Read Nyishi 1 PITOR 4 Bible Online

1 PITOR 4 - Nyishi bible

1 PITOR 4

¹Kristo mwwg gv ayaqngv hentwr henam kalam hvb nulvkam hentwr hendwb mwwl hingx-kvvrwl doodwb nyidwn. Hoggab hiyv lajaqkam gv ayaqngv hentwr henk bo nyic nyima dukun.

²Hoq gab nulv sija galoqkv gvda gvt so swwl doody deedib nyia kog mwwkwb nyil swwmab Pwnbog mwwlwqkob nyil swwl dooky dvb nyitayin.

³Kol nulv otuqho nyoodo nyi tulungv hognvkv nyinwnum hoq hvbkalam vigo nyitar pakun, nulug swwnam ho nyimur nyiyeqkam nyikv, kaabynam, mwwkwb twwxum dviyaqnam, dvl-twwl yocu-yabionam, twwdwb dookum keenam, hoo pvvb doomabo hvb oyum kacdvb bwwxin xindul doonum.

⁴Hoo sija nyob luusaq nyi tulungv nulv bulug lvgab nyinam akinam nyiba wba maaikukam bulv lomdwn hoqgab bulv nulam bej-bepar bel hoo kvtaqb swwmanam mam nulv swwmin gvma yin.

⁵Hvbmabde turl doonbo nyi tulungam la sikbo nyi tulungam pw-hwwdy bo Pwnbog dookho bulv atv atv birwq sudub nyitayin.

⁶Hoqgab Tugu Puiyam sikbo nyi tulungam kam bekinnum, ho bulv sima daqdwkho bulam gv ayaqngam nyi mwlwngam pw-hwwnam hvbkalam bulam pw-hwwknum, bulam soq pui sam bekinam si hvbaloqkam bulug yal lo swwnam mam Pwnbov swwl doonam hvbkalam swwm dvb jipan.

⁷Hog luuxy mwlwg twrd moodv hvvnwq paku. Hoqgab nulv atv hengab sugdvl swgwl doodwb mwwlaqto.

⁸Hog mwlwngam koi yaab nulug pengko ho akwn akwn aby bomin sunam mam apaq maabv, hoggab abynamv vijaqg nyic nyinam mam apaq mins mvdwb jidwn.

⁹Haqmin sumab nulug namho akwn akwn svgagvrwql haamto.

¹⁰Nulv vxy cwrv Pwnbog luusaq-luusaqb lvqc cinam mam aya alwb rvky gvdwl doogto, ho Pwnbo galoqkv mwam lvqc cinam mam nyi asaqgab dengky alwb nyin mvn dvb nyidwn.

¹¹Hiyv akgon pui bekin dvn, mwv Pwnbog gamtam tolinl bekin dvb nyiky dvn. Hiyv akgon bon nyidwn, mwv Pwnbov mwam jinam ator lvgab bon nyiky dvb nyidwn. Hoqgab hog mwlw gab paqnamv Jisu Kristo galoqkv paqdynam akam Pwnboam paqdwb nyidwn, hoo yuunamv la atorv nwrba cwtam hoqgv nwrba gob dooky nvka, Amen.

¹²Ngoqg tumanam ajin tulu, nulug hentwr kamangam hindunam mam, hoo hwdlo nulam pookanamv haaikam ham nulv swrdorxeq gob mwwl lomabv.

¹³Hvbmabde nulv Kristog hentwr henam mam hembam ko-gab hemp poto, hoggab mwwg yuunamv niqtuq lengk baloqkam nulv hemp poma vrram podwb nyitayin.

¹⁴Nulv Kristog kokwb wggam gab nulam mwwg emin gab hvnyw-har bepa baloqkam nulv paqnam jaqkv, hoggab yuukynam Yalv la Pwnbov nulug aoho ipoql doodwn.

¹⁵Hvbmabde nulug pengko hoqgv hiyv akgonkam mwv nyi meng gam gab ho dvco cogam gab ho nyixiaq wxaq ko-gab ho hiyv akgonwg nyis mvsam nyireq ko-gab hentwr hendwb nyiram.

¹⁶Hvbmabde mwv Kristan swwk gab hemp nyiloqkam soq gab hvnyw maabv, hvbmabde mwv Kristog eminam naagam gab Pwnboam paqto.

¹⁷Pw-hwwnam mam hwwrab dvk moodv haapa ku, ho Pwnbov mwwg atwg nam nyi tulungam otuqjaqb pw-hwwtayin. Hvbmabde otuqcob ngulug aoso pw-hwwnam mam hwwrab baloqkam Pwnbog Tugu Puiyam mwwjw maanbo nyi tulu gab hoggub nyil niqtuqngv lengkin pa?

¹⁸Dvrwqbo Potangv bedwn, “Albo nyi tulungam vs-axaq jaqb ywwt ywwdwb nyib nyiloqkam; almanbo nyi tulu gab la nyic nyinbo nyi tulu gab hoggub nyitayin?”

¹⁹Hoqgab Pwnbog mwwkwb hentwr henbo tulungv bulug atwg albo bon nyigam gab nywywngam mwwg birwl apnam mam pvvb juqbo maanbo mwlwngam Ywrnbo akam mwwjwl hingw dvb nyidwn.