Read Nyishi 2 PITOR 3 Bible Online

2 PITOR 3 - Nyishi bible

2 PITOR 3

¹Ngoqg tumanam ajin tulu, soq pota sam ngo nulam tvqnyi dvb xeqg yukun. Soq pota tvqnyi bwbw so ngo nulam mwwdil swwm dvb mwwl nulug hangam biywr gvdwn.

²Ngo nulam dvrwqbo nyiqry benbo tulug kol oyug bekin kunam mam la ngulam ywwt ywwnbo la At Swb nyinbo akwg gaml jinam mam nulam xuqnam tulungv bekinam mam mwwgab dootwk hvl ngo bedwn.

³Otuqjaqb nulv soq sam cengdwb nyiky dvn, kuiyum mam moodv wikukam hoq aalam atwg swwg arongam mwwtwql nyinbo nyi tulungv nulug dookub haabnv nulam bej-beparl betayin.

⁴Bulv betayin, “Mwv haatayinwk hvl birwl ap maanum i? Mwv hoglo? Ngulug at ab tulungv sinkun. Hvbmabde hog luuxiv gvda gvtam pwdwk hoqgv nyinam akinam hvraqb nyidul doodo!”

⁵Pwnbov kol agam goonum, ho agam bek hoqgv gvda gvtam pwnum hvl cingdum tvl bulv soq sib bedwn. Gvda gvt si iss hoqgv lengnum, hoo issib nyidwn,

⁶hoo iss bvkam nyidwn, ho diidwr issiv kolwg gvda gvtam twrknum,

⁷Hvbmabde sijag doodwn swcw nyoodo sam Pwnbog agam gamkin hoqgv twrm maab ap pan hoo kokwngam wm lvgab twrdkub hvl beol ap pakun. Pwnboam mwwjw maanbo nyi tulungam pw-hwwl twrd aalam twrdwb hvl birwl ap pakun.

⁸Hvbmabde ngoqg tumanam ajin tulu; soq agam gaml sam mwwpa maab nyimabv; At Swg kaagaho aal lookinv aal vnyw lwwyw hvb nyidwn, hoo vnyw lwwywngv aal lookin hvb nyidwn.

⁹At Sw nyi tuugin mwwnam hvb, mwv mwwg nyidkub hvl birwl ap kunam ham nyinyiaq jaqb nyidu maadwn. Pwnbov hiyv nvkam sim dvb mwwma dvn, hvbmabde mwlwngam bulug nyic nyinam hoqgv mwwkur gvdkul wkur mvdwb mwwnv nulam mwv cwql doodwn.

¹⁰Hvbmabde At Swg haad Aalv dvcobov haanam kalam hvb nyitayin. Hoq Aalam doonyi poolv tvrang-marang dubnv niitayin, hoo ao tol doonbo mwlwngam wm lvgab jiqxa tayin, hoo gvda gvt soq doonbo hog mwlwngam nyis nyinam tulungam wm lvgab parxia tayin.

¹¹Soq sib nyil hog mwlwngam twryum kub nyiloqkam, nulv hoggub nyinbo nyiib nyikin dvn? Nulv dvrwqb nyil swwdwb nyitayin, hoo nulug swwnam mam dvrwqb swwl Pwnbon gvqlwq dvb nyidwn.

¹²Nulv Pwnbog haad Aalam kaayal doode so nulv sam vnwqb haam dvb mwwto, hoq Aalam doa aog hog mwlwngam wmv muiyum cinjum gob gupaq tayin, hoo twrtayin, hoo doa aog hog mwlwngv hoq wm ogho jiqtayin.

¹³Hvbmabde Pwnbov ngulam jibwk hvl birwl ap kunam mam nyiidarbo nyi tulungv dookub nitib ao gvdangv la nitbo gvda gvtam kaapa maady deedib ngulv kaaya yal dootayin.

¹⁴Hoqgab ngoqg ajin tulu, nulv hoq Aalam kaayal doodu yukam nulv hindy lalal dvrwq alwb nyil Pwnbog kaagaho nyidil dooto. Hoo swrsomalob doodwb kwrwb nyito.

¹⁵Ngulug tumanam bor Poulwg nulam pota xeqnam kalam hvb Pwnbov mwam hoggub nyil mwwlwqnanam jinum, hoq hvbkalam nulam ngulug At Sw hoggub nulam ywwt ywwdwb mwwl cwql doodwn ham nulv nulug hangho mwwgabto.

¹⁶Soq sib lak mwwg pota xeqnam mwlwho mwv soq pagoq sam xeqnum. Mwwg pota xeqnam tulug pengko ho nyi pwbw maanbo ho hwlin-soomin bo nyi tulungv tacin lamanam agamv doodwn ham bulv dvrwqbo pota taqsaqngam tomswrnam hvbkalam bulv tomswr swrxiaq banv bulv atwg sigam bepa sudwn.

¹⁷Hvbmabde ngoqg ajin tulu, nulv sam cengxo paku, hoq gab nulv atv hengab gvdwl hvvmin dooto. Hvbmabde pvvbam tal swwma bo nyi tulungam sup komabv, hoo swwg hoqgv nulv bwdw homabv.

¹⁸Hvbmabde ngulam ywwt ywwnbo At Sw Jisu Kristog anyako uraho la mwwcin nanho swwgwl nulv dooto. Sija galoqkv nwrba cwtam gob mwwg eminam yuuky nvka! Amen.