁹hoo mwv pvtwq uraho doonbo yal tulungam wlayil Tugu Puiyam bekinnum,

²⁰hoggab mwwg Yalv turl doogam gab mwv Noag hulu mududvk moodho Pwnbog benam mam tamab hoo mwwg cwqnam mam hencin maab nyinyabo nyumwb doonbo nyi tulug dookwb wbnv puiyam bekinnum. Jaaj uraho nyiv jaqt go doomanum, okum apal piin gob iss hoqgv ywwknum,

²¹hoq iss hv baptijum hvb kvvyw tac dvb nyinum. Soq iss si gv kac-kanyiaqkam hwrxaq naadwb ma, hvbmabde hingxw cwrwl Pwnbog lvgab birwl apnamv,

²²Soq si nulam sija ao gvdab wkbo Pwnbog lvqbwq taqc ho doon bov, ao gumtwngam ho ao gvdag atoram la xitor-xilo mwlw jaqkam mwwg alaqb doog dukun.