Read Nyishi 2 PITOR 2 Bible Online

2 PITOR 2 - Nyishi bible

2 PITOR 2

¹Kolgv nyi tulug pengko hoqgv nyiqry bimurbo tulungv lengnum, hoq hvbkalam nulug pengko hoqgv tomswr swrxiaqbo tulungv lengtayin. Bulam naalinbo akam bulv cengmakvl haqxia tayin ho cengma lvpab bulug aoho bulv atwg sigam huqpup sutayin ho bulv sig pootam la jvqtw maanbo gamlam baqatayin.

²Nyiv vijaqg bulug benam mam tal nyic nyinbo nyi tulungv, bulv jvqtwb nyil swwnam mam almanbo gob betayin.

³Tomswr swrxiaqbo nyi tulungv bulv twngkam roogum banv gon bibuq-bengaql bel nulug galoqkv naatayin, hvbmabde hoqhvb nyinbo nyi tulungam pw-hwwdwb mwx-mvaql ap pakun hoo bulam twrnbo akv hins kaaxaql doodu dukun.

⁴Pwnbov nyic nyinbo ao gumtwngam apaq maanum, hvbmabde bulam sux-ywlwb paqlnum, hoo bulam tag korcup tvl kan uraho ap pakun, ho Pw-hwwd Aalam kaaya yal doodu dvn.

⁵Pwnbov kolwg gvda gvtam nyic nyik gab apaq maanum, hvbmabde diidwr issam henca mvl Pwnboam mwwjw maanbo nyi tulungam issam hinglup mvnum, hvbmabde nyiidarbo nyiib nyil swwg pagoqkam bekinbo Noannvn la mwwg lvgab nyi kvngo ywwlinum.

⁶Pwnbov Sodom mam la Gomorrangam wm lvgab twrnum hoo Pwnboam mwwjw maanbo nyi tulu gab kokwngam hoggub nyitayin ham niitin tingwb mwwnum.

⁷Pwnbov nyi tulungam pvvbam mwwpa kumab yocu-yabio nyinam mam kaala kumab hang vcbo Lotwn naalinum.

⁸Hoq nyiidarbo nyi ak hv bulug pengko ho doobanum hoo aalwg looxiam mwv bulug almab nyic nyinam mam kaatwl mwwg hangv vc al yaanum.

⁹Hoqgab At Sw nyiidarbo nyi tulungam bulug sig hoqgv naalin dvb la nyicbo nyi tulungam kolam Pw-hwwd Aalam laqm-baqm dvb apdvb cengdwn.

¹⁰Hog mwlwngam bet lakam atwg gv lo kac-kanyiaqb nyinam mam abyboam la Pwnbog atoram benyi-beyabo nyi tulungam mwv laqm-baqmtayin. Soq tomswr swrxiaqbo nyi tulu si haakam aldvn hoo xitor yaagub mwwdwn, ho ao tolo yuukynam tulungam xima dvn, hvbmabde bulam tob-taiyil bedwn.

¹¹Hvbsujaqkam soq tomswr swrxiaqbo nyi tulungam ator yaanbo ho Koi yaanbo ao gumtwngv bulam At Swg kaagaho tob-taiyil yolu bema dvn.

¹²Hvbmabde soq nyi tulu si nyorog sudum svram nootul mvnam hvb bulv hang hinlwq twql nyidwn. Bulv tob-taiyil nyidwn hoo bulv ham mwwcin maadwn. Bulam sudum svr hvb turdwb nyitayin.

¹³Bulv hentwram dwr buqlinko gab bulam hentwr hendwb jitayin. Bulv aalwg hutongam mwwtaqb nyimanam mam nyil ham hemp poot gob mwwl hangwg mwwnam mam xumdwb nyinya dvn. Bulv nulug lvgab dvnam dvtab dooba yukam hvnywnam gob, mwurnam gob nyitayin, hoo looxiam bulug vm xaalyol nyinam mam nyil hemp alwb nyil swwdwn.

¹⁴Bulv nyem almanbo arongam kaadwb, yocu-yabio nyinam mam mwwtwq dvn, bulug nyic nyinwngv nywywngam xumt maadwn. Bulv hwwkwb mwwjw yaama bo nyi tulungam bwdw hom dvn. Bulug hangv roogum gumnam mam mwwgab twqdwn. Bulv Pwnbog beenam uraho doodwn.

¹⁵Bulv lamta dindaboam apaq pakun, ho bulv bulug lamtangam niim gvnkun. Bulv twngk abybo Beyor ko Baalam nyic nyil twngk naadwb mwwnbo ak hvb nyiknum

¹⁶ho mwwg nyic nyik gab mwam xeenum, hoqgab svdamv nyi agam goobnv nyiqry kaanbog rugaql nyinam mam biturnum.

¹⁷Soq nyi tulu si xootwr kunbo iss pobu hvb nyidkun, ho doogum dooiyv nul wgnam haapam hvb nyidwn. Bul gab Pwnbov yoqgw dooma bo mwlw jaqkam ura yaanbo kan twdwqbo nyook ak xuqpwl ap pan.

¹⁸Bulv xitor yaagub mwwdwn hoo bes maaiyam bedwn, nyixiaq wxiaqnam hoqgv oyu maadab kelin kunbo nyi tulungam bulv yocu-yabio nyig wggam kaakin banv nootu dvb nyitanum.

¹⁹Bulv atv sig ungngam doog sutwl bulam swrsob swwg lamtangam bekin dvn, hoggab ngulam hoqhv mviya ko-gab nyiv pagoq goqxy lo nyera akwb dood kun.

²⁰Hoggab nyi tulungv ngulam ywwt ywwnbo At Sw Jisu Kriston cengam gab bulv gvda gvtwg kac-kanyiaq hoqgv kelin gvdkul lokta ham nootul mviya kub nyiloqkam hoq nyi tulungv otuqg ham laabo yaab almab nyita yukun.

²¹Bulam bekin kunam dvrwqbo gamlam tamab wleq mamlin sam bulv nywywngam nyidil swwnam mam cengmab doonamv al yaat banyi.

²²Bulug nyinam mam kaaikukam niitin tinamv jvqtw goknyi. “Ikiv mwwg atwg baapnam mam dvtab hookur dukun” hoo “Hwrxaq kunam iriqkv suiyu uraho gel kartab hookur dukun.”