Read Nyishi 1 JON 4 Bible Online

1 JON 4 - Nyishi bible

1 JON 4

¹Ngoqg tumanam ajin tulu nulv Yal mwlw jaqkam mwwjw maabv hvbmabde hoq tulu ham bulv jvqtw jaqb Pwnbog galoqkv haanbov bwdwq ham hindib mwwdy hindy cooto. Hoggab xaalyob nyiqry benbo tulungv vigo gvda gvt si haapa ku.

²Soq Yal si Pwnbog galoqkv haanbov bwdwq nulv soqgv cengtayin; hiyv Jisu Kristo nyia kob nyitwl haanum hvl benbo akv Pwnbo galoqkv haanbo yalam doogdvn.

³Hvbmabde hiyv soq sib Jisug pagoqkam bemabo akv Pwnbo galoqkv haanbo yalam doog maadwn. Soq yal si Kriston hang baqnbo hoqgv hoo nulv soq si haatayin hvl benam mam tag nukun ho hoq Yalv sija gvda gvt si haapa ku.

⁴Hvbmabde ngoqg ko tulu, nulv Pwnbog dvpar hoqg nyiv ho nyiqry kaal tomswr swrxiaqbo dvparam mviya pakun, hoggab nulug uraho doognam yal ak hv gvda gvt so doonbo yalam koi yaadwn.

⁵Gvda gvt so doonbo yalv gvda gvt soqg bvrwqngam bedwn, hoo gvda gvt soq nyiv hoq benam mam tadwn.

⁶Hvbmabde ngulv Pwnbog dvpar hoqg nyiv hoo hiyv lajaqkam Pwnboam cengnbo nyiv ngulug benam mam tadwn hoo hiyv Pwnbog nyiib nyima dvn bulv ngulug benam mam tama dvn. Soq pagoq soq gablak ngulv jvqtw bo yalwg la xaalyo bo yalwg asaqkog bvrwqngam bedwn.

⁷Ngoqg tumanam ajin tulu ngulv akwn akwn aby bomin sunyia tuj, hoggab abynamv Pwnbog galoqkv haadwn. Hiyv aby bodwn mwv Pwnbog kov hoo Pwnboam cengdwn.

⁸Hiyv aby boma dvn mwv Pwnboam cengma dvn, hoggab Pwnbov abydvn.

⁹Pwnbov mwwg Ko Tuup akin jaqkam gvda gvtwb kanam tvl ngulam nwrba cwtam swwgam mwwg galoqkv kaapa mvdwb mwv jipan.

¹⁰Soq siilak abynamv. Ngulv Pwnboam abynum hvbma, hvbmabde mwv ngulam otuqcob aby boconum hoo mwwg Ko Tuupam kanam tvl ngulug nyic mwlwngam axia mvdwb jipa kun.

¹¹Ngoqg tumanam ajin tulu Pwnbov ngulam soq sib abynum nyiloqkam ngulv akwn akwn aby bomin sudub nyidwn.

¹²Hiyvkam Pwnboam lok kam kaaka ma, hvbmabde ngulv akwn akwn aby bomin sub nyiloqkam Pwnbov ngulug urasi doodwn hoo mwwg abynam gab ngulam niqtuq lengm tayin.

¹³Pwnbov mwwg Yalam ngulam jinam gab ngulv mwam ngulug urasi doodwn hvl cengdwn hoo ngulv mwwg uraho doodwn.

¹⁴Ngulv vnyiqkv kaatwl nyi tulungam Abv mwwg Ko Tuupam gvda gvtam ywwt ywwm dvb hvl kanamnum ham ngulv bekin dvn.

¹⁵Hiyv Jisun Pwnbog Ko Tuupv hvl benbo akwg uraho Pwnbov doodwn hoo mwv Pwnbog uraho doodwn.

¹⁶Ho Pwnbov ngul gab mwwg abynam mam ngulv cengtwl mwwjwdvn. Pwnbov abydvn hoo hiyv aby bol swwdwn mwv Pwnbog uraho doodwn.

¹⁷Abynam bvrwq pagoqkam pw-hwwd Aalam ngulam haakam alwb nyil ngulug galoqkv niqtuq lengm dvb jipan. Ngulv soq gvda gvt so Kristo hoggub nyil doodwn hvbkalam nyil swwl doodwn.

¹⁸Abynamho bos sos dooma, hoggab niqtuq doody bo abynamv bos sonam mwlwngam ruqxa dvn, hoggab bos sonbo akv abynam mam niqtuq lengm dvb mvma dvn; hoggab bos sonamv laqm baqsv.

¹⁹Pwnbov ngulam otuqcob aby boconum, hoqgab ngulv kam mwam abydvn.

²⁰Hiyv ngo Pwnboam abydvn hvl bvvtwl mwwg atwg boram oyum baloqkam mwv xaalyo bov, hoggab mwwg vnyiqkv kaapanam bor akam aby boma baloqkam hoggub nyil mwwg kaapa maanam Pwnboam aby bonyi tayin.

²¹Hiyv Pwnboam abydvn, mwv akwn akwn aby bomin sudub nyiky tayin hvl soq benam siilak Kristog ngulam gaml jinamv.