Read Nyishi 1 PITOR 5 Bible Online

1 PITOR 5 - Nyishi bible

1 PITOR 5

¹Ngo Kristog hentwr henam mam kaanbo hvvkib nyil ngo nulam dvrwq namlo ho nyig wgbo nyiixa nyi tulungam mvnyi-moiyul bedwn, hoo ngo yuunam niqtuqkv lengyi kukam ham ngo gumn bwbatayin. Ngo nulam mvnyi-moiyul bedwn.

²Pwnbov nulam jiknam dvparam rvkybo gob nyito, ho ningteq-ningyeql ninlwqnam hvb nyimab swrsomalo alwb Pwnbov nulam rvky mvdwb mwwnam hvbkalam nulv atv mwws gvdwl nyinw maab nyimab hvbmabde mwwlwq gvdwl nyito.

³Nulug bon nyijongam nvvtwq dvb mwwl bon nyimab, hvbmabde bon nyib looda mwwdum gvdwl nyito. Nulam kvvyw-tada mvdwb jiknam nulug alaqho doonbo nyi tulug aoho nulv saab swwmabv, hvbmabde hoq acam mam nyiswr wswr bogub nyito.

⁴Hoo kokwngam rvkybo Ab jaqkv haaikukam nulv nywywngam biimab huul dooky bo ywr dumtup pam kaapa tayin.

⁵Hoq hvbkalam, yaapa tulu nulv nyi axa tulug benam mam tal swwto. Nulv mwlwngv akwn akwnwg swwg gab bon nyitaqnan vjam kooto; hoggab dvrwqbo potangv bedwn, “Pwnbov xitor alyagob mwwn boam nyemaq haama dvn, hvbmabde yanwl swwn boam ayadvn.”

⁶Hoqgab Pwnbog alaqho nulv atv atam yanwb nyil swwto, mwv nulam al moodv haaikukam purab tayin.

⁷Nulug mwwdwq-saqk mwlwngam mwwg ao tol jipaqto, hoggab mwv nulug gab mwwdwq dvn.

⁸Hvvmin gvdwl hengab dooto! Hoggab nulam hang baqnbo nyemaq, uiyv sony nyot hvb dugum guml hiyv akgon jarbaql dvdwb mwwl rugaql yvdo.

⁹Gvda gvt so doonbo nulug mwwjwbo ajin tulu mwlwngv nulug hvbkalam hentwr henam akinam henl doodwn hvl nulv cengdwn, hoqgab nulug mwwjwngam hindib apto.

¹⁰Hvbmabde nulv apo go hentwr henxo kokwngam mwlw jaqkam anya nyiabin yaanbo Pwnbov nulam mwwg nwrba cwtam gob ywwdnam mam Kristog lvgab lvkin gob gumn naabam mvdwb goqnbov mwv atv nulam dvrwq dvb mvtayin; hoo nulam nywywngam biima dvb atoram la biim maadwb pvvbam mwjtayin.

¹¹Nwrba cwtam hoqgv nwrba gob mwwg atorv dooky nvka! Amen.

¹²Ngo soq pota otu kvtaq dvb xeqnam sam mwwjwngv al sudnvbo mwwnam bor Silaswg svka ko-gab xeqg yin. Ngo nulam biywr wrdvb mwwdwn hoggab soq si Pwnbog jvqtw anyanam mam ngo bekin dvn. Soqg uraso dvgwl biimab dooto.

¹³Nulam xuqnam hvbkalam daalinam Bebilonho doonbo dvrwq namlo ngvkam nulam salam jilwq do, hoo ngoqg lvgab doonbo ko Mark rub salam jido.

¹⁴Akwn akwn Kristan abynam lvgab salam jigdvl moopup minsto. Kristo gab doonbo nul mwlwg lvgab swrsomalongv doomin gvnka.