Read Nyishi 2 PITOR 1 Bible Online

2 PITOR 1 - Nyishi bible

2 PITOR 1

¹Soq pota si Jisu Kristog nyerab la xuqnam Simon Pitor galoqkv ngulug Pwnbog, ngulam ywwt ywwnbo Jisu Kristog ngulam mwwjw jinam kalam hvb nyidy bo Pwnbov mwwjw jinam xinam nyi tulu mwlw jaq gab—

²Anyangv la swrsomalongv nulgab xitor alwb Pwnboam la ngulug At Sw Jisun cengnam hoqgv doonka.

³Pwnbog mwwc lamanam atorv ngulam hog mwlwngam ngulam pwdwb jinbo, jvqtw jaqb dvrwq nyil swwg nannam ho ngulam goqnbo akam cengnanam, ho mwwg yuunam mam la albo gumnam naabam mvdwb goqnum.

⁴Soq sib akin nyil mwv ngulam mwwg birwl apnam xinam koi albo lvqcam cinum, ho soq lvqc cinam soq gab nulam soq gvda gvt so doonbo sigbo kaabynam hoqgv keleq mvdwb, hoo Pwnbog mwwc lamanam swwgho swwbam dvb jipan.

⁵Soq pagoq jaqgab nulv nulug mwwjw aoho alboam vbwl atamto, nulug albo aoho cengnam mam atamto;

⁶nulug cenglaq aoho atv cwqnanam; atv cwqnnan aoho cwqnanam, cwqnam aoho dvrwqb swwnam mam atamto.

⁷Dvrwqb swwnam aoho vbw-bor jaqhvb abynam, vbw-bor jaqhvb abynam aoho abynam mam atamto.

⁸Soq torab sam nulug lvgab doog deenamv, hoo nulv soq torab sam nulug lvgab koi alwb doog baloqkam soq torab si nulam bon nyiga al mvdwb la ngulug At Sw Jisu Kristog tugu puiyam cengl niqtuq lengm dvb jitayin.

⁹Hvbmabde hiyv akgon soq torabsam doog maadwn mwv nyiqmv dvn hoo aado hoqgam mwv kaapa nyoma dvn hoo otuq hoqg nyicam nyedar darxaq kunam mam mwv mwwpa kumab nyidkun.

¹⁰Hoqgab ngoqg vbw-bor tulu, nulv Pwnbog dvgoq goqnam mam la mwwg nulam mwwbwqnam mam hingky jijaqb biimab apdvb haagab nyinyato; hoqhvb nulv nyibaloqkam nulv hoglokam gaqxaram.

¹¹Soq nyilayil nulam ngulug ywwt ywwnbo At Sw Jisu Kristog nwrba cwtam lvpw-haty tol haam dvb jitayin.

¹²Soq pagoq soq gab ngo looxiam nulv hoq bvrwqngam cengl doonyia sudo, ho nulv kaapa kunam jvqtwho biimab doos jaqkam ham bepatayin.

¹³Ngo mwwdwn, ngo simab swwl doody deedib nulam ngo soq bvrwqsam biywr gvdwl bepal doonamv ngoqgab kvtaq hindo.

¹⁴Ngo cengdwn, ngulug At Sw Jisu Kristo ngam bid lalal bekinam hvb ngo oyu maadab ngoqg soq gv soodin sam baqxia taikun.

¹⁵Hoqgab soq bvrwq torab sam mwwgab doom dvb ngo alwb nyidynam mam nyitayin.

¹⁶Ngulv nulam bibwql gon benam go bugil ngulug At Sw Jisu Kristog xitor alwb nyil hookur deeknam mam bekin twqma. Hvbmabde ngulv atv ngulug vnyiqkv mwwg xitor alnam mam kaatkun.

¹⁷Ngulv mwam Pwnbo Abv xibnv yuunam mam ao toloqgv agam ak xitorbo Pwnbov paqdwkho ngulv mwwg lvgab doobanum. Hoq agam hv benum, “Soq ak si ngoqg atwg tumanam Ko Tuupv, mwwg aoho ngoqg hangv xumtw-twiya dvn!”

¹⁸Ngulv atv soq agam benbo yal sam tatkun, ho ngulv mwwg lvgab dvrwqbo puutu ao tol yvbanum.

¹⁹Hoqgab ngulv nyiqry kanbo nyi tulug bekinam puiyam hindy jijaqb tvjwl mwwjw kunum. Huto namgob huul kan uraho doonbo wm mur hvb doonyiv caalin namgob huunbo takar korlum hvb nulug hang ho ar korlum hvb nulv agam mam mwwgab hengab pan.

²⁰Hvbmabde soq sam mwwgabto, hiyv nvkam atwg nyiqry benam dvrwqbo potangam atv bekin nyoma dvn.

²¹Hoggab hiyv nvkam nyiig mwlwq kob nyiqry bema dvn, hvbmabde nyi tulungam dvrwqbo Yalv bibwq jigam gab bulv Pwnbo galoqkv haanbo agam puiyam benum.