Read Nyishi NYEGAM 1 Bible Online

NYEGAM 1 - Nyishi bible

NYEGAM 1

¹Josua sixo kokw so Israel nyiilungv At Sw toxnum, “Hiyv ngul gab ceeol Kanaan nyi tulungam bulam ceetorl nyob patayin?”

²‍At Sw benum, “Judangv caatayin; kaato, mwwg alaqho ngo gvdangam jipa kun.”

³‍Hoo Juda mwwg vbw-bor Simeonnvn benum, “Ngulv Kanaan nyi tulungam nyob padwb, ngam dwrbu-dwrya gvda jikwb caamin gvtbv. Hoo nam dwrbu-dwrya gvda jikwb ngo kam wmin gvtayin.” Ho Simeon mwam wmin gvnum.

⁴‍Ho Juda nyob patab caanum hoo At Sw Kanaan nyi tulungam la Perijj nyi tulungam bulug alaqho jiknum, hoo bulv Bejek ho 10,000 nyiam nyob paiyanum.

⁵‍Bulv Bejek ho Adoni-bejekam kaapanum hoo mwam nyob panum hoo Kanaan nyi tulu ngamla Perijj nyi tulungam mviyanum.

⁶‍Adoni-bejek nyi tulungv xaal kenum, hvbmabde bulv bulam ruqmin gvl hoo mwam nootunum hoo mwwg laqnam la mwwg lvnam papaqnum.

⁷‍Hoo Adoni-bejek benum, “Lvpw at cam kvn go laqnam la lvnam ciqpaqnamv ngoqg tebol hoqg duduq-dvngaram darl dudu dvn. Hoqgab ngo hoggv nyiknum, Pwnbo ngam kwly naapa ku.” Hoo bulv mwam Jerusalemb boa kunum, hoo mwv hoqho siknum.

⁸‍Hoo Juda nyi tulungv Jerusalem mam nyob panum hoo ham naareq kunum hoo hoqho doonbo mwlwngam lyoqr orioq hoqgv mengnum hoo bopam mam wm rwlwqnum.

⁹‍Hoo kokw so Juda nyi tulungv, Negeb diisw gvda gvla haapa gvdaho doonbo, Kanaan nyi tulungam nyob patab innum.

¹⁰‍Hoo Hebron ho (otuqho Hebronwg eminam Kiriat-arba hvnum) doonbo Kanaan nyi tulungam Judangv nyob patab innum, hoo bulv Sesai la Ahiman hoo Talmainvn mviyanum.

¹¹‍Hoq hoqgv bulv Debirg doonbo nyi tulungam ceeko taab wnum. Debirg otuq hoqg eminam Kiriat-seper hvl benum.

¹²‍Hoo Kaleb benum, “Hiyv Kiriat-seperam nyob pal hoo ham naareq boam, ngo mwam ngoqg nyem ko Aksanvn mwwg nywxwb jitayin.”

¹³‍Hoo Kalebg bor ko Kenaj gv ko tuup Otniyel ham mviyal naareqnum. Hoo mwv mwam mwwg nyem ko Aksanvn mwwg nywxwb jiknum.

¹⁴‍Hwdlo mwn mwwg dookub haanum, mwn mwam mwnwg ab hoqgv rongo rwqg kotwk hvl bilwqnum. Hoo mwn mwnwg svdam hoqgv ipoq kalam, hoo Kaleb mwnwn benum, “No hoggv nvvnw do?”

¹⁵‍Mwn mwam benum, “Ngam lvqc loq ak jitbv. Hoqgv no ngam Negeb gvda lo doom dvb jipa ku, hoqgab ngam iss subuq buqlinbo gvda lo jitbv.” Hoo Kaleb mwnwn odum bvla akob iss subuq buqlinbo gvdangam jinum.

¹⁶‍Hoo Mojesg at Kenait hotamv pvng bopam hoqgv Judag nyiilu lvgab Judag deexa-rarako urab haamin gvnum, hoqhv Negeb ogumg Aradho doonum, hoo bulv hoqb wknv hoo nyiilug lvgab nvmcw doomin gvnum.

¹⁷‍Hoo Juda vbw-bor Simeon lvgab wmin gvnum, hoo Jepat ho doonbo Kanaan nyi tulungam bulv nyob pal twryumnum. Hoqgab bopam hoqg eminam Horma hvl goqnum.

¹⁸‍Gajangam la hoqg dwrbu-dwryangam, hoo Askelonam la hoqg dwrbu-dwryangam, hoo Ekron la hoqg dwrbu-dwryangam, Judangv mviyal naareq kunum.

¹⁹‍Hoo At Sw Juda lvgab doobanum, hoo mwv diisw gvdangam otu naaknum, hvbmabde mwv haapa hoqg doonbo nyi tulungam mwv ruqlinl ruqpaq nyomanum hoggab bulv yoqdwr ceriotv doognum.

²⁰‍Hoo Mojes benum hvb, Hebronam Kalebnvn jiknum. Hoo Anakwg ko tuup oum mam mwv hoqgv ruqlinl ruqpaqnum.

²¹‍Hvbmabde Benjaminwg nyiilungv Jerusalemho doonbo Jebus nyi tulungam ruqlinl ruqpaq maanum, hoqgab Jebus nyi tulungv Jerusalemho Benjaminwg nyiilug lvgab soolo godab doomin gvdwn.

²²‍Josapg dvparv Betelam ceekol nyob panum, hoo At Sw bulug lvgab doobanum.

²³‍Hoo Josapg dvparv Betelam mvqky-maqlam mvnum. (Otuqho bopam mam Luj hvl eminum.)

²⁴‍Hoo mvqky-maqlam mvnbo tuluhv bopam hoqgv nyi ak lengnam mam kaapanum, hoo bulv mwam benum, “Anya mwwpa gvdwl ngam bopamb haak lamtangam ngulam kaakin tvb, hoo ngulv nam aya jaqb svka tayin.”

²⁵‍Hoo mwv bulam bopamb haak lamtangam kaakinum. Hoo bulv bopam mam lyoqr orioq hoqgv nyob panum, hvbmabde bulv hoq nyi ham la mwwg imiq nyi tulu mwlwngam wwm dvb jinum.

²⁶‍Hoo nyi ak hv Hittait nyi tulug gvdab wknv hoo hoqho bopam ak mvknum hoo ham Luj hvl eminum. Soolo godab hoqg eminv doodwn.

²⁷‍Manasse nyi tulungv Bet-sean la hoqg nampam tulungam, ho Taanak la hoqg nampam tulungam, ho Dorwg doonbo nyi tulungam la hoqg nampam tulungam, ho Megiddo ho doonbo nyi tulungam la hoqg nampam tulungam ruqlinl ruqpaq nyomanum, hoggab Kanaan nyi tulungv gvdaho ceetorl doodu kunum.

²⁸‍Hwdlo Israel nyiilungv atorb swwikun, bulv Kanaan nyi tulungam nyera-paqn hvb bon nyim dvb mvnum, hvbmabde bulam twrkub ruqlinl ruqpaq maanum.

²⁹‍Hoo Gejerho doonbo Kanaan nyi tulungam Iprayim nyi tulungv ruqlinl ruqpaq maanum, hoqgab Gejerho Kanaan nyi tulungv bulug pengko ho doonum.

³⁰‍Jebulun nyi tulungv Kitronho doonbo nyi tulungam, ho Nahalol ho doonbo nyi tulungam ruqlinl ruqpaq maanum, hoggab bulug pengko ho Kanaan nyi tulungv doonum, hvbmabde bulam nyera-paqn hvb bon nyim dvb mvnum.

³¹‍Aser nyi tulungv Akko, ho maalo doonbo nyi tulungam, ho maalo Sidon ho doonbo nyi tulungam ho maalo Ahlab ho Akjib ho Helba ho Apik ho hoo maalo Rehob ho doonbo nyi tulungam ruqlinl ruqpaq maanum,

³²‍Gvdaho doonbo, Kanaan nyi tulug pengko ho Aser nyi tulungv doonum, hoggab bulam bulv ruqlinl ruqpaq maanum.

³³‍Naptali nyi tulungv Bet-semes ho doonbo nyi tulungam, ho Bet-anat ho doonbo nyi tulungam ruqlinl ruqpaq maanum, hoqgab bulv gvdaho doonbo Kanaan nyi tulug pengko ho doonum. Hvbjaqkam Bet-semes la Bet-anat ho doonbo nyi tulungam bulv nyera-paqn hvb bon nyim dvb mvnum.

³⁴‍Amor nyi tulungv Danwg nyiilungam diisw gvdab ruqkur caanum, hoggab bulv bulam haapa gvdaho ilin mvmanum.

³⁵‍Amor nyi tulungv Heres Puutu ho, Aijalon, hoo Saalbim ho ceetorl doodunam, hvbmabde Josapg dvparv bulam mviyanum, hoo bulam nyera-paqn hvb bon nyim dvb mvnum.

³⁶‍Hoo Amor nyi tulug gvda doorv Akrabbim hoqgv Sela hoo hoq odum daiya namgub wknum.