Read Nyishi 1 JON 3 Bible Online

1 JON 3 - Nyishi bible

1 JON 3

¹Mwwkato! Pwnbo Abv ngulam hog hwdgo aby pakun! Mwwg abynamv xitor alkunv ngulam Pwnbog Kov hvl bepakun, hoggab ngulv jvqtw jaqb mwwg kob nyidkun. Hoqgab gvda gvtv ngulam cengmadvn, ho Pwnboam kam cengmab nyidwn.

²Ngoqg tumanam ajin tulu ngulv sija Pwnbog kov, hvbmabde sija godab ngulv hoggub nyitayin ham himbwq maada, hvbmabde ngulv sam cengdwn mwv haaikukam ngulv kam mwwg hvbkalam nyitayin; hoggab mwv sija hoggub nyil doodwn hoq hvbkalam nyidub ngulv mwam kaapa tayin.

³Kriston mwwjwbo nyi vxy cwrv Kristo hoggub nyil dvrwqb doodwn hoq hvbkalam mwvkam dvrwqb doodwb nyidwn.

⁴Hiyv lajaqkam nyic nyinbov Pwnbog pvvbam pvvb juqbo dvn, hoggab nyic nyinamv pvvbam pvvb juqbo dvn.

⁵Kristo ngulug nyicam baqpaqtab haanum, hoo mwwg uraho nyic akukam dooma dvn hvl sam nulv cengl doodo.

⁶Hoggab Kristog lvgab doonbo nyi vxiv nyic nyidul dooma dukun, hvbmabde nyic nyidul doonbo nyi akv mwam kaaka kama ho mwam cengkam ma.

⁷Ko tulu, nulv hiyv nvkam sup komabv! Hiyv lajaqkam nyidil kvtaqb alwb albo bonam nyinbo akv Kristog hvbkalam nyedar bov.

⁸Nyic nyidul doonbo nyi akv Ui gab doodwn, hoggab Uiyv kol galoqkv nyic nyidul dooky dvn. Pwnbog Ko Tuupv soq gablak Uiyig nyis tulungam nyinam mam twrtab dwr buqnum.

⁹Hiyv lajaqkam Pwnbog koob nyinbo nyiv mwv nyic nyidul dooma dvn, hoggab mwv Pwnboam guss dvn ho Pwnbo mwwg Abv, hoqgab mwv nyic nyidul doodwb nyima dvn.

¹⁰Soq siilak Pwnbog ko tulug la Uiyig ko tulug pengko hoq kaacin dvb nyinamv; hiyv nyidynam albo bonam nyima dvn ho atwg boram aby boma dvn, hoq nyi ak hv Pwnbog ko ma.

¹¹Kol nwrba galoqkv ngulv akwn akwn aby bomin sudub nyiky dvn hvl nulv takynam puiyv siilak.

¹²Ngulv Keenwg nyinam hvb nyidub nyiky maadwn, mwv almanbo akwg nyiib nyinum, hoo kokw so mwv atwg boram Abelnvn mengnum. Keen hoggab mwwg atwg boram mengnum? Hv hvbaloqkam Keenwg nyinam bon tuluhv almanum, hvbmabde mwwg bor Abel nyinam bon tuluhv albo bonwb nyinum.

¹³Hoqgab ngoqg bor tulu, gvda gvtv nulam oyum yumb nyiloqkam nulv ham lomabv.

¹⁴Ngulv sigam keleq peekul swwg lamtangam kaapal haaikun hvl ham ngulv cengl doodwn. Soq sam ngulv ngulug vbw-bor tulungam aby ko-gab ngulv ham cengdwn. Hiyv nyiv aby bomadvn hoq nyi ak hv mwv sija godab hvraqb sil doodwn.

¹⁵Hiyv nyiv atwg boram oyum dvn mwv nyi mengbov hoo nyi mengbo akv nwrba cwtam swwgam mwwg lvgab doog maadwn hvl nulv cengdo.

¹⁶Kristo ngulug gab sinkun. Soq sib nyik soqgv lak ngulv abynamv hognvkv ham cengdwn. Hoqgab ngulv kam ngulug vbw-bor tulungam siyw dvb nyidwn.

¹⁷Nyetbo nyi akv mwwg boram jwwgwnam mam kaat lakam mwwg vnyiqkv kaama panhvb mwwg boram anya mwwpa maab apaq baloqkam mwv hoggub nyil mwwg hang uraho Pwnbo gab abynamv doodnvk hvl belatayin?

¹⁸Ngoqg ko tulu, ngulug abynam sam agamv bitwql doodwb nyima, hvbmabde ngulv bon nyigdvl jvqtw jaqb ngulug aby bomin sunam mam ngulv kaakin tuj.

¹⁹Soq sib nyib nyiloqkam lak ngulam jvqtwg dvpar hoqg nyiv hvl cengtayin hoo ngulug hangv mwwjw alwl Pwnbog kaagaho dootayin.

²⁰Ngulug hangv ngulug hang mwwnamv mwwxiaqpa hvl beb nyiloqkam ngulv cengtayin, ngulug hang mwwnam mam Pwnbov koi yaadwn hoo mwv hog mwlwngam cengdwn.

²¹Hoqgab ngoqg tumanam ajin tulu ngulug hang mwwnamv ngulam nyixiaqpa hvl bem baloqkam ngulv Pwnbog kaagaho haakam aldvn.

²²Ngulv hog mwlwngam mwwg galoqkv koonam mam ngulv ham kaapa dvn, hoggab ngulv mwwg gamlam tal bugil swwdwn hoo mwwg hang mwwlwqkob ngulv nyidwn.

²³Ngulv mwwg Ko Tuup Jisu Kristog eminb mwwjwnamv hoo Kristo ngulam gaml jinam hvbkalam akwn akwn aby bomin sul nyinam si mwwg gaml jinamv.

²⁴Hiyv nyiv Pwnbog gamlam tal bugil swwn bov Pwnbog uraho doodwn hoo Pwnbov mwwg uraho doodwn. Pwnbov ngulug urasi doodwn hvl ham ngulv mwwg ngulam mwwg Yal jiknam hoqgv cengdwn.