Read Nyishi 1 JON 5 Bible Online

1 JON 5 - Nyishi bible

1 JON 5

¹Jisun Ywwnbo akv hvl mwwjwbo nyi vx cerv Pwnbog kov ho hiyv nyiv abam aby bodwn mwv hoq nyi hoqg koamkam aby bodwn.

²Ngulv Pwnboam aby bol mwwg gamlam tal bugil swwb nyiloqkam hoolak ngulv Pwnbog ko tulungam aby bodwn hoqgv ngulam Pwnbog kov hvl cengtayin.

³Ngulv Pwnboam aby bonam hv nyiloqkam ngulv mwwg gamlam tal bugil swwnam mam bedwn. Hoo ngulv mwwg gamlam tal swwla maadwb haajaq hoqhvb vi maadwn.

⁴Hoggab Pwnbog ko vxiv gvda gvtam mviya dvb hog hvvtw maadwn. Soq sib lak nyil ngulv gvda gvtam ngulug mwwjwnamv mviya gvdwn.

⁵Jisu Pwnbog Ko Tuupv hvl mwwjwbo nyi tulug ao hoqgv hiyvg nyiv gvda gvtam mviya dvb nyi doodwn.

⁶Jisu Kristo twqlak mwwg baptijum iss lvgab mwwg sinam ui lvgab haanum. Mwv iss lvgab bwtwq ma, hvbmabde iss lvgab la ui hoqgv haanum. Yalv atv mwv soq pagoq sam jvqtwngvk hvl bid lalal bekin dvn, hoggab yalv jvqtwngv.

⁷Hvvky swwn bov yalv, issiv ho uiyv soq oum si doodwn:

⁸soq oum bwbw si loomin sudwn, bul oumg benamv akinam bedwn.

⁹Ngulv nyi tulug puiyam mwwjwdvn, hoo Pwnbog puiyv nyi tulug puiyam ator torbin yaadwn, hoggab Pwnbov mwwg Ko Tuupwg pagoqkam puiyam jinum.

¹⁰Hoqgab Pwnbog Ko Tuupam mwwjwbo akv soq pui sam mwwg hang uraho mwwjwdvn. Hvbmabde Pwnboam mwwjw maanbo akv Pwnboam xaalyo bogub bedwn, hoggab mwv Pwnbog Ko Tuupwg pagoqkam pui bekinam mam mwwjw kumanum.

¹¹Hoq puiyv soq siilak, Pwnbov ngulam nwrba cwtam swwgam jipan hoq swwg si mwwg Ko Tuupwg lvgab doodwn.

¹²Hiyv Pwnbog Ko Tuupam mwwjw bov mwv swwgam kaapa pakun, hvbmabde Pwnbog Ko Tuupam mwwjw maanbov swwgam kaapa ma.

¹³Pwnbog Ko Tuupam mwwjwbo nyi tulu, nulgab nwrba cwtam swwgv doodwn hvl ngo nulam soq pota sam nulgab xeqg yin.

¹⁴Ngulv Pwnbog aoho soq sam mwwjwdvn, ngulv mwwg mwwlwqkob mwwg galoqkv hog ak kob nyiloqkam mwv ngulam ham jitayin.

¹⁵Mwv ngulug benam mam tadwn hoo ngulv mwam hog ak koda kalam ham mwv ngulam jidwn, hoo soq konam sam ngulv mwwg galoqkv jvqtw jaqb kodum dvb kodwn, hoo ngulv mwam koda kalam ngulam ham jidwn hvl ngulv mwwjwdvn.

¹⁶Hiyv nyiv mwwg boram nyic nyinam mam kaapa tvl, mwwg hoq nyic nyinamv mwam sig lamtab wg baloqkam mwv bor ak gab swwgam jidy bo Pwnboam xumdwb nyidwn. Soq benam si nyic nyis jaqkam sig maady bo nyic nyinbo nyi tulu gabkam doodwn. Hoq pagoqkam ngo nulam Pwnboam xumto hvl bema.

¹⁷Nyixaq wxaqnam mwlwngv nyic nyinamv, hvbmabde sig deema bo nyicv kam doodwn.

¹⁸Pwnbog koob nyinbo nyiv nyic nyidul dooky maadwn hvl ngulv cengdwn, hoggab Pwnbog Ko Tuupv mwam rvkil doog gvdwn, ho almanbo akv mwam hog mvdaq nyoma dvn.

¹⁹Gvda gvt mwlwngv almanbo akwg alaqb doojaqkam ngulv Pwnbog gab doodwn hvl cengdwn.

²⁰Ngulv Pwnbog Ko Tuupv hvl cengdwn, hoo mwv ngulam mwwcin nanam jitwl jvqtw Pwnboam ngulam cengdwb jinum. Ngulug swwgv jvqtw Pwnbog Ko Tuupwg Jisu Kristog alaqtv doodwn. Mwv jaqmolo jvqtw Pwnbov, hoo nwrba cwtam swwgv.

²¹Ngoqg ko tulu, nulv atam atv xaalyo bo Pwnbo torab alaq hoqgv hvvmin gvdwl hengab dooto.